Ngjarjet që ndodhen në Ramazan pas vdekjes së Pejgamberit alejhi selam

Viti 14 hixhri

- Falja e namazit të teravive me imam pas Ubejje ibn Halefit. Këtë e bëri udhëheqësi i dytë pas vdekjes së Pejgamberit alejhi selam, Omer ibn Hattabi, Allahu qoftë i kënaqur me të, madje ai dërgoi shkresa me të cilat i urdhëroi mëkëmbësit e tij në të gjitha rajonet që të falin këtë namaz me imam.

Viti 58 hixhri

- Vdekja e nënës së besimtarëve, Aishes, Allahu qoftë i kënaqur me të, e cila ishte e bija e Ebu Bekrit dhe gruaja e Pejgamberit alejhi selam, madje më e dashura prej të gjithave. Ka vdekur në mbrëmjen e së martës më 17 Ramazan dhe ka porositur që të varroset natën në varrezat e Bekies (varrezat e Medinës). Namazin e xhenazes ia ka falur Ebu Hurejra pas namazit të vitrit. Kur vdiq ishte 67 vjeçe, ngase kur vdiq Pejgamberi alejhi selam ajo ishte vetëm 18 vjeçe, ndërsa kur bëri hixhretin ishte rreth 9 vjeçe.

Viti 124 hixhri

- Vdekja e Imam Zuhriut. I takonte gjeneratës së tabi’inve të nderuar. Ai është Muhammed ibn Ubejdullah ibn Abdullah ibn Zuhre ibn Kilab ibn Murre, Ebu Kureshi Zuhri. Është një prej dijetarëve të njohur dhe emër i shquar i Islamit.

Viti 218 hixhri

- Hyrja e Mu’tesim Bilahut në qytetin e Bagdadit pasi mori postin e udhëheqësit. Atë ditë që vdiq vëllai i tij, Me’muni, në Tarsus, ditën e enjte më 12 rexheb, ngase ishte i sëmurë, e mori pushtetin Mu’tesimi, edhe pse disa menduan se duhej të vinte në pushtet djali i Me’munit, Abbasi. Por, Abbasi tha se unë ia dorëzoj pushtetin xhaxhait tim, Mu’tesimit. Pas marrjes së pushtetit, urdhëroi që të kalonte në Bagdad, ku edhe hyri në ditën e shtunë në fillim të muajit Ramazan.

Viti 222 hixhri

- Çlirimi i qytetit Babek në kohën e kalifatit të Mu’tesimit, i cili përgatiti një ushtri të madhe për të. Pas shumë përpjekjesh e betejash të ashpra, arritën ta çlirojnë Babekun në ditën e premte në dhjetë ditët e fundit të Ramazanit.

Viti 441 hixhri

- Dy shtyllat në anijatën e Xhamisë Emevite në Damask. Ka nisur ndërtimi i xhamisë në Damask në fund të vitit 86. Është rrënuar kisha që ishte në atë vend dhe pastaj filloi ndërtimi i xhamisë, që zgjati dhjetë vjet. Atë e filloi Velid ibn Abdulmeliku dhe e përfundoi vëllai i tij, Sulejmani, Allahu i mëshiroftë. Kupola lindore është ndërtuar në vitin 450, ndërsa dy shtyllat e vendosura në anijatën e xhamisë janë bërë për ndriçim për netët në të cilat tubohen besimtarët. Këto dy shtylla janë bërë me urdhrin e gjykatësit të qytetit, Ebu Muhammedit.

Viti 518 hixhri

- Vdekja e autorit të librit “Kitabul Emthal”. Ibën Ibrahim Ebu Fadël Mejdani është autori i këtij libri, i cili nuk ka rivalë në këtë fushë. Ka vdekur ditën e mërkurë më 25 Ramazan.

Viti 540 hixhri

- Vdekja e Muhammed ibn Abdullah ibn Ahmed ibn Habib Ebu Bekër Ammarij, i njohur si Ibën Habbazi. Ka dëgjuar hadithin dhe është edukuar në frymën e tij Ibnul Xhevzi. Ka pasur njohuri të mëdha në fikh dhe në hadith. Ka vdekur në mbrëmjen e së mërkurës në gjysmë të Ramazanit.

Viti 544 hixhri

- Vdekja e gjykatësit Ijad, i njohur si Kadi el-Ijad. Ai është Ijad ibn Musa ibn Amër ibn Ijad ibn Muhammed ibn Musa ibn Ijad Sebtij, ka lindur në vitin 446. Është një prej dijetarëve të mëdhenj të malikive, autor i shumë librave, si “Esh-shifa”, “Sherh muslim”, “Mesharikul envar” etj. Ka shkruar poezi të bukur dhe është dijetar e imam në shumë shkenca, si në fikh, gjuhë arabe, hadith, letërsi. Ka vdekur në ditën e premte në Ramazan në qytetin Sebtë.
Viti 559 hixhri

- Lufta në Harim. Ky vend është çliruar në këtë vit, kur Nuruddini kërkoi ndihmën e ushtarëve muslimanë kundër të krishterëve evropianë, me ç’rast u zunë robër shumë prej tyre, madje edhe vetë përfaqësuesit e Antiokisë, të Tarabulsit, të Romës e të tjerë, madje janë vrarë mijëra njerëz, thuhet 20 mijë.

Viti 587 hixhri

- Të krishterët evropianë marrin qytetin Aka. Ata pas marrjes së këtij vendi vazhduan me tërë fuqinë duke synuar Askalanin. Por, ushtria muslimane nën udhëheqjen e sulltanit Salahudin i kundërshtonte çdo herë dhe hap pas hapi bënte ndjekjen e tyre. Mes dy ushtrive u shkëmbyen shumë letra, por u bënë edhe shumë beteja të ashpra. Mbreti i Anglisë dëshironte të bënte një konspiracion me vëllanë e sulltanit, mbretin Adil, por ky ia ktheu rreptë se në asnjë mënyrë nuk e pranon një gjë të tillë pa u shfarosur edhe kalorësi dhe këmbësori i fundit. Vazhduan betejat e ashpra. Sulltani më 2 Ramazan lëshon Askalanin e shkatërruar dhe vendoset afër Bejtul Makdis, të cilin edhe e vizitoi. Kërkesat e evropianëve vazhdonin edhe më tej, formuluar përmes mbretit të Anglisë: Kërkojmë tri gjëra e asgjë tjetër: Kthimin e kryqit, vendet përgjatë bregdetit dhe Bejtul Makdisin. Por sulltani Salahudin iu përgjigj me tone të ashpra dhe bëri parapërgatitjet e duhura për përballimin e sulmeve të krishtera dhe herë pas herë i sulmonte ata duke iu shkaktuar humbje, duke zënë shumë robër dhe duke marrë plaçkën e tyre. U mbyll viti dhe gjendja ishte kësisoj.

- Vdekja e mbretit Mudhaffer, e cila ndodhi më 19 Ramazan. Ka qenë trim dhe i tmerrshëm në luftë. Emri i tij është Tekijuddin Omer ibn Shahnishah, ishte i biri i vëllait të Salahudinit.

Viti 645 hixhri

- Vdekja e Haririt. Me origjinë ishte nga fshati Busr dhe më vonë erdhi në Damask, ku punonte në prodhimin e mëndafshit. E pastaj e la edhe këtë profesion dhe filloi të lypte. Veprimet dhe mendimet e tij i refuzonin dhe i qortonin dijetarët si Izzuddin ibn Abduselam, Ibën Salah, Ibën Haxhib e të tjerë. Shteti eshrefij në atë kohë e burgosi dhe më vonë, kur e liruan, ia kushtëzuan largimin nga Damasku. U kthye në fshatin e tij, por herë pas herë vinte edhe në Damask. Ithtarët e tij njihen si haririj, të cilët kryesisht ishin varfanjakë dhe ishin mohues të sheriatit. Talleshin me parimet e fesë, bënin mëkate, mexhliset e tyre ishin me muzikë e valle, e lanë tërësisht namazin dhe me gjëra të tilla ndikuan te shumë njerëz, sidomos te të rinjtë. Disa dijetarë lejuan edhe vrasjen e tij, por deshi Allahu dhe vdiq e shpëtuan njerëzit nga sherri i tij.

Viti 654 hixhri

- Djegia e Xhamisë së Pejgamberit në Medinë. Ebu Shame thotë: “Në mbrëmjen e së premtes, në fillim të Ramazanit, e kaploi Xhaminë e Pejgamberit një zjarr i madh në këndin perëndimor duke shkuar drejt atij verior. Dikush ka hyrë me zjarr dhe flaka u është kapur dyerve, saqë shumë shpejt kaloi te kulmi, i cili u dogj tërësisht në më pak se një orë. Po ashtu edhe kulmi i dhomës së Pejgamberit është djegur.

Viti 662 hixhri

- Fitorja e muslimanëve të Marokut kundër të krishterëve evropianë. Sipas shënimeve nga Maroku, tregohet se ata korrën fitore kundër të krishterëve evropianë duke vrarë mbi 45 mijë ushtarë, zunë robër 10 mijë dhe çliruan 42 vende të pushtuara. Fitorja vendimtare ka qenë ditën e enjte më 14 Ramazan.

Viti 666 hixhri

- Çlirimi i Antiokisë në kohën e Sulltanit Melik Dhahir. Antiokia ishte një qytet i madh me plot të mira, muri i të cili ishte mbi 12 milje, kishte 136 kulla dhe 24 mijë sherife. Muslimanët u nisën drejt këtij qyteti në fillim të Ramazanit. Banorët e tij dolën jashtë për të kërkuar nga sulltani siguri duke parashtruar kushte, të cilat ai i refuzoi, përgatiti rrethimin e tij dhe hyri në të më 14 Ramazan me ndihmën e Allahut. Aty gjeti shumë të mira, zuri shumë robër dhe liroi një numër të madh muslimanësh të burgosur. Edhe banorët e Bagrasit, kur patën dëgjuar se sulltani ishte nisur në drejtim të tyre, dërguan një person për të kërkuar prej tij që të dërgojë dikë për ta pranuar dorëzimin e qytetit, që ndodhi më 13 Ramazan. Gjatë rrugës u dorëzuan shumë kulla e kala, derisa sulltani hyri si fitimtar në Damask më 27 Ramazan.

Viti 741 hixhri

- Përfundimi i ndërtimit të minares lindore. Përfundimi i punës në ndërtimin e kësaj minareje në Xhaminë Emevite në Damask është bërë në dhjetë ditët e fundit të Ramazanit. Njerëzit e pëlqyen ndërtimin e saj, sa disa thanë se nuk është ndërtuar një e tillë asnjëherë në historinë e Islamit. Madje disa shkuan edhe më larg, duke thënë se kjo është minarja e bardhë e përmendur në hadithin që tregon zbritjen e Isait alejhi selam te minarja lindore e bardhë në Damask, por Allahu e di më së miri këtë.

 

Përktheu: Eroll Rexhepi
8.8.2008
Vazhdon