Pasi ky muaj shquhet si muaji i fitoreve dhe i çlirimeve dhe si muaji i ngjarjeve të mëdha në historinë e fesë islame, e pashë të arsyeshme të cek disa ngjarje që kanë ndodhur në këtë muaj, duke mos u hapur në detajet e tyre shumë.

Disa nga ngjarjet që kanë ndodhur në Ramazan para llogaritjes së kalendarit hixhri janë:

- Ngritja e Isait alejhi selam, birit të Merjemes, në qiell. Kjo duke u bazuar në hadithin që shënon Hakimi në Mustedrek 3/143, i cili transmetohet nga Hurejth ibn Mahshij, ku përmend se Hasen ibn Ali, Allahu qoftë i kënaqur me të, mbajti një ligjëratë në të cilën përmendi karakteristikat e babait të tij (Aliut) pas vrasjes së tij dhe tha: “Është vrarë në të njëjtën natë që ka zbritur Kurani dhe në të njëjtën natë që është ngritur Isai alejhi selam.” Hakimi thotë se ky hadith është i saktë, ndërsa Dhehebiu abstenon për këtë.

-Zbritja e Kuranit, inspirimi i shpalljes dhe fillimi i thirrjes islame Kjo ka ndodhur ditën e hënë. Këtë na e sqaron Kurani, ku Allahu i Lartësuar thotë: “(Ato ditë të numëruara janë) Muaji i Ramazanit, që në të (filloi të) shpallet Kurani, që është udhërrëfyes për njerëz dhe sqarues i rrugës së drejtë dhe dallues (i së vërtetës nga gënjeshtra).” (Bekare, 185)
Për këtë dëshmojnë edhe hadithe të shumta. Zbritja e Kuranit është bërë në Natën e Kadrit. Shiko Siretu ibn Hisham 1/304 dhe Sunen el-kubra të Imam Bejhekiut 4/293.

Fjala “Kadr” do të thotë përcaktim etj. Nata e Kadrit është më e vlefshmja, siç thotë Allahu i Lartësuar: “Nata e Kadrit është më e rëndësishme se një mijë muaj! Me lejen e Zotit të tyre në (atë natë) të zbresin engjëjt dhe shpirti (Xhibrili) për secilën çështje. Ajo (që përcakton Zoti) është paqe deri në agim të mëngjesit.” (El-Kadr, 3-5)

Ndërsa sa i përket datës (së natës së madhe), ka mendime të ndryshme të dijetarëve. Mendimi i shumicës është se ajo është në natën e njëzet e shtatë. Kurse Mubarekfuri në Rehik el-mahtuum thotë se është më 21 Ramazan; ekzistojnë edhe mendime se ajo gjendet në netët tek në dhjetëshin e fundit të Ramazanit, në netët: 21, 23, 25, 27 dhe 29.

- Vdekja e Ebu Talibit, xhaxhai i Pejgamberit alejhi selam, në vitin e dhjetë të shpalljes (shiko Ensab el-eshraf të Beladhiriut 1/406).

- Vdekja e nënës së besimtarëve, Hadixhes radijallahu anha, po ashtu në vitin e dhjetë të shpalljes, pak kohë para hixhretit, përafërsisht tri vjet (shiko Delail en-nubuëeh të Dr Kal’axhij).

Disa ngjarje që kanë ndodhur në Ramazan prej vitit të parë sipas kalendarit hixhri:


• Viti 1 hixhri

- Nisja e ekspeditës “Sejful Bahr” nën udhëheqjen e Hamza ibn Abdul Muttalibit në fillim të Ramazanit, në vitin 623 (shiko Tabekat Ibn Sa’ad 2/6 dhe Siretu ibn Hisham 2/182). Pejgamberi alejhi selam e përgatiti këtë ekspeditë me 30 burra për t’ia prerë rrugën karvanit të kurejshitëve që vinte nga Siria, në të cilin ishte edhe Ebu Xhehli dhe bashkë me të më se treqind veta. Nuk ndodhi luftë mes tyre, por përfundoi me marrëveshje me ndërmjetësimin e Mexhd ibn Amër Xhinijj. Flamuri i parë ishte i Hamzës dhe kishte ngjyrë të bardhë.


• Viti II hixhri

- Beteja e Bedrit, e cila ka ndodhur në ditën e premte më 17 Ramazan. Bedër quhet vendi në të cilin është zhvilluar beteja e njohur mes muslimanëve dhe mushrikëve. Bedri është mes Mekës dhe Medinës. Kjo është fitorja e parë e muslimanëve në betejë kundër jobesimtarëve. Në këtë betejë u vranë 70 mushrikë dhe u robëruan 70 të tjerë. Librat e historisë janë të mbushur me këtë ngjarje, prandaj nuk po shtoj ndonjë referencë të veçantë.

- Vdekja e Ebu Xhehlit, Amër bin Hishamit, Ummejje bin Halefit dhe As bin Hisham bin Mugires (i cili ishte daja i kalifit të muslimanëve Omer ibn Hattabit, Allahu qoftë i kënaqur me të) në këtë betejë dhe hedhja e tyre më pas në një gropë të ndotur. Atyre nuk u bënë dobi idhujt që ata i konsideronin si zota, lati, uz-za, menati etj.

-Vdekja e vajzës së Pejgamberit alejhi selam, Rukijes, e cila ishte gruaja e Uthman ibn Affanit, Allahu qoftë i kënaqur me ta (shiko: Tabekat të Ibn Sa’dit 8/36, El-Istia’ab 4/292 dhe Sireh të Dhehebiut 2/177).


• Viti III hixhri

- Fatimja, vajza e Pejgamberit alejhi selam, lindi të birin e saj, Hasanin. Ai lindi në mes të muajit Ramazan. Fatimja ishte gruaja e Aliut dhe prej tyre lindën Hasani dhe Hyseni, nipat e Pejgamberit alejhi selam (shiko Ta’rih Bagdad 1/140).

- Martesa e Pejgamberit alejhi selam me Zejnebe bint Huzejmen, e cila quhej edhe Umu Mesakinë (nëna e fukarenjve). Zejnebja ka vdekur sa ishte gjallë Pejgamberi alejhi selam dhe nuk qëndroi me të shumë (shiko Tabekat el-Kubra Ibn Sa’ad 8/115).


• Viti V hixhri

- Zbritja e ajeteve kuranore për shfajësimin e Aishes, kënaqësia e Allahut qoftë mbi të dhe babain e saj, nga shpifjet dhe fyerjet që ndodhën ndaj saj gjatë kthimit të tyre nga Beteja e Mustalakut, e cila ishte edhe beteja e Murejsijes. Beteja ndodhi në muajin Shaban, kurse këto ajete zbritën një muaj më vonë, d.m.th. në muajin Ramazan (shiko El-bidajeh uen nihajeh 3/91-92).


• Viti VI hixhri

- Dërgimi i ekspeditës së Abdullah bin Utejkut për vrasjen e Selam bin Ebu Hakikut.

- Dërgimi i ekspeditës së Galib bin Abdullahut për në Mujfea. Kjo është beteja në të cilën Usame bin Zejdi, Allahu qoftë i kënaqur me të, vrau një person pasi ai tha “La ilahe il-lall-llah” (shiko Tabekat Ibn Sa’ad 2/192 dhe El-bidajeh uen nihajeh 4/248).


• Viti VIII hixhri

- Çlirimi i Mekës. Pejgamberi alejhi selam doli nga Medina më 10 Ramazan dhe me vete kishte 10 mijë sahabë (shokë) dhe hyri në Mekë më 19 Ramazan.

- Dërgimi i ekspeditës së Sa’d ibn Zejd Eshhelit për në Menat në gjashtë netët e fundit të Ramazanit.


• Viti IX hixhri

- Kthimi i Pejgamberit alejhi selam nga Beteja e Tebukut, për të cilën kishte dalë në muajin Rexheb. Kjo fushatë zgjati 50 ditë; 20 prej tyre i kaloi në luftë në Tebuk, kurse ditët e tjera i kaloi për të vajtur dhe për t’u kthyer (shiko Rehikul Mahtuum, f. 401).

- Ardhja e delegacionit të Thekifit tek i Dërguari i Allahut për të shpallur pranimin e Islamit.

- Ardhja e deleguarve të mbretërve të Humejrit tek Pejgamberi alejhi selam me shkresat e tyre, të cilët lajmëronin për pranimin e Islamit (shiko Siretu Ibn Hisham 4/249).


• Viti X hixhri

- Ardhja e Xherir ibn Abdullah el-Bexhelit te Pejgamberi alejhi selam duke pranuar Islamin para tij (shiko El Isabeh 2/220).

 

www.saaid.net
Përktheu: Eroll Rexhepi
1.8.2008
Vazhdon