Hadithi i 13-të

Abdullah bin Mesudi, Allahu qoftë i kënaqur me të, thotë se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Nëse jeni tre persona, mos të flasin fshehurazi dy persona, duke përjashtuar njërin, sepse kjo e mërzit atë.” (Shënon Muslimi)

Çfarë përfitohet nga hadithi:
Islami na mëson edukatën e të folurit.
Dy veta nuk duhet të flasin fshehurazi, duke përjashtuar të tretin.
Islami u kushton kujdes ndjenjave të të tjerëve.
Islami ndalon çdo gjë që ndikon për keq në vëllazërinë islame dhe në dobësimin e saj.

Hadithi i 14-të
Abdullah bin Amr bin Asi, Allahu qoftë i kënaqur me të, transmeton se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Musliman i mirëfilltë është ai nga gjuha dhe duart e të cilit janë të sigurt muslimanët e tjerë dhe muhaxhir (i shpërngulur) i mirëfilltë është ai që largohet nga ajo që Allahu e ka ndaluar." (Shënon Buhariu)

Çfarë përfitohet nga hadithi:
Islami është fe e paqes dhe sigurisë.
Islami e ndalon dëmtimin e njerëzve me çdo lloj forme.
Muslimani nuk i bezdis muslimanët dhe nuk lejon dëmtimin e tyre.
Islami inkurajon për largimin nga ndalesat e Allahut të Lartësuar.
Muslimanin prej të cilit janë të sigurt muslimanët e tjerë Islami e konsideron si muhaxhiri për sa i përket shpërblimit.

Hadithi i 15-të
Ebu Hurejra, Allahu qoftë i kënaqur me të, thotë se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Personi është në fenë e shokut të tij. Pra, secili nga ju duhet të kujdeset për çështjen se kë shoqëron ai.” (Shënon Ahmedi)

Çfarë përfitohet nga hadithi:
Islami nxit për përzgjedhjen e shokëve.
Shoku ka ndikim te shoku i vet.
Muslimani patjetër duhet të kujdeset për korrektësinë dhe fenë e vet dhe kjo mund të arrihet vetëm me përkujdesjen se me kë shoqërohet.
 

Përgatiti: Almedin Ejupi
26.10.2007