Hadithi i katërt

Ebu Mes’ud el Ensarij, Allahu qoftë i kënaqur me të, rrëfen duke thënë: “Erdhi një njeri tek i Dërguari i Allahut, lavdërimi dhe shpëtimi i Allahut qoftë mbi të, dhe i tha: “M’u ndërpre udha (ngase i kishte ngordhur kafsha), prandaj më mbart.” Ai i tha: “S’kam gjë.” Atëherë njëri tha: “O i Dërguar i Allahut, unë e udhëzoj tek i cili do ta mbartë.” I Dërguari i Allahut tha: “Kush udhëzon për një vepër të mirë, ai ka shpërblim si të atij që vepron.” (Shënon Muslimi)

Çfarë përfitohet nga hadithi:

Thirrja (da’veti) është prej formave të përhapjes së Islamit.
I Dërguari i Allahut ishte prej thirrësve në rrugën e Allahut.
Islami nxit për thirrje për në rrugën e Allahut.
Ai që fton të tjerët, ka shpërblim të madh tek Allahu.


Hadithi i pestë

Ebu Hurejra, Allahu qoftë i kënaqur me të, thotë se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Nuk është i fuqishëm ai që ngadhënjen në mundje, por ai që përmban veten kur hidhërohet." (Shënon Buhariu dhe Muslimi)

Çfarë përfitohet nga hadithi:

-Islami thërret për përmbajtjen e vetes.
-Islami përmbajtjen e vetes e konsideron fuqi, veprim për të cilin njeriu lavdërohet.
-Hidhërimi është një virtyt jo i lavdërueshëm.


Hadithi i gjashtë

Xherir bin Abdullahu, Allahu qoftë i kënaqur me të, transmeton se i Dërguari i Allahut, lavdërimi dhe shpëtimi i Allahut qoftë mbi të, ka thënë: “Allahu nuk e mëshiron atë që nuk ka mëshirë ndaj njerëzve.” (Shënon Buhariu)

Çfarë përfitohet nga hadithi:
- Mëshira është një veti që e do Allahu i Lartësuar.
- Islami nxit për mëshirë.
- Mëshira ndaj njerëzve konsiderohet prej shkaqeve të mëshirës së Allahut.
- Shpërblimi është nga lloji i punës.
 

Përgatiti: Almedin Ejupi
5.10.2007