Shënimet e mbajtura mbi fjalët dhe veprat e Profetit Muhamed (alejhi selam) janë quajtur hadith. Disa dijetarë kanë përfshirë dhe thëniet e fjalët e shokëve të Profetit (alejhi selam) në hadith.

Hadithi paraqet shënime nga burime bazë të Islamit, duke na dhënë ne të dhëna të plota rreth jetës së profetit. Gjithashtu, shërben edhe si komentues i Kuranit. Kurani paraqet bazën e besimit, ndërsa hadithi na pajis ne me shpjegimet dhe detajet e nevojshme. Kështu, Kurani dhe hadithi janë plotësues të njëri-tjetrit. Të dyja janë esenciale për themelimin e besimit.
Këto janë disa thënie të Profetit Muhamed (alejhi selam) për:

-nënën: “Xheneti shtrihet në këmbët e nënës tënde.” (Nesai)

-babain: “Kënaqësia e babait është në kënaqësinë e Allahut dhe pakënaqësia e babait është pakënaqësia e Allahut.” (Tirmidhiu)

-adhuruesit: “Çelësi i xhenetit është namazi, ndërsa çelësi i namazit është pastërtia.”  (Mishkat)

-mysafirët: “Kush beson në Allahun dhe në Ditën e Fundit le të nderojë mysafirin e tij.” (Buhariu)

- fqinjët: “Për Allahun, nuk ka besim, nuk ka besim, nuk ka besim, ai fqinjët  të cilit nuk janë të sigurt prej ligësisë së tij.” (Buhariu)

-modestinë: “Modestia është pjesë e besimit.” (Buhariu dhe Muslimi)

-bamirësinë: “Të heqësh gjëra të dëmshme nga rruga është bamirësi.” (Buhariu)

-të mësuarit: “Më i miri prej jush është ai që e mësoi Kuranin dhe ua mësoi atë të tjerëve.” (Buhariu)

-dijen: “Kërkimi i dijes është detyrë për çdo musliman e muslimane.” (Mishkat)

-mirësinë: “Allahu nuk është i mirë me atë që nuk është i mirë me njerëzit.” (Buhariu dhe Muslimi)

-falënderimin: “Ai që nuk falënderon njerëzit, nuk falënderon Allahun. (Tirmidhiu)

-vizitën e të sëmurëve: “Vizito të sëmurin, ushqe të uriturin dhe liro të kapurin!” (Buhariu)

Përgatiti: Manjola Tafa

26.08.2006