Allahu thotë: “Nëse dy grupe besimtarësh tentojnë të luftojnë ndërmjet vete, ju pajtoni ata, e në qoftë se ndonjërin prej tyre e sulmon tjetrin, atëherë luftojeni atë grup që vërsulet me pa të drejtë, derisa t'i bindet udhëzimit të Allahut, e nëse ktheheni, atëherë me drejtësi bëni pajtimin ndërmjet tyre, mbani drejtësinë se vërtet Allahu i do të drejtët.”

Shkaku i zbritjes së këtij ajeti

Për shkakun e zbritjes së këtij ajeti dijetarët kanë përmend një hadith nga Enes ibën Malik, i cili thotë se i ka thënë Pejgamberit: “O i Dërguari i Allahut, sikur të vish te Abdullah bin Ubej! I hipi Pejgamberi gomarit dhe me të shkuan edhe disa muslimanë tek Abdullah ibën Ubej. Kur erdhi Pejgamberi tek ai, i tha Abdullah ibën Ubej: ‘Largohu nga unë se nuk duroj dot erën e gomarit tënd.’ Një njeri prej ensarve tha: ‘Vallahi, era e nevojës së gomarit të Pejgamberit është  më e mirë se era jote.’ Një njeri prej popullit të Abdullah ibën Ubej u hidhërua dhe filluan t’i gjuanin njëri-tjetrit me duar, nalle dhe lëvore të palmës dhe Enesi tha: Pastaj na ka mbërritur lajmi se ky ajet ka zbritur për këtë.”

Ndërsa Muxhahidi ka thënë: “Ky ajet ka zbrit për Eusin dhe Hazrexhin, këto dy lagje të Medinës filluan t’i sjellin njëri-tjetrit me shkopinj dhe nalle dhe pastaj zbriti ky ajet.

Dobitë e këtij Ajeti

1. Lufta në mes të muslimanëve ka mundësi të ndodhë.

2. Mëkatet sado të mëdha të jenë nuk e nxjerrin njeriun prej imanit.

3. Urdhërimi për përmirësim mes dy të hasmëve.

4. Ndalimi i tejkalimit të kufijve.

5. Luftimi i atij grupi që tejkalon kufijtë, gjersa të kthehet në çështjen e Allahut.

6. Domosdoshmëria e pajtimit mes dy hasmëve me drejtësi.

7. Vërtetimi i dashurisë së Allahut ndaj të drejtëve.

8. Nxitja për drejtësi.

Përgatiti: Shaban Murati

18.11.2006