Pyetja:

A lejohet operacioni plastik në lëkurë në rastin kur kemi pësuar ndonjë djegie? Allahu jua shpërbleftë!

Përgjigja:

Falënderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit

Operacionet plastike për zbukurim në Islam nuk janë të gjitha të lejuara, por disa prej tyre lejohen me kusht që të kihen parasysh disa gjëra. Fukahatë bashkohorë[1] kur flasin për këtë çështje thonë se operacionet plastike klasifikohen në dy lloje:

1. Operacione plastike me qëllim të mënjanimit të ndonjë mangësie apo të mete e cila është shkaktuar nga aksidentet gjatë jetës (ndeshje, djegie, apo ndonjë formë tjetër), apo me qëllim të mënjanimit të të metave me të cilat ka lindur njeriu, si heqja e gishtit të gjashtë nga duart apo këmbët, apo ndonjë shëmtim në fytyrë apo trup.

Ky lloj është i lejuar dhe në të nuk ka asnjë pengesë. Argument për këtë kemi rastin kur Resulullahu (salallahu alejhi ue selem) i lejoi një sahabi që e kishte humbur hundën në luftë ta zëvendësojë atë nga ari. (Transmeton: Ebu Davudi, Nesaiu, Ahmedi, Tirmidhiu)  

2. Operacion plastik me qëllim të shtimit të zbukurimit, pra nuk është për të mënjanuar të metat, por për të shtuar bukurinë edhe më shumë. Si ndërhyrja me operacion në fytyrë me qëllim të zbukurimit, bërja operacion e gjoksit për ta shtuar estetiken e tyre, ndryshimin e ngjyrës së trupit, etj.

Ky lloj është i ndaluar, pasi Profeti (Bekimi dhe paqja qofshin mbi të!) i ka mallkuar ato që i shkulin vetullat, vendosin në flokë të tyre flokë artificial (si paruke) dhe ato që bëjnë në trupin e tyre tatuazhe (tatu). (Transmeton Muslimi)

Ky lloj i zbukurimit është luks dhe në të nuk ka mënjanim të të metës, prandaj edhe është e ndaluar. Allahu e di më së miri.

Alaudin Abazi

29.07.2006