Pyetja:

Jam një student nga Shqipëria dhe studioj në Malajzi. Kam një shok nga Burma (shtet aziatik) që e kam njohur këtu në Malajzi. Feja e tij është budizmi. Desha t’ju pyes: a është e lejuar për ne muslimanët që të bëjmë dua për njerëzit që nuk kanë fenë tonë? Doja të bëja një dua tek Allahu për këtë person, së pari që ai inshallah të konvertohet në Islam dhe së dyti, një dua për këtë person se ai kohët e fundit ka shumë probleme financiare (biznesi nuk po i ecen fare). Ai ka dhe probleme të tjera si të gjithë personat që janë jashtë shtetit. Pra, desha të di: a mund të bëj një dua për të për këto gjëra që përmenda më sipër? Lus që Allahu ta bekojë të gjithë ymetin musliman kudo që ndodhen! Ju faleminderit shumë dhe ju uroj që Allahu t’ju bekojë për punën që po bëni!

Përgjigja:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Lutja e besimtarit që jomuslimani të udhëzohet, nuk ka dyshim se është e lejuar. Për këtë kemi argumente të shumta nga Profeti (salallahu alejhi ue selem), ku ai i drejtohej Allahut të Lartësuar që të udhëzojë qoftë një person të caktuar, siç është rasti ku ai bënte dua që ta udhëzojë Umerin, apo një grup të mushrikëve, siç është rasti kur ai luste Allahun e Lartësuar ta udhëzojë popullin e Mekës që ishin mushrikë. Prandaj edhe Imam Buhariu në “Sahihun” e tij e ka një kapitull të quajtur: “Kapitulli i lutjës për mushrikët që të udhëzohen” dhe i përmend hadithet që aludojnë në këtë.

Kurse bërja e lutjes për ta që Allahu t`i mëshirojë, apo t`ua falë gabimet, nuk lejohet vetëm se pasi të udhëzohen kurse më herët jo.

Transmetohet se çifutët qëllimisht tështinin në prezencë të Resulullahut (salallahu alejhi ue selem) me shpresë se ai do t`u thotë atyre: “Jerhamukallah”- “Allahu ju mëshiroftë!” (të lutet për ta për mëshirë), por Profeti (salallahu alejhi ue selem) u thoshte: “Jehdikumullah”- “Allahu ju udhëzoftë!” (Transmeton Ahmedi dhe Tirmidhiu)

Gjithashtu, nuk lejohet lutja për ta edhe pas vdekjes. Allahu i Lartësuar thotë: “Nuk është e drejtë për Pejgamberin e as për besimtarët të kërkojnë falje për idhujtarët, edhe nëse janë të afërt të tyre, pasi që ta kenë të qartë se me të vërtet ata (idhujtarët) janë banues të xhehenemit.” (Teube, 113)

Kurse sa i përket pytjës tënde konkrete për ta lutur Allahun e Lartësuar që ta përmirësojë gjendjen e jobesimtarit në këtë botë, themi se nga ajo që u tha më lartë nënkuptohet se ajo është e ndaluar, pasi edhe ky përmirësim është lloj i kërkimit të mëshirës për të. Por ju mund të bëni dua për të që Allahu ta udhëzojë atë në rrugë të drejtë dhe përmirësimi i gjendjes së tij të jetë pas udhëzimit të tij. Allahu e di më së miri.

Alaudin Abazi

12.05.2006