Pyetja:

A është mëkat të kërkosh ndihma nga kisha? Jetojmë jasht dhe nganjëherë marrim ndihma në vleftë çeku nga pak.  A është mëkat për këtë? Edhe më parë kemi marrë ndihma me çek në vleftë në një shumë e për festë të jomuslimanëve, por kam vendosur që kete çek mos ta marr më, sepse kam lexuar përmes netit se është mëkat i madh të imitojmë popullin jobesimtar apo të pranojmë dhurata prej tyre. Ju lutem me tregoni, Allahu ju ndihmoftë, për këta çekë në ndihma për harxh, a është mëkat?

Përgjigja:

Falenderimet i takojnë Allahut, paqja dhe bekimet e Tij qofshim mbi të dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.

Fillimisht, dëshirojmë të cekim këtu çështjen se te dijetarët bashkohorë është diskutueshme kërkimi i azilit politik në vendet perëndimore, pasi fondet e shteteve që lejojnë këtë ndihmohen nga kishat, pastaj me këtë ti pranon dhe u afrohesh jobesimtarve dhe kjo është pjesë e dashurisë së ndaluar (el uela) ndaj tyre. Pastaj  muslimani urdhërohet të bëj hixhret (emigrojë) nga vendi i jobesimtarve në vendin e muslimanëve, kurse me këtë bëhet e kundërta.

Sido që të jetë, mendimi më i shëndosh në këtë është se ajo lejohet në rast të domosdoshmërisë dhe nevojës që kërkohet, posaçërisht nëse kemi parasysh rrethanat që kanë qenë në kohën kur kjo formë e emigrimit te ne ishte prezente. Argument për këtë është rasti i hixhretit të shokëve të Profetit (salallahu alejhi ue selem) për në Etiopi (Abisini) te të krishterët. I Dërguari i Allahut (Paqja dhe bekimi i Allahut qofshin mbi të!) i urdhëroi të shkojnë muslimanët dhe të kërkojnë strehim te të krishterët, pasi ishte e pamundur jeta në Mekë. Kurse për marrjen e ushqimit apo ndihmave nga të krishterët apo kishat parimisht është e lejuar, pasi kjo nënkuptohet nga rasti i hixhretit për në Etiopi, pasi ata kanë përfituar nga ato gjëra që u ka ofruar Nexhashiu, i cili më vonë pranon Islamin. Por duhet të kemi parasysh të mos jetë në llogari të ndonjë gjëje që ata kërkojnë nga ne, qoftë edhe vetëm prezentimi në ritet e tyre fetare si shikues.

Pra, pranimi i ndihmave nga krishterët lejohet, nëse nuk janë me ndonjë preteks apo qëllimkeq.

Kurse pranimi i dhuratave gjatë festave të tyre, shejhul Islam Ibën Tejmije mjaft mirë e sqaron këtë çështje në librin e tij të njohur “Iktida sirati mustekim” dhe tregon se ato lejohen në përgjithësi, qoftë nga gjërat apo ushqimet, përveç mishit që therret (kafshëve) për këtë festë. Për këtë se lejohet argumenton me disa argumente ndër to edhe me lejimin e Aishes, e cila është pyetur për dhuratat që i pranojnë muslimanët gjatë festave të jobesimtarve. Ajo është përgjigjur se lejohet t`i pranojmë përveç atyre mishrave që theren dhe përgatiten për këtë festë. Allahu e di më së miri.

Alaudin Abazi

02.06.2006