Lumturia e këtij djaloshi ishte shumë e madhe kur një kompani e njohur e pranoi që të punonte për të. Ai ishte shumë i lumtur, pasi ishte kandidati i vetëm i pranuar. Ai nënshkroi kontratën, e cila thoshte se ai duhet të pajtohej me respektimin e orëve punuese të kompanisë, të dorëzonte raportet javore rreth punës dhe aktiviteteve të tij dhe të pranonte që të ndëshkohej për çdo shkelje të rregullave.
Pas një kohe (të shkurtër), djaloshi e takoi udhëheqësin e tij dhe i tha: “Prej nesër e tutje nuk do të vij me kohë. Dhe gjithashtu nuk do t’i dorëzoj në kohë raportet e mia javore; në vend të kësaj ato do të vonohen për pak kohë. Pavarësisht nga kjo, nuk do t’ju lejoj të më dënoni dhe ju nuk keni të drejtë të më pushoni nga puna”.
Nëse ne imagjinojmë një situatë të tillë, do të qeshim me sjelljen e këtij djaloshi. Askush nuk do ta shohë ndryshe vetëm se si të çmendur dhe njeri budalla. Si mund të vijë dikush dhe të kërkojë të drejtat e tij kur nuk i kryen obligimet e tij?!
Prandaj, pse shumica prej nesh e bëjnë të njëjtin veprim të çuditshëm apo edhe më keq se ky? (Si rrjedhojë ne kryejmë një mëkat më të madh kundër Ligjit të Allahut të Plotfuqishëm) Si mundet një njeri i shëndoshë mendërisht ta lejojë veten e tij t’i gëzojë të gjitha nderet e Allahut, siç janë ushqimi, pija, rrobat dhe kënaqësitë e jetës, ndërsa ai nuk i ofron Allahut obligimin më të thjeshtë që Ai e detyroi atë ta bëjë, të falet?!
Madje edhe nëse falet, atëherë ai nuk falet me kohë ose falet si gjel (d.m.th. falet me shumë nxitim dhe pakujdesi). Veprat e tij nuk pajtohen me namazin e tij dhe ai nuk e kupton se çfarë thotë.
Sipas anketës me vizitorët e web sajtit tonë në seksionin arabisht të IslamWay.com, që përfshinte më shumë se 4000 persona:
14% prej tyre kurrë nuk e falin sabahun në kohën e tij
16% prej tyre rrallë e falin sabahun në kohën e tij
33% prej tyre shpesh e falin sabahun në kohën e tij
35% gjithmonë e falin sabahun në kohën e tij
I lartësuar qoftë Allahu! Ne nuk jemi duke folur për jurisprudencën rreth së cilës dijetarët nuk pajtohen apo qoftë një sunet për të cilin kemi zgjedhje ta bëjmë apo jo. Jemi duke folur për ABC-në e Islamit. Jemi duke folur për namazin, të cilin Allahu i Plotfuqishëm ua ka obliguar të gjithë muslimanëve – pa marrë parasysh cilat janë kushtet e tyre. Kur Allahu i Plotfuqishëm i urdhëroi muslimanët të falen, Ai i paralajmëroi ata të cilët e vonojnë faljen pas kohës së përcaktuar, duke thënë:
“Mjerë për ata të cilët falen, të cilët ndaj namazit të tyre janë të pakujdesshëm.” (Sure Maun: 4-5)
Komentuesit thonë se ajo që nënkuptohet prej këtij ajeti është falja pas kohës së caktuar. Ata gjithashtu kanë thënë: “Mjerë” është një luginë shumë e thellë e zezë në xhehenem. A nuk besojmë në fjalët e Allahut?
Shumë prej muslimanëve në ditët e sotme e neglizhojnë faljen e sabahut sikur se ai (namazi) nuk vlen për ta. Kjo është pse ata e falin atë më vonë se koha e tij. Bile, disa prej tyre e falin atë pak para namazit të drekës. Të tjerët ndoshta nuk e falin kurrë, madje as për kompensim (kaza). Atëherë pse gjithë kjo përtaci përballë asaj që meriton Allahu i Plotfuqishëm? A nuk predikojmë se e duam Allahun e Plotfuqishëm më shumë se çdo gjë tjetër? Nëse ndonjëri prej nesh e do dikë me një dashuri të vërtetë, ai do të jetë i gatshëm për ta takuar atë. Ai mund të jetë duke menduar për të shumicën e kohës. Nëse ai ka një takim me të, ai NUK mund të flejë derisa ta takojë atë që e do. Pra, ata falës përtacë, të cilët nuk e falin namazin e sabahut, a e duan me të vërtetë Allahun? A i respektojnë me të vërtetë urdhrat e Tij? A janë të përmalluar për ta takuar Atë?
Le të paramendojmë se një multimilioner i ofron njërit prej punëtorëve të tij çdo ditë nga 1000$ vetëm me një kusht, që punëtori duhet të shkojë çdo ditë në mëngjes në shtëpinë e punëdhënësit të tij për ta zgjuar atë dhe pastaj të largohet. Një detyrë kaq e thjeshtë mund t’i marrë punëtorit vetëm 10 minuta. Kjo ofertë jashtëzakonisht bujare do të jetë e vlefshme përderisa punëtori vazhdon ta thërrasë punëdhënësin rregullisht. Në të kundërt, do të ndërpritet përgjithmonë dhe punëdhënësi do t’i kërkojë t’ia kthejë të gjitha paratë që ka marrë, nëse ai nuk kujdeset ta thërrasë punëdhënësin e tij ndonjëherë pa asnjë shfajësim.
Kështu, nëse ti, vëlla musliman, do të ishe ai punëtor, a do ta neglizhoje thirrjen në shtëpinë e punëdhënësit tënd? A nuk do të kujdeseshe për ta zgjuar çdo ditë për t’i marrë një mijë dollarë? Bile nëse një mëngjes do të dështoje – a nuk do të përpiqeshe me të gjitha mënyrat të dëshmosh se me të vërtetë nuk ishe i aftë për t’u zgjuar?
Allahut i takon shembulli më i lartë, po çfarë do të bëje vëllai im i dashur në drejtim të Zotit tënd, Allahut të Plotfuqishëm? Ai është i Vetmi i Cili të jep mënyrat e tua të të jetuarit dhe i Cili të nderoi me çdo gjë, të mirat e të Cilit janë plotësisht më shumë se milionat e përditshme të dollarëve. Ai është i Cili thotë:
“…po të përpiqesh për t’i numëruar të mirat e Allahut, nuk do të mundesh (do të dështosh)…” (Sure Ibrahim: 34)
A nuk e meriton ky Zot, i Gjithëmëshirshmi, Bujari, që të zgjohesh për Të çdo mëngjes rreth orës 5.30 për ta falënderuar Atë vetëm 5 ose 10 minuta për të mirat e Tij të mëdha dhe dhuratat e Tij bujare?!

Gjykimi ndaj atyre të cilët e neglizhojnë faljen e namazit të sabahut në kohë

Allahu i Plotfuqishëm thotë: "...namazi është obligim (për kohë) i caktuar për besimtarët." (Nisa: 103)
Islami është një mënyrë gjithëpërfshirëse e jetës... është si një marrëveshje midis Zotit të Lartë dhe robërve të Tij të përulur. Në pajtueshmëri me këtë marrëveshje, robi zotohet për t'i kryer obligimet para Allahut. Me respektimin e këtyre obligimeve, Allahu do t'i japë robit të drejta dhe privilegje. Është e pandjeshme që ti të pajtohesh me këtë marrëveshje, pastaj bën çfarë dëshiron dhe lë anash çfarë dëshiron. Allahu i Plotfuqishëm thotë në Kuran:
"O ju që besuat, hyni në islamizmin e tërësishëm (përqafoni fenë islame në tërësi), e mos ndiqni rrugën e djallit, sepse ai është armik i juaji i hapët." (Bekare: 208)
Komentuesit thonë: Kjo nënkupton të pranosh Islamin me gjithë legjislaturën dhe rregullat. Allahu ishte hidhëruar me popullin e Israilit kur ata praktikuan çfarë u pëlqente prej Fesë së Tij dhe e neglizhonin pjesën tjetër. Për këtë Ai u adresoi atyre thënien:
"... A e besoni një pjesë të librit, e tjetrën e mohoni ? Ç'mund të jetë ndëshkimi ndaj atij që punon ashtu prej jush, pos poshtërim në jetën e kësaj bote, e në Ditën e Gjykimit ata hidhen në dënimin më të ashpër. Allahu nuk është i pakujdesshëm ndaj asaj që veproni ju." (Bekare: 85)
Për sa i përket përpikërisë në orar, ajo është e kërkuar. I Dërguari i Allahut (paqja qoftë mbi të) i shihte ata të cilët nuk kujdesen për kryerjen e namazit të sabahut dhe jacisë me xhemat si hipokritë të qartë "munafikun". Pra çfarë mendon për ata të cilët nuk e falin fare sabahun, as me xhemat e as vetëm (në shtëpi)?
I Dërguari i Allahut (paqja qoftë mbi të) ka thënë: "Nuk ka namaz më të vështirë për hipokritët sesa sabahu dhe jacia. Dhe sikur ta dinin se çfarë ka në to (të mira, shpërblim, sevape) do t'i falnin ato qoftë edhe duke ardhur zvarrë." (Transmeton Buhariu)
Allahu i Plotfuqishëm përmend se Ai i shkëput lidhjet me secilin që neglizhon namazin e obliguar. Përveç kësaj, i Dërguari i Allahut (paqja qoftë mbi të) ka thënë: "Kurrë mos e lë namazin me qëllim, sepse kushdo që bën ashtu është i refuzuar nga Allahu dhe i Dërguari i Tij." (Transmeton imam Ahmedi)
Pra, a dëshiron o vëlla dhe motër muslimane, që më i afërmi për ty të të refuzojë? Atëherë si e neglizhon namazin dhe i jep shkak Allahut që të të refuzojë?

Pra...çfarë duhet të bëj unë tani?

• Çdonjëri prej nesh duhet të rregullojë një orë me alarm për t'u zgjuar çdo ditë për namazin e sabahut.
• Ne duhet t'i japim namazit vendin e tij në jetën tonë dhe duhet t’i rregullojmë punët tona në pajtim me kohët e rregullta të namazit. (Fatkeqësisht ne bëjmë pikërisht të kundërtën!)
• Ne duhet të flemë herët dhe të zgjohemi për sabah dhe pastaj të shkojmë në punë. Menjëherë pas sabahut, Allahu u shpërndan njerëzve furnizimin.
• Secili prej nesh duhet të kërkojë një shoqëri të mirë, e cila do ta zgjojë atë për namazin e sabahut. Për më tepër, ata duhet ta ndihmojnë domosdo për ta mbështetur në një punë të tillë aq të mirë.
• Ne duhet të vazhdojmë të themi lutjet e natës (të cilat i themi para se të biem për të fjetur) duke e lutur Allahun të na ndihmojë të kryejmë namazin.
• Të ndihemi fajtorë nëse na ikën qoftë edhe një namaz i vetëm obligativ. Për më tepër, duhet të betohemi që kurrë të mos e përsërisim këtë mëkat të madh.

Na bëftë Allahu prej atyre që vërtetë e duan Atë! Na dhëntë sinqeritet në fjalë dhe vepra (Amin)! Në fund, çfarë është e drejtë (saktë) në këtë artikull është dhuratë prej Allahut dhe çfarëdo gabimi apo lëshimi është prej meje apo shejtanit.

Marrë nga islamway.com
Përktheu dhe përshtati: Besnik Abrashi
17.8.2007