Mbulesa (hixhabi) për gruan
 

Pyetja:

Përse Islami e degradon gruan duke e mbajtur atë nën mbulesë?

Përgjigja:

Pozita e gruas në Islam në të shumtën e rasteve është objekt i sulmeve nëpër media laike (jofetare). ‘Hixhabi’1 apo veshja islame nga shumë njerëz tregohet si një shembull i nënshtrimit të gruas në ligjin islam. Para se t’i analizojmë shkaqet pas urdhrit fetar të hixhabit (mbulesës), me lejoni që t’i hedhim dritë studimit të pozitës së gruas në shoqëritë paraislame.

1. Në të kaluarën gratë konsideroheshin shkalla më e ulët e njerëzisë dhe shfrytëzoheshin vetëm si objekt epshi

Shembujt vijues nga historia janë të shumtë për të treguar faktet dhe realitetin se pozita e gruas në qytetërimet e hershme ishte shumë e ulët, deri në atë masë saqë u mohohej dinjiteti i tyre njerëzor.

A. Qytetërimi babilonas

Sipas se drejtës babilonase, gruaja ishte shumë e ulët, ndaj dhe i mohoheshin të gjitha të drejtat njerëzore. Po që se burri vriste ndonjë grua, në vend që të merrte ndëshkimin për krimin e kryer, gruaja e tij ishte ajo që do të vritej në vend të tij.

B. Qytetërimi grek

Qytetërimi grek konsiderohet ndër sistemet më të shkëlqyeshme dhe më të famshme  të të gjitha qytetërimeve antike. Sipas këtij sistemi shumë të ‘famshëm’, gruas i merreshin me forcë të gjitha të drejtat dhe atë e shikonin me përçmim dhe të nënçmuar

Në mitologjinë greke, një ‘grua e imagjinuar’ me emrin ‘Pandora’ ishte shkaktare për fatkeqësinë e qenieve njerëzore. Grekët gruan e konsideronin më të ulët se qenia njerëzore si dhe më të dobët se mashkulli. Megjithëse dëlirësia e grave ishte e çmuar dhe gratë qenë mbajtur dhe nderuar aq shumë, më vonë ata u mposhtën nga egoizmi dhe çoroditjet e tyre seksuale. Për më tepër, prostitucioni u bë një praktikë e rregullt në mesin e të gjitha klasave të shoqërisë greke.

C. Qytetërimi romak

Kur qytetërimi romak ishte në kulm të ‘lavdisë’ së saj, një njeri zotëronte edhe të drejtën për t’i marrë jetën gruas së tij. Lakuriqësia dhe prostitucioni ishin të zakonshme në mesin e romakëve.

Ç. Qytetërimi egjiptian

Egjiptianët gruan e konsideronin si diçka të keqe dhe si një shenjë e djallit.

D. Arabia para ardhjes së Islamit
Para se Islami të përhapej në vendet arabe, arabët e shikonin gruan si të ulët dhe të nënçmuar. Në shumicën e rasteve, kur fëmija i lindur ishte vajzë,  varrosej për së gjalli.

1. Feja islame u dha grave pozitë të lartë e barazi dhe shpreson që ato ta ruajnë statusin që u dhuroi  

Nuk ka dyshim se Islami e lartësoi statusin e gruas duke i dhuruar të drejtat e tyre qysh para 1400 vitesh. Islami pret nga gratë që ta mbrojnë pozitën që ua dhuroi ky din.

Mbulesa për burrat
Njerëzit në shumicën e rasteve çështjen e ‘hixhabit’ e diskutojnë vetëm në kontekstin e gruas. Sido që të jetë, në Kuranin Famëlartë, Allahu i Madhërishëm, fillimisht ka përmendur hixhabit – mbulesën – për mashkullin, para përmendjes së mbulesës së gruas. Allahu Fuqiplotë, në suren Nur, thotë: “Thuaju besimtarëve të ndalin shikimet (prej haramit), t’i ruajnë pjesët e turpshme të trupit të tyre se kjo është më e pastër për ta. Allahu është i njohur hollësisht për atë që bëjnë ata.”2

Në momentin kur një burrë shikon një grua dhe nëse ndonjë mendim i paturpshëm dhe i pacipë i vjen si rezultat i shikimit, atëherë nga ai kërkohet që sa më parë ta ulë shikimin e tij.

Mbulesa (hixhabi) për gratë

Ajeti tjetër i sures Nur thotë: “Thuaju edhe besimtareve të ndalin shikimet e tyre, t’i ruajnë pjesët e turpshme të trupit të tyre, të mos zbulojnë stolitë e tyre përveç atyre që janë të dukshme, le të venë shamitë mbi kraharorin e tyre dhe të mos ua tregojnë bukuritë e tyre askujt përveç burrave të vet, baballarëve të vet ose baballarëve të burrave të vet, djemve të vet ose djemve të burrave të vet, vëllezërve të vet ose djemve të vëllezërve të vet, apo djemve të motrave të veta, ose grave të tyre (që u përmendën) dhe robëreshave, të cilat i kanë në pronësinë e tyre, ose shërbëtorëve nga meshkujt të cilët nuk ndiejnë nevojë për femrat ose fëmijët që nuk e kanë arritur pjekurinë për gra. Le të mos kërcasin me këmbët e tyre për ta zbuluar fshehtësinë nga stolitë e tyre. Pendohuni të gjithë te Allahu, o besimtarë, në mënyrë që të gjeni shpëtim.”3

3. Gjashtë kriteret e mbulesës

Mbështetur në Kuran dhe në traditën e Pejgamberit alejhi selam, ekzistojnë gjashtë kritere, të cilat duhen zbatuar gjatë mbajtjes së mbulesës –hixhabit. Ato janë:

1. Pjesa e trupit që duhet mbuluar

Kriteri i parë ka të bëjë me pjesët e trupit të cilat doemos duhen mbuluar. Kjo dallon si për burrat edhe për gratë. Sipërfaqja e pjesëve të cilat gjithsesi duhen mbuluar tek meshkujt fillon nga kërthiza deri te gjunjët. Për sa u përket grave, ato janë të obliguara të mbulojnë tërë trupin, përveç fytyrës dhe duarve deri te kyçi i dorës. Mirëpo po që se dëshirojnë, ato mund t’i mbulojnë edhe pjesët e sipërpërmendura. Disa dijetarë, studiues, të Islamit, këmbëngulin që fytyra dhe duart janë pjesë përbërëse dhe duhen mbuluar gjithsesi. Pesë kriteret e tjera të mbetura janë të njëjta si për burrat edhe për gratë.

2. Rrobat e veshura nuk duhet të jenë të ngushta, ato duhet të jenë të gjera apo të lëshuara dhe nuk lejohet që të vizatohen pjesët e trupit.

3. Rrobat nuk duhet të jenë të tejdukshme, saqë ndokush mund të shikojë përmes tyre organet e turpshme.

4. Veshjet nuk duhet të jenë magjepsëse, të cilat tërheqin gjininë e kundërt.

 5. Rrobat nuk duhet të jenë të ngjashme me ato të meshkujve.

6. Rrobat (veshja) nuk duhet t’u përngjajë jobesimtarëve, p.sh; nuk duhen veshur rroba, të cilat paraqesin identitetin ose simbolet e feve të jobesimtarëve.

Mbulesa në vetvete përmban sjelljet dhe moralin e mirë 

Mbulesa e kompletuar, krahas gjashtë kritereve të rrobave, përfshin edhe moralin dhe sjelljet e mira, mënyrën e të vepruarit, qëndrimet dhe synimet e individit. Personi i cili ka përmbushur vetëm kriterin e ‘hixhabit’, d.m.th. vetë mbulesën, vazhdon ta zbatojë atë me një kuptim dhe arsye të limituar. ‘Mbulesa’ e rrobave duhet të shoqërohet së bashku me ‘mbulesën’ e syve, ‘mbulesën’ e zemrës, ‘mbulesën’ e të menduarit dhe ‘mbulesën’ e qëllimeve. Ajo gjithashtu përfshin mënyrën se si ecën një individ, mënyrën e të folurit të tij si dhe sjelljet dhe moralin e tij, etj.

4. Mbulesa të mbron nga ngacmimet 

Arsyeja përse mbulesa është bërë obligim i domosdoshëm për gratë më se
 miri e përshkruan Kurani në ajetet kuranore të sures el-Ahzab: "O ti Pejgamber, thuaju grave të tua, bijave të tua dhe grave të besimtarëve le t’i vënë shamitë (mbulojë) e veta mbi trupin e tyre, pse kjo është më afër që ato të njihen (se nuk janë rrugaçe) e të mos ofendohen. Allahu fal gabimet e kaluara, Ai është mëshirues."4

 Kurani për mbulesën thotë se ajo është e detyrueshme për gruan, kështu që të njihen ato si gra modeste dhe kjo gjithashtu do t’i mbrojë nga ngacmimet e meshkujve.

5. Shembujt me dy motra binjake

Të supozojmë dy motra, të cilat janë binjake dhe nga bukuria janë të barabarta. Nëse ju jeni duke ecur rrugës, do të shikoni se njëra prej tyre është e mbuluar me veshje islame, i tërë trupi i saj është i mbuluar, përveç fytyrës dhe shuplakave të duarve, kurse motra tjetër është e veshur në stilin evropian të rrobave; me minifund ose pantallona të shkurtra. Atje në qoshe të rrugës pret një rrugaç ose kopuk për të ngacmuar ndonjë vajzë. Cilën vajzë do të kishte ngacmuar ai? Vajzën e mbuluar me hixhab apo vajzën e veshur me minifund? Natyrisht që ai do të kishte ngacmuar vajzën e veshur me minifund. Të tilla veshje janë ftesë indirekte për gjininë e kundërt; ftesë për bezdisje e ngacmim. Ndaj dhe Kurani në mënyrë të drejtë thotë se mbulesa e mbron gruan nga çdo lloj ngacmimi.

6. Dënimi me vdekje ndaj përdhunuesve

Sipas jurisprudencës islame, njeriu i dënuar për dhunim të ndonjë gruaje meriton dënim me vdekje. Shumë njerëz habiten nga ky ndëshkim. Disa shkojnë aq larg sa thonë se feja islame është e pamëshirshme, barbare dhe fe e prapambetur! Unë kam parashtruar një pyetje mjaft të thjeshtë për jomuslimanët. Të supozojmë, -Zoti mos e bëftë- se dikush dhunon gruan tuaj, nënën ose motrën tuaj. Ju jeni gjykatës dhe dhunuesi është sjellë pranë jush. Çfarë dënimi do t’i jepnit? Shumica do të përgjigjeshin se do ta ekzekutonin me vdekje. Disa shkuan edhe me larg duke thënë se do ta torturonin për vdekje. Pasi dëgjova këto përgjigje, atyre iu drejtova me këto fjalë: “Ju, nëse ndokush dhunon gruan ose nënën tuaj, ju do ta ekzekutonit me vdekje. Mirëpo, nëse krimi i ngjashëm është kryer ndaj gruas apo vajzës së dikujt tjetër, ju do të thoni se ekzekutimi me vdekje është prapambetje. Përse i dalloni këto, kur në esencë janë krime të njëjta?

7. Shoqëria perëndimore pretendon gabimisht se kinse ka ngritur gruan dhe statusin e saj

Diskutimi i Perëndimit rreth liberalizmit të gruas nuk është asgjë tjetër vetëm se një formë maskimi i shfrytëzimit të trupit të saj; degjenerimit të shpirtit dhe grabitja e nderit të saj. Shoqëria perëndimore pretendon të ketë ‘ngritur pozitën e gruas’. Në të kundërtën, ata faktikisht i kanë ulur pozitën e saj duke e konsideruar atë si një grua pa kurorë, dashnore, flutura për shoqërinë, të cilat thjesht janë vegla në duart e kërkuesve të kënaqësisë dhe kontrabandistëve të seksit, të fshehur pas ekranit të ashtuquajtur ‘art’ dhe ‘kulturë’.

8. Në SHBA ka më shumë dhunime

Shtetet e Bashkuara të Amerikës supozohen si njëri ndër vendet më të zhvilluara dhe më të avancuara të botës. SHBA-ja ka gjithashtu numrin më të lartë të dhunimeve krahasuar me çdo vend tjetër të botës. Sipas raportit të FBI-së, në vitin 1990, vetëm në SHBA për çdo ditë shënoheshin mesatarisht 1756 raste dhunimesh. Më vonë, një raport tjetër thotë se për çdo ditë në Shtetet e Bashkuara të Amerikës kryhen mesatarisht 1900 dhunime. Viti nuk është cekur. Mund të ketë qenë 1992 ose 1993. Ka gjasa që amerikanët ne vitet në vazhdim u bënë shumë të ‘guximshëm’.
Paramendo një skenar sikur veshja islame të ishte zbatuar në Amerikë. Sa herë që dikush do të shikonte ndonjë grua dhe sa herë që në mendjen e tij do të sillej ndonjë mendim apo qëllim i paturpshëm, ai do ta ulte shikimin dhe vështrimin e tij ngultas.
Kur çdo grua të vishej me mbulesën islame; pra ta mbulonte trupin në tërësi, përveç fytyrës dhe duarve deri në nyja, pas kësaj, nëse një burrë dhunon ndonjë vajzë, ai do të meritonte dënimin e rëndë, me fjalë të tjera do të ekzekutohej. Tani, unë pyes: Në rrethana të tilla, a do rritej numri i dhunimeve, do të qëndronte shifra ashtu si është tani apo do të zvogëlohej?

9. Aplikimi i legjislacionit (sheriatit) islam do ta zvogëlonte shifrën e dhunimeve

Natyrisht se sa më shpejt që do të ishte implementuar sheriati islam, rezultatet pozitive nuk do të kishin munguar; do të ishin të njohura për masën dhe të pashmangshme. Po që se ligji islam do të ishte zbatuar në çfarëdo vendi të botës, qoftë ajo Amerika apo Evropa, shoqëria do të kishte frymuar më lirshëm. Islami nuk degradon asnjë grua, në fakt ai e ngre dhe e mbron modestinë dhe pastërtinë e saj.
Vazhdon në numrin vijues.