Nevoja e krijesave për Allahun e Lartësuar nuk mund të përshkruhet. Krijesat kanë nevojë për Allahun në çdo situatë dhe gjendje të tyre. Ata kanë nevojë për ndihmën e Tij në të gjitha çështjet e tyre. Allahu i krijoi ata nga asgjëja, u jep dhunti të panumërta, i udhëzon drejt asaj që u sjell dobi dhe i largon nga ajo që u sjell dëm. Prandaj, krijesat nuk kanë kurrfarë vlere pa Krijuesin e tyre.

Ajetet e Kuranit i kanë trajtuar këto çështje dhe i kanë sqaruar këto realitete. Shumë prej njerëzve janë të pakujdesshëm ndaj këtyre gjërave edhe pse e lexojnë Kuranin. Këto net janë netët e Kuranit. Muslimanët në të gjitha pjesët e botës kërkojnë vlerën dhe shpërblimin e tyre. Ata i ngjallin këto net me lexim dhe me namaz, me lloje të ndryshme të dhikrit (përmendjes së Allahut) dhe lutjeve. Prandaj, shumë me rëndësi për ta është të meditojnë atë që lexojnë dhe të dëgjojnë fjalën e Allahut të Madhërishëm në këto net të bekuara në mënyrë që të arrijnë të kuptojnë realitetin e nevojës së tyre për Allahun e Lartësuar dhe t'i kuptojnë mirësitë dhe shpërblimet e Tij dhe kjo ti çojë drejt madhërimit të Tij, përmendjes së Tij, falënderimit dhe adhurimit të Tij.

Allahu i Madhërishëm na ka krijuar pa pasur nevojë për ne. Ai thjesht na krijoi nga mirësia e Tij. "Ai ju krijon në barqet e nënave tuaja, fazë pas faze në një errësirë të trefishtë. Ky është Allahu - Zoti juaj; Atij i përket i tërë pushteti; nuk ka zot tjetër të vërtetë përveç Tij. Atëherë, si është e mundur që largoheni prej Tij?!" (Zumer, 6)

Imagjino o rob i Allahut se ti nuk je krijuar çfarë do të ndodhte? A do të çrregullohej gjithësia pa ty? A do të kishin nevojë krijesat për ty? A nuk kanë kaluar kohërat para ekzistimit tënd, kurse gjithësia është po ajo gjithësi dhe askush nuk ka pasur nevojë për ty. Gjithashtu pas vdekjes tënde do të jetojë kush do të jetojë, kurse gjithësia do të jetë po ajo gjithësi, njerëzit po ata njerëz. As krijesat nuk kanë nevojë për krijimin tënd e as nuk do të çrregullohet jeta me vdekjen tënde.

Këtë fakt Allahu i Lartësuar e ka theksuar në disa vende në Kuran: "A nuk e mban mend njeriu se Ne e kemi krijuar atë, kur ende nuk ishte asgjë?!" (Merjem, 67)

"Vallë, a nuk ka kaluar një periudhë kohore, kur njeriu nuk ka qenë qenie e denjë për t’u përmendur?!" (Insan, 1)

Vëllezër të nderuar! Pas nevojës tonë për Allahun në krijimin tonë si njerëz, ne kemi nevojë për Allahun për ekzistencën dhe mbetjen tonë. Allahu i Lartësuar ka mundësi që të na vdesë dhe zhduk dhe të na ndryshojë me njerëz të tjerë si ne, madje Ai ka fuqinë dhe mundësinë të zhduk racën njerëzore dhe të krijojë krijesa tjera, që do të adhuronin Atë e nuk do t'i bënin mëkat asnjëherë.

Kurani është plot ajete që vërtetojnë nevojën tonë për Allahun e Lartësuar në vazhdimësinë e ekzistencës sonë: "Zoti yt është i Vetëmjaftueshmi dhe Zotëruesi i mëshirës. Nëse do, ju zhduk dhe sjell pas jush çfarë të dojë, ashtu si ju ka krijuar nga pasardhësit e popujve të tjerë." (En'am: 133)

"Vallë, a nuk sheh ti sesi Allahu ka krijuar me urtësi qiejt dhe Tokën? Nëse dëshiron, Ai mund t’ju zhdukë ju dhe të sjellë një popull të ri..." (Ibrahim: 19)

"Betohem për Zotin e lindjeve dhe të perëndimeve, që Ne jemi të Zotë t’i ndërrojmë ata me njerëz më të mirë se ata dhe askush nuk na pengon dot." (Mearixh: 40)

Madje në Kuran ka ardhur argumenti i qartë dhe i drejtpërdrejtë për nevojën tonë për Allahun. "O njerëz! Ju jeni të varfër e nevojtarë për Allahun, kurse Allahu s’ka nevojë për asgjë dhe është i denjë për çdo lavd." (Fatir: 15)

Ne kemi nevojë për Allahun për udhëzimin tonë, për Islamin dhe imanin tonë, ne kemi nevojë për adhurimin e Tij. Sikur të mos ishte Allahu nuk do të ishim myslimanë, nuk do të kishim besuar, falur, agjëruar nuk do të punonin vepra të mira e as nuk do të largoheshim nga mëkatet. Ne nuk jemi njerëz më të mirë e më të lartë, njerëz më të mençur dhe më të fortë, mirëpo Allahu i Madhërishëm, me mirësinë dhe mëshirën e Tij na ka udhëzuar ne e të tjerët i ka lënë në humbje: "Thuaju: “Mos e quani si favor për mua se keni pranuar Islamin; përkundrazi, Allahu ju ka dhuruar mirësi dhe ju ka udhëzuar në besim, nëse ajo që thoni është e vërtetë!” (Huxhurat: 17)

Kurse në një hadith kudsij Allahu i Lartësuar thotë: "O robërit e Mi! Të gjithë ju jeni të humbur përveç atë që e kam udhëzuar, prandaj kërkoni udhëzimin Tim që t'ju udhëzoj!"

Sa prej njerëzve e kanë humbur rrugën e imanit e nuk ka kush t'i drejtojë, madje shumica e njerëzve janë në rrugë të gabuar, kurse Allahu i Lartësuar na ka bërë prej besimtarëve e ata janë të paktë. Lexoni ajetet e udhëzimit dhe të humbjes në Kuran do të kuptoni vlerën e dhuntisë së Allahut ndaj jush me udhëzimin dhe do të kuptoni se sa keni nevojë për Allahun për qëndrueshmëri dhe stabilitet në iman.

Ne kemi nevojë për Allahun për vazhdimësinë në imanin tonë, për qëndrueshmërinë në Islamin tonë. Ne nuk mund të jemi të qëndrueshëm pa Allahun e Lartësuar, pa ndihmën dhe suksesin e Tij. Kësisoj, Allahu i Lartësuar i ka përmendur të dijshmit se ata luten: “O Zoti ynë! Mos lejo që zemrat tona të shmangen (nga e vërteta), pasi na ke udhëzuar në rrugën e drejtë, dhe jepna mëshirë prej Teje; vërtet, Ti je Dhuruesi i Madh!" (Ali Imran: 8)

Kurse namazliu në çdo rekat lutet: "Udhëzona në rrugën e drejtë!" (Fatiha, 6)
Ne kemi nevojë për Allahun për furnizimin tonë. Kush na furnizon përveç Allahut të Madhërishëm? Krijesat sado të mëdha, sado të fuqishme apo pa marrë parasysh çfarë pozite kanë, nuk mund ta furnizojnë veten e lëre më t'i furnizojnë të tjerët. Të gjithë kanë nevojë për Allahun. Ai i furnizon ata kudo qofshin: "S’ka asnjë gjallesë në Tokë që të mos i ketë mjetet e jetesës prej Tij." (Hud: 6)

Allahu i Madhërishëm ka bashkuar përmendjen e nevojës sonë për Të, në krijim dhe furnizim në shumë ajete. Pasi Allahu na ka krijuar ne nuk mund të jetojmë vetëm se me furnizimin e Tij "Allahu është Ai që ju ka krijuar e ju ka dhënë ushqim; pastaj ju sjell vdekjen e pastaj ju ringjall. A ka ndonjë nga idhujt tuaj që bën diçka të tillë? Ai qoftë i lavdëruar dhe i lartësuar mbi gjithçka, që ia shoqërojnë Atij (në adhurim)!" (Rum: 40)
Gjithashtu Ai na ka urdhëruar gjithnjë ta kujtojmë këtë dhunti të madhe dhe mos ta harrojmë atë: "O njerëz! Kujtoni dhuntinë e Allahut për ju! A ka ndonjë krijues, veç Allahut, i cili ju furnizon nga qielli dhe Toka? S’ka zot tjetër të vërtetë përveç Tij. Atëherë, si po largoheni ju?" (Fatir: 3)
Nëse Allahu e ndalon furnizimin e Tij, kush na furnizon? "Kush janë ata, që do t’ju japin mjete jetese, në qoftë se Ai jua ndalon ato " (Mulk, 21)

Vëllezër të nderuar! Ne kemi nevojë për Allahun për ushqimin tonë, për pijen tonë, për veshjen tonë, për shëndetin tonë, për shërimin tonë, dhe për çdo gjë tjetër. Allahu i Lartësuar në hadith kudsij thotë: "O robërit e Mi! Të gjithë ju jeni të humbur, përveç atyre që Unë i kam udhëzuar. Pra, kërkoni udhëzimin nga Unë dhe Unë do t'ju udhëzoj!
O robërit e Mi! Të gjithë ju jeni të uritur, përveç atyre që i kam ushqyer Unë. Pra, kërkoni t'ju ushqej dhe Unë do t'ju ushqej!
O robërit e Mi! Të gjithë ju jeni të zhveshur, përveç atyre që Unë i kam veshur. Pra, kërkoni veshjen Time dhe Unë do t'ju vesh!
O robërit e Mi! Ju bëni mëkate natë e ditë e Unë i shlyej të gjitha mëkatet. Pra, kërkoni nga Unë falje dhe Unë do t'ju fal!"
Nevoja jonë për Allahun gjithnjë është e pranishme me ne. Çdo lëvizje e jona dhe çdo pushim është me caktimin e Allahut. E pranon këtë kush e pranon, i nënshtrohet adhurimit të Zotit do të jetë prej të shpëtuarve e fitimtarëve. Dhe e mohon kush e mohon, bëhet kryeneç e kryelartë ndaj adhurimit të Zotit e do jetë prej të humburve e të dënuarve.
Vëllezër të nderuar! Ju jeni duke i përjetuar netët e vlefshme, në të cilat falen mëkatet, shtohen shpërblimet, pranohen lutjet, ndërsa Allahu i Lartësuar liron nga zjarri njerëz të shumtë.

Zakon i të Dërguarve dhe rrugë e burrave të mirë para jush ka qenë shprehja e nevojës për Allahun e Lartësuar. Ibrahimi, paqja e Zotit qoftë mbi të, i hodhi poshtë idhuj të popullit të vet dhe deklaron nevojën e tij për Allahun në të gjitha çështjet e kësaj bote dhe të botës tjetër: "Ai (Ibrahimi) tha: “A keni menduar mirë mbi çfarë keni adhuruar, si ju, ashtu edhe të parët tuaj të lashtë? Në të vërtetë, ata janë armiqtë e mi, përveç Zotit të botëve, i Cili më ka krijuar dhe më udhëzon (në rrugë të drejtë); i Cili më ushqen dhe më jep të pi; i Cili, kur sëmurem, më shëron; i Cili do të bëjë që të vdes e pastaj do të më ringjallë; dhe i Cili, shpresoj se do të m’i falë gabimet e mia në Ditën e Gjykimit!" (Shuara: 75-82)

Kurse i Dërguari juaj, Muhamedi, lavdërimi dhe paqja e Allahut qoftë mbi të, i edukonte pasardhësit dhe umetin e tij që të kenë nevojë gjithnjë për Allahu për çdo gjë. Vëllezër të nderuar! Ecni dhe pasoni rrugën e Pejgamberëve dhe burrave të mirë. Ne kemi shumë nevojë për ringjalljen e nevojës për Allahun e Lartësuar në zemrat tona pasi ato janë ngurtësuar nga mëkatet.