Falënderimet dhe lëvdatat e shumta i takojnë vetëm Allahut, Krijuesit të botëve, të Gjithëfuqishmit, të Gjithëpushtetshmit, i Cili e meriton më shumë adhurimin. Përshëndetjet më të sinqerta ia dërgojmë krijesës më të zgjedhur të njerëzisë, Pejgamberit të fundit, Muhamedit alejhi selam, familjes së tij të dashur, shokëve të tij të nderuar dhe mbarë xhematlive, të cilët do ta ndjekin rrugën e tij deri në Ditën e Fundit.

Besimtarë të nderuar!

Pasi gjendemi në një shoqëri në të cilën rendi familjar është prishur, është shkatërruar aq shumë, saqë nuk i ka mbetur asnjë anë pozitive, pashë të udhës që t'i shkruaj disa fjalë për familjen dhe ruajtjen e saj.

Allahu i Plotfuqishëm kur flet për familjen, fillimisht na thërret duke thënë; "O ju që besuat, ruajeni veten dhe familjen tuaj prej një zjarri, lëndë djegëse e të cilit janë njerëzit dhe gurët.” (Tahrim, 6)

Edhe i Dërguari i Allahut, Muhamedi alejhi selam, thotë: "Allahu i Lartësuar do ta pyesë çdo përgjegjës për tufën që e ka pasur nën përgjegjësinë e tij, a e ka ruajtur ashtu si duhet, apo e ka humbur, saqë do pyetet njeriu për anëtarët e shtëpisë së tij." (Transmeton Ibn Hibbani)

Meqë ruajtja e familjes qenka urdhër hyjnor, thirrje nga Allahu i Madhëruar dhe radhitet menjëherë pas ruajtjes së vetvetes, na jep të kuptojmë se familja është trungu i shoqërisë, ndaj dhe ka nevojë imediate për mbikëqyrje, ruajtje nga haramet, dëmet, mëkatet e mëdha, në mënyrë që t'i ikim zjarrit të përmendur në Kuran, lëndë djegëse e të cilit janë njerëzit dhe gurët.

Gjithashtu, edhe hadithi i Muhamedit alejhi selam na mëson se, secili prind do të përgjigjet Ditën e Gjykimit për fëmijët e tij, respektivisht për familjen e tij, se si i ka rritur, si i ka edukuar, etj., kjo nuk është diçka e thjeshtë që duhet lënë pas dore, siç ndodh me ne.

Të nderuar vëllezër besimtarë!

Ndërtimi, edukimi dhe ruajtja e familjes është një rrugë e gjatë dhe e mundimshme, përplot sprova. Sigurisht që për këtë temë ndoshta është folur edhe më parë, por nisur nga qëllimi i mirë, që t'u përkujtojmë prindërve se prej kur fillon ndërtimi i familjes së shëndoshë, ne kemi përgatitur disa pika të rëndësishme.

Zgjedhja e gruas së mirë: Për këtë, Allahu i Madhërishëm në suren Nur, ajeti 32, thotë: "Dhe martoni të pamartuarit dhe robërit e robëreshat që janë të ndershëm dhe të ndershme. Nëse janë të varfër, Allahu i begaton nga mirësitë e Tij. Allahu është Bujar i Madh, i Gjithëdijshëm."

Gjithashtu, kur kemi të bëjmë me zgjedhjen e gruas, Muhamedi alejhi selam, na ka mësuar se gruaja duhet t'i plotësojë disa kushte, si vijon hadithi: "Gruaja martohet për katër gjëra; për pasurinë e saj, për ndershmërinë e saj (se i takon një familje të ndershme), për bukurinë e saj dhe për fenë e saj, zgjidhe atë që ka fe, të lumshin duart.” (Këtë hadith e transmeton Buhariu dhe Muslimi.)

Nëse ndalemi vetëm pak te ajeti kuranor, ku thotë se ‘Nëse janë të varfër, Allahu i begaton nga mirësitë e Tij' dhe më pas kur lexojmë pjesën e fundit të hadithit të Muhamedit a.s. 'zgjidhe atë që ka fe, të lumshin duart', shohim se vërtet Allahu e shton bereqetin kur ata dy vetë kanë vendosur të martohen. E, mbi të gjitha, kur burri ka zgjedhur një grua fetare, e cila ia ka frikën Allahut, kjo është e mira e të gjitha të mirave.

Për ta ndërtuar një familje të shëndoshë islame, kërkohet që në atë shtëpi të përmendet Emri i Allahut, të falet namaz, të jetë një shtëpi ku adhurohet Allahu i Madhërishëm e jo vend i përgojimit, vend i çajit e i kafes.

Pejgamberi a.s. thotë: "Shembulli i shtëpisë në të cilën përmendet Allahu dhe i shtëpisë në të cilën nuk përmendet Allahu, është sikurse shembulli i të gjallit dhe të vdekurit."

Të jemi të sinqertë me Allahun në çdo punë dhe vepër që punojmë, e veçmas kur Allahu të na begatojë me fëmijë, këtu fillon rruga më e mundimshme për një edukim të mirëfilltë. Prindërit janë të obliguar që t'i kushtojnë rëndësi të veçantë fëmijëve, duke iu ofruar atyre kushte të volitshme për mësim, edukim fetar, planprogram ditor, fjala vjen; sa orë të lexojë, sa të luaj, sa të flejë, sa sure të mësojë brenda javës, etj.

Unë kam hasur në shumë polemika me njerëz, të cilët edukimin e fëmijëve e përmbyllin me blerjen e librave dhe veshmbathjes.
Fëmijëve apo anëtarëve të familjes u duhen mësuar rregullat islame, urdhërimi për të mirë dhe ndalimi nga të këqijat. Këtë e them gjithnjë duke u mbështetur në ajetin që përmendëm pak më parë: "O ju që besuat, ruajeni veten dhe familjen tuaj prej një zjarri, lëndë djegëse e të cilit janë njerëzit dhe gurët.” (Tahrim, 6)

Në lidhje me këtë ajet kuranor, në tefsirin Xhamiul Bejan të- Imam Taberiut, shpjegohet shumë mirë detyra e pronarit të shtëpisë, që t'i urdhërojë anëtarët e familjes ta respektojnë Allahun, i ndalon nga mëkatet, që ai personalisht t'i zbatojë urdhrat e Allahut dhe gjithashtu t'i urdhërojë anëtarët e familjes së tij në kryerjen e urdhrave të Allahut, duke i ndihmuar të kryejnë obligimet që kanë ndaj Krijuesit. Po qe se vëren ndonjë mëkat të bërë nga familja, duhet t'i largojë nga ai mëkat dhe t'i qortojë për gjynahin e bërë."

-Kur jemi te fëmijët, duhet të kemi kujdes që atyre t’ua mësojmë namazin kur ata janë të vegjël. Hakimi dhe Ebu Davudi nga Amër bin El-Asi, r.a., transmetojnë se Pejgamberi i Allahut alejhi selam të ketë thënë: "Urdhëroni fëmijët tuaj për namaz në moshën shtatëvjeçare, ndërsa i ndëshkoni ata në moshën dhjetëvjeçare dhe i ndani në shtretër."
Gjithashtu, fëmijët tanë duhet t`i angazhojmë me mësimin e Kuranit, mësimin e gjuhëve të ndryshme, Historikun e Pejgamberëve alejhimuselam, kushtet e fesë.

- Gjithashtu, për ta ndërtuar familjen, doemos duhet që fëmijët tanë t'i emërtojmë me emra të mirë e jo me emra të aktorëve të serialeve, emra të huaj nga Brazili e Spanja, Allahu na ruajttë prej ndikimeve të tyre!
Ebu Derda thotë se Pejgamberi a.s. ka thënë: “Me të vërtetë në Ditën e Gjykimit do të thirreni me emrat tuaj dhe me emrat e baballarëve tuaj, kështu vendosni emra të bukur.” Ky hadith i Pejgamberit a.s. na qartëson se emrat e fëmijëve tanë duhet të vendosen të bukur dhe me kuptim të mirë.

-Për të poseduar një familje të shëndoshë, kërkohet që kryefamiljari, në këtë rast prindërit, të mbajnë tubime, në të cilat diskutohen problemet familjare. Shpesh dëgjojmë vëllezërit tanë në mërgatë se kinse atje ka rend dhe çdo gjë ecën si duhet, kjo mund të realizohet edhe në vendin tonë, por ja që shumë pak e lexojnë Kuranin, e sa prej atyre që e lexojnë merren me meditimin, kuptimin dhe praktikimin e Kuranit në jetën e tyre të përditshme!?
Kur është fjala për diskutimet familjare apo tubimet, gjë për të cilën është përgjegjës burri, i cili është përgjegjësi për vendimmarrje, tubime të tilla na japin të kuptojmë se kjo familje është e ndërlidhur dhe ka mirëkuptim në mes anëtarëve të familjes. Allahu në suren Esh-shura, ajeti 38, thotë: "...ata konsultohen mes vete për punët e përbashkëta të tyre."

- T'i ruajmë dhe edukojmë fëmijët me një edukatë islame, para se ata t'i nënshtrohen shkollimit të shthurur. Sot në Prishtinë dhe në qytetet e tjera të Kosovës, rinia është shumë e prishur, e them këtë duke u bazuar në atë që u serviret atyre nëpër shkolla, si dhe lirinë e tepruar, si nga prindërit, po ashtu edhe nga institucionet përkatëse. Deri vonë prostitucioni ka qenë ndër dukuritë më të shëmtuara në rininë kosovare, tashmë kjo është harruar dhe arsyet janë shumë të qarta; sot nëpër shkollat fillore dhe të mesme gjejmë dukuri negative që për to as që mërzitet personeli i shkollës. Jam i bindur që fajtori gjithnjë është jetim, mirëpo i lus prindërit që t'i ruajnë fëmijët e tyre sa më shumë për shkak se Pejgamberi a.s. ka thënë: "Shembulli i shokut të keq është sikur shembulli i farkëtarit, në një transmetim tjetër: Gjyryku i farkëtarit ose të djeg shtëpinë ose t'i djeg rrobat, ose së paku nuhat erë të keqe."

Prandaj shikoni se me kë po shoqërohen fëmijët dhe kë po pranoni në shtëpi. Këtu do të shtoja disa pika, që prindërit t'i kenë parasysh. Ata duhet të jenë të kujdesshëm me fëmijët e tyre; t'i njohin se kush janë shokët e fëmijëve të tyre, t'i kontrollojnë çantat e tyre, ku shkon vajza dhe me kënd kalon kohën, të gjitha këto, po qe se kihen parasysh, jam i bindur se nuk do të ndodhin probleme dhe fatkeqësi familjare, këtë vëzhgim prindi duhet ta bëjë pa e ditur fëmija e tij.

- Prezenca e prindit në shtëpi është shumë e dobishme për të edukuar fëmijët: sot hasim shumë njerëz të cilët braktisin familjet e tyre dhe dalin jashtë vendlindjes, unë nuk e kam idenë se si e kanë futur në kurth, kush do të punojë me fëmijët e tyre? E çfarë të themi për ata njerëz që nuk janë të lidhur për namaz dhe për të arritur te paraja, braktisin familjen e tyre me vite, kësaj i thonë humbje e qëlluar. Unë shpesh çuditem kur has në ato biseda, të cilat kanë të bëjnë me punësimin e grave. A nuk qenka kënaqësi më e madhe sesa nëna të merret me edukimin e fëmijëve të saj? Allahu i Lartësuar gruan e ka ngritur shumë lart, duke i dhuruar të gjitha të drejtat e merituara. Gruaja apo nëna është zonja e shtëpisë, është shkolla dhe edukatorja e parë e fëmijës, po qe se fëmija ngel në këtë shkollë, atëherë çdo orvatje tjetër që pason me vonë, do jetë e padobishme, ndaj dhe kërkohet prej tyre të qëndrojnë në shtëpi. Allahu i Lartësuar duke iu drejtuar grave të Pejgamberit alejhi selam thotë: "...dhe rrini në shtëpitë tuaja, e mos shfaqni bukurinë tuaj si shfaqej në injorancën e hershme, falni namazin, jepni zeqatin dhe respektojeni Allahun dhe të Dërguarin e tij. Allahu ka për qëllim që nga ju, ose familja e shtëpisë së Pejgamberit të largojë ndytësinë e mëkateve dhe t'ju pastrojë plotësisht." (El- Ahzab; 33)

Prandaj i këshilloj të gjitha nënat që sa herë të kërkojnë punë, ta kenë në konsideratë ajetin e lartshënuar, këto janë fjalë të Allahut, i Cili di më mirë se ku e ka vendin nëna/gruaja.

-Problemet apo ngatërresat mes prindërve janë shumë të dëmshme për fëmijët. Nëse dëshirojmë që të kemi familje të shëndoshë, atëherë duhet të jemi të vetëdijshëm për çdo imtësi, në asnjë mënyrë nuk lejohet që burri të përçahet me gruan e tij në praninë e fëmijëve, për shkak se kjo ndikon negativisht në ardhmërinë e fëmijëve, gjithashtu krijohen ndasi, pastaj fëmija edhe duke shkuar në shkollë, edhe gjatë qëndrimit në bankë, ai do të mendojë se çfarë do të ndodhë me prindërit e tij.

- Për të ruajtur familjen dhe moralin e saj, duhet t'i ikim edhe manifestimeve të dasmave, të cilat jo që nuk kanë frymë fetare, por aspak kombëtare, prandaj ajo që ndodh sot në Kosovë, duke bërë dasma nëpër hotele, pastaj muzika e gjallë deri në orët e vona, kjo nuk është fare për t'u krenuar, ata harxhojnë e shpenzojnë pa masë e Allahu nuk i do ata që shpenzojnë, bile një ajet kuranor tregon se ata që shpenzojnë pa masë janë vëllezërit e shejtanit.
Në këto dasma ka përzierje të grave me burra, të rinjtë dhe të rejat kërcejnë bashkë. Allahu na ruajttë. Mos më thoni se ne hoxhallarët e kemi shtrënguar shumë, për shkak se ju e keni zbutur dhe çliruar litarin shumë, ndaj dhe po ndodhin këto të këqija në shoqërinë tonë, me të përfunduar të dasmave fillojnë shkëmbimet e numrave të mobilit, pastaj ndodhin dhunime, tradhtitë, etj.

-Prindi duhet që doemos të jetë i kujdesshëm dhe të mos lejojë që në shtëpinë e tij te shikohen çfarëdo lloj programi, për shkak se deri vonë, je ndier shumë keq kur ka pasur ndonjë skenë të fëlliqur e tani kjo ka kaluar të gjithë sikur e shohin këtë si pjesë të filmit. Gjithashtu duhet të largojë rrenën nga familja, e gjëra të ngjashme me të.
Aishja tregon se i Dërguari i Allahut nëse shihte te ndonjë anëtar i familjes ndonjë gënjeshtër, largohej prej tij derisa të bënte teube, pra derisa ai të pendohej për veprën që kishte bërë.

Lusim Allahun e Plotfuqishëm që të na bëjë prej atyre që vërtet kujdesen për edukimin e familjes dhe kryejnë me përgjegjësi amanetin që kanë mbi supet e tyre. Amin!

 

Përgatiti: Mr Fehim Dragusha
26.4.2009