Vëlla i nderuar! Ndoshta je kureshtar që të dish për vlerat dhe shpërblimet e namazit dhe dobitë në këtë botë si dhe botën tjetër për ata të cilët i falin namazet me rregull e me përkushtim. Pra, eja dhe dëgjo nga i dashuri, Pejgamberi ynë, Muhamedi salallahu alejhi ue selem, me shpresë se kjo do të jetë nxitje për ne që t’i kushtojmë më shumë rëndësi namazit, të cilin Allahu aq shumë e ngriti, sa e bëri shtyllë kryesore të fesë. Disa prej atyre vlerave janë:

Një: Është mbrojtës prej të këqijave dhe fatkeqësive të kësaj bote. Thotë i Dërguari i Allahut salallahu alejhi u selem për këtë: “Kush e fal sabahun me xhemat (në xhami), ai është nën mbrojtjen e Allahut dhe kujdes që dikush të mos dëshirojë ndonjë të keqe për atë që Allahu e ka në mbrojtje.”

Dy: Shkak për faljen e gjynaheve, gabimeve prej të cilave s’mund të shpëtojë njeriu. Thotë Muhamedi salallahu alejhi ue selem: “Kush pastrohet në shtëpinë e tij (merr abdest) dhe shkon në njërën nga shtëpitë e Allahut (xhami), që të kryejë një farz të Allahut, njëri nga hapat atij ia fshin mëkatet, kurse tjetri ia ngre shkallët tek Allahu.” Muslimi.

Tre: Engjëjt e Allahut e lusin Allahun për atë njeri që falet me xhemat në xhami dhe kërkojnë falje për të, Thotë Muhamedi salallahu alejhi ue selem: “Melaiket bëjnë dua për atë i cili është falur në xhami përderisa ai të jetë në xhami, përderisa nuk e prish abdestin. Thonë: “O Allah, fale atë! O Allah, mëshiroje!” Buhariu.

Katër: Shkak i fitimit tënd kundër shejtanit dhe shkak i mposhtjes dhe poshtërimit të tij. Thotë Pejgamberi salallahu alejhi ue selem: “Nuk ndodh që në një vend, fshat apo qytet që janë më shumë se tre persona dhe nuk e falin namazin me xhemat, vetëm se i ka mbizotëruar ata shejtani, Bashkoju xhematit se me të vërtetë ujku e ha delen e vetmuar.” Ebu Davudi dhe Termidhiu.

Pesë: Suksesi që njeriu të fitojë dritë të plotë Ditën e Kiametit. Në lidhje me këtë, Muhamedi salallahu alejhi ue selem thotë: “Përgëzojini ata të cilët ecin nëpër errësirat e natës për në xhami me dritë të plotë Ditën e Gjykimit.” Ebu Davudi dhe Tërmidhiu.

Gjashtë: Në namazin me xhemat është shpërblimi i shumëfishuar. Thotë Pejgamberi salallahu alejhi ue selem për këtë: “Namazi me xhemat është më i vlefshëm se namazi i vetëm për njëzet e shtatë shkallë.” Buhariu dhe Muslimi.

Shtatë: Kjo falje me xhemat në xhami është si pastrim i muslimanit nga njëra prej cilësive më të shëmtuara të munafikëve, të cilët janë të dënuar me dënimin më të rëndë më të thellë në xhehenem. Thotë Pejgamberi salallahu alejhi ue selem: “S’ka më të rëndë për munafikët sesa namazi i jacisë dhe i sabahut dhe sikur ta dinin se sa ka shpërblim për to, do të vinin qoftë edhe duke u zvarritur.” Buhariu dhe Muslimi dhe thotë Ibën Mesudi, Allahu qoftë i kënaqur me të: “Kemi parë që mungonin nga namazi në xhemat vetëm munafikët për të cilët është ditur munafikllëku i tyre dhe se kur është sëmurë njëri nga ne, e kanë marrë dy persona për krahu dhe e kanë sjellë në xhami, në saf.” Dhe ka për qëllim Muhamedin salallahu alejhi ue selem. Muslimi.

Tetë: Rruga e vetme që vërtet njeriu të arrijë kënaqësi të vërtetë, qetësim shpirtëror, shpëtim nga sëmundjet shpirtërore si dhe problemet jetësore, prej të cilave ankohen shumë njerëz sot, si mërzia, pikëllimi, mundimet shpirtërore dhe dështimet në çështje familjare, tregtare, shkencore si dhe shumë të tjera. Thotë Muhamedi salallahu alejhi ue selem: “Lidh shejtani mbi kokën e ndonjërit prej jush tri nyja kur ai është duke fjetur dhe i thotë në çdo nyje që ia lidh: “Fli rehat, ke natë të gjatë.” E nëse zgjohet dhe e përmend Allahun, i zgjidhet njëra nyje, nëse merr abdest, i zgjidhet nyja tjetër dhe nëse falet, i zgjidhet edhe nyja tjetër dhe atëherë është i kthjellët, me shpirt të qetë. E, nëse s’e bën këtë, atëherë bëhet keq shpirtërisht, përtac.” Buhariu dhe Muslimi.

Nëntë: Shkak i futjes së njeriut në xhenet. Thotë Muhamedi salallahu alejhi ue selem: “Nuk do të hyjë në zjarr ai i cili është falur para lindjes së diellit dhe para prarimit të tij.” Muslimi. (Qëllimi i hadithit është namazi i sabahut dhe i ikindisë.)

Vëlla i nderuar!

Mendoj se pas leximit të këtyre haditheve nga i dashuri yt, Muhamed salallahu alejhi ue selem, ke vendosur ta poshtërosh armikun tënd, shejtanin, dhe t’u japësh fund mangësive të mëdha dhe të përpiqesh me zell në të ardhmen. Nëse e ke vendosur, për hajër të qoftë ky vendim i mirë! Ja edhe disa sqarime e udhëzime të dobishme, me lejen e Allahut.

Së pari: Në lidhje me imanin dhe veprat e mira

1- Pajisja sa më e mirë me kryerjen e suneteve dhe ibadeteve të tjera vullnetare, ngase kjo është shkaku më i mirë që e ndihmon njeriun për faljen e namazit me xhemat në xhami. Nga më të rëndësishmet janë falja e suneteve të cilat janë përmendur në hadithe para apo pas farzeve si dhe namazi i vitrit, leximi i Kuranit, namazi i duhasë, lëmosha, agjërimi etj.

2- Bërja istigfar pandërprerë (estagfirullah ue etubu ilejh)
Kjo do të thotë: “Kërkoj falje o Zot dhe pendohem për atë që kam bërë.” Gjithmonë duke pasur parasysh nevojën tonë të madhe për Allahun, që të na i falë mëkatet të cilat i kemi bërë në të kaluarën dhe të cilat do t’i bëjmë në të ardhmen. Thotë Muhamedi salallahu alejhi ue selem: “Kush bën përherë istigfar, do t’ia bëjë Allahu të mundur zgjidhjen e çdo problemi si dhe nga çdo ngushticë dalje dhe do ta furnizojë nga s’e ka bërë llogari fare.” Ebu Davudi.

3- Përmendja e shumtë e Allahut, e cila është pastrim për zemrën dhe shpirtin, afrim tek Allahu, largim i shejtanit si dhe ndihmës për në ibadet dhe punë të mira. Janë disa lloje të dhikrit. Dhikri i mëngjesit, i cili mund të kryhet pas faljes së sabahut e deri para drekës. Dhikri i mbrëmjes, i cili mund të kryhet prej pas namazit të ikindisë e deri në namazin e akshamit e nëse ka harruar apo ka qenë i angazhuar me diçka me rëndësi, që s’mund të shtyhet më vonë, mund të kryejë edhe pas akshamit deri në jaci. Dhikri pas namazeve farze si dhe dhikret e posaçme që kanë ardhur për vende apo kohë të caktuara apo në çdo kohë.

4- Jetë me shoqëri të mirë: Është ndër faktorët kryesorë për përqendrimin e njeriut në fe. E, kush dëshiron të gjitha të mirat dhe largimin nga të gjitha të këqijat, le t’i shkëpusë të gjitha lidhjet me atë shoqëri e cila nuk falet apo falet fare pak dhe që bën mëkate dhe vepra të shëmtuara. Ai duhet të kërkojë një shoqëri e cila e ndihmon dhe e udhëzon në punë të mira. E kush nuk e bën këtë, të mos habitet kur të shohë se i është dobësuar imani dhe ka humbur vullnetin për faljen e namazit dhe bërjen e veprave të tjera të mira.

5– Kushtimi rëndësi i armës më të fortë, duasë: Çdo musliman i drejtohet Allahut të Lartësuar me lutje të sinqerta pa i shoqëruar në to askënd, se Allahu është Ai që i mjafton njeriut, Ndihmuesi i tij ,Udhëzuesi i tij për gjithë atë që i bën dobi në dinin e tij dhe në ahiretin e tij dhe për këtë preferohet që çdo besimtar t’i drejtohet Allahut sa më shumë me dua, posaçërisht në ato kohë kur pranimi i duave shpresohet më shumë. Allahu na mundësoftë ta përmendim sa më shumë, ta falënderojmë sa më mirë dhe t’i bëjmë ibadet, që të na ruajë nga çdo mëkat. E ky është shpëtimi për këtë botë dhe për botën tjetër.

Së dyti, disa faktorë të tjerë ndihmues:
1- Vonimi i namazit të vitrit deri para se të flemë.
2- Gjumi i hershëm dhe me abdest.
3- Kurdisja e orës apo e celularit për t’u zgjuar, për ata që kanë gjumin e rëndë.
4- Porositja e të afërmve apo e shokëve për ta zgjuar për namaz.
5- Kryerja e dhikrit para gjumit.
6- Leximi i sures Ihlas, Nas dhe Felek nga tri herë duke pështyrë lehtë në duar dhe përshkimi i trupi me to sa është e mundur.

Dhe në fund, lus Allahun e Lartësuar që të sjellë dobi me këto fjalë dhe që të jenë shkak që të bëjnë të mendosh seriozisht si dhe ta shikosh jetën tënde në tërësi dhe që të të mundësojë të ndjekësh rrugën e vërtetë dhe të drejtë e të dobishme, që të të mundësojë t’i lësh të gjitha gabimet dhe mëkatet të cilat të bëjnë dëm në fe e në jetë, edhe pse mund t’i duash dhe zemra jote është e lidhur me to. Ky është mendimi i ynë i mirë për ty, se ti në këtë do të shpejtosh, me shpresë që do të të shoh së shpejti në safin e parë në xhami e në çdo punë e vepra të mira.
Allahu të ruajttë!
Vëllai yt!

 

Përgatiti “Darul Kasim”
Përktheu: Hevzi Kadriu
22.3.2009