Liga Botërore Islame në Mekën e Bekuar ka organizuar kohët e fundit një konferencë me dijetarë, shkencëtarë, ekspertë dhe shkrimtarë të ndryshëm muslimanë. Kjo konferencë titullohej “Konferenca Botërore Islame për Dialog në Mekën e Bekuar”. Në këtë konferencë ishin të pranishëm mbi 400 dijetarë dhe intelektualë muslimanë, duke shtuar këtu edhe numrin e gazetarëve dhe të muslimanëve të tjerë.

Konferenca kishte për synim përmirësimin dhe avancimin e çështjes së dialogut me pasuesit e feve të tjera. Të pranishmit shprehën idetë dhe mendimet e tyre në mes përkrahësve dhe kundërshtarëve për zhvillimin e dialogut me religjionet e tjera. Si rrjedhojë, konferenca u mbyll me këtë konkluzion: “…Porta e dialogut me çifutët, të krishterët dhe pasuesit e religjioneve të tjera gjithsesi duhet të vazhdojë të mbetet e hapur edhe më tutje.” Ndër të tjera, shërbëtori i dy xhamive të shenjta (haremeve), Mbreti Abdullah bin Abdul Aziz, deklaroi se do të provonte të gjitha metodat e mundshme për të ulur tensionet dhe presionet e pranishme mes pasuesve të feve, duke thënë: “Në të vërtetë, kleriku dhe lideri i krishterë, Papa Benedikti, është një personalitet tjetër, që mbart mendim pozitiv mbi këtë çështje. Ai i ka dhënë përshtypjet e tij në tubime të shumta, në të cilat ka nënvizuar se fillimi i dialogut me pasuesit e religjioneve të tjera në këtë kohë është me rëndësi të veçantë. Që të dy, shërbëtori i dy haremeve, Mbreti Abdullah bin Abdil Aziz, dhe Papa Benedikti, gëzojnë autoritet në nivel ndërkombëtar dhe shquhen si prijës të rëndësishëm, të cilët kanë për qëllim që të dalin me arritje pozitive në fushën e dialogut ndërfetar.

Historia është dëshmitare se çifutët dhe të krishterët kanë vazhduar që akuzat e tyre kundër Islamit t’i shfaqin që nga koha e zbritjes së Kuranit. Një luftë e tillë kundër muslimanëve ka vazhduar dhe po vazhdon në çdo shekull. Armiqësia e tyre e vazhdueshme kundër Islamit nuk ishte për shkak se ata e shihnin Islamin si të humbur apo si shkak i mosnjohjes së vërtetësisë së kësaj feje, mirëpo urrejtja dhe armiqësia e tyre i ka çuar deri te lufta dhe sulmi kundër Islamit, me qëllim që ta zhdukin dhe ta çrrënjosin nga sipërfaqja e dheut. Kjo ka qenë edhe shkaku që në shumicën e rasteve ka nisur një zinxhir i gjatë luftërash. Qëllimi ka qenë që muslimanët të jenë në disfatë të vazhdueshme, mirëpo, për fatin e tyre të keq, në fund ata u zmbrapsën të humbur, të dështuar dhe shumë të thyer. Ç’është e vërteta, çifutët dhe të krishterët nuk arritën të sundojnë mbi Islamin.

Është me rëndësi për t’u përmendur se urrejtja dhe armiqësia janë shkaktari i vetëm që ka vazhduar të dominojë si barrierë dhe pengesë kyçe për të kultivuar marrëdhëniet e mira midis muslimanëve, çifutëve dhe të krishterëve, qoftë edhe një herë përgjatë kësaj periudhe të gjatë 14-shekullore.

Nëse do të kishin luftuar kundër Islamit dhe muslimanëve për faktin se (çifutët dhe të krishterët) ishin injorantë dhe nuk e njihnin të vërtetën rreth Islamit dhe e mendonin si fe të pavërtetë, atëherë - një ditë prej ditësh – do ta kishin kuptuar realitetin e kësaj feje dhe përmes periudhës së gjatë historike do ta njihnin të vërtetën dhe më pas do të kishin mendime pozitive për Islamin dhe nuk do të kishin urrejtje dhe armiqësi përballë Islamit. Mirëpo pas gjendjes së tanishme, plot tension, mes feve dhe pasuesve të tyre, fshihen mendimet e kultivuara, siç është urrejtja e tepruar dhe armiqësia e vazhdueshme e Perëndimit. Shtetet perëndimore e kanë përkrahur vazhdimësinë e luftës dhe të urrejtjes kundër Islamit. Por duke qenë se këto kombe nuk qenë të afta që këtë urrejtje ta shuajnë brenda një periudhe 14-shekullore, si mund të jetë e mundur ta zhdukin tani?

Sot këto shtete kanë në dispozicion të gjitha llojet e fuqive dhe ia kanë mbyllur dyert botës islame me forcën e tyre shkatërruese ushtarake, duke shfrytëzuar një teknologji moderne dhe mjaft të sofistikuar.

Ç’është e vërteta, duke shfrytëzuar mjetet e informimit gjatë sundimit dhe pushtimit të vet, Perëndimi u ka imponuar vendeve të tjera kulturën e vet, saqë edhe shtetet e tjera islame kanë përvjedhur kulturën e huaj perëndimore. Perëndimi ka marrë sot në dorë edhe ekonominë e botës arabe islame me sistemin e ri ekonomik.



 

Esrar El-Hakk El-Kasimi
Përktheu nga gjuha arabe: Mr. Fehim Dragusha
8.2.2009