18) Shembulli i pesë namazeve

Xhabiri, Allahu qoftë i kënaqur me të, transmeton nga i Dërguari i Allahut, lavdërimi dhe paqja e Allahut qofshin mbi të, se ka thënë: “Shembulli i pesë namazeve është si shembulli i një lumi vërshues që rrjedh para derës së ndonjërit prej jush, në të cilin lahet pesë herë në ditë, kështu që nuk i mbetet ndonjë ndyrësirë.” Shënon Muslimi.

Në hadith ka argument se pesë namazet e pastrojnë njeriun nga mëkatet dhe të ligat, saqë nuk i mbetet asnjë mëkat i vetëm, nëse i kryen ato me kushtet, vaxhibet si dhe me përkushtim.

19) Shembulli i atij që është i hershëm në namaz

Ebu Hurejra, Allahu qoftë i kënaqur me të, transmeton nga i Dërguari, lavdërimi dhe paqja e Allahut qofshin mbi të, se ka thënë: “Shembulli i atij që është i hershëm (shkon në orët e para) në namaz është sikur ai që ofron (sadaka) deve, ai që shkon pas tij është sikur të ketë ofruar lopë, ai që e pason këtë sikur të ketë ofruar dash, ai që shkon pas tij është sikur të ketë ofruar pulë, ndërsa ai që shkon pas tij është sikur të ketë ofruar vezë.” Shënon Ahmedi, Buhariu dhe Muslimi.

Në hadith ka argument për vlerën e shkuarjes herët në namaz dhe se njerëzit dallojnë në shpërblim varësisht nga kjo.

20) Shembulli i muxhahidit (luftëtarit) në rrugën e Allahut

Ebu Hurejra, Allahu qoftë i kënaqur me të, transmeton se i Dërguari, lavdërimi dhe paqja e Allahut qofshin mbi të, ka thënë: “Shembulli i muxhahidit në rrugën e Allahut është sikurse shembulli i agjëruesit, i falësit të natës, nuk e ndërpret agjërimin e as sadakanë derisa të kthehet (muxhahidi).” Shënon Buhariu dhe Muslimi.

Në hadith ka argument për vlerën e xhihadit (luftës) në rrugën e Allahut si dhe shpërblimi i madh që i pret luftëtarët në rrugën e Tij.

21) Shembulli i shokut të mirë dhe i shokut të keq

Ebu Musa, Allahu qoftë i kënaqur me të, transmetohet se i Dërguari, lavdërimi dhe paqja e Allahut qofshin mbi të, ka thënë: “Shembulli i shokut të mirë dhe shokut të keq është (përkatësisht) si poseduesi i miskut dhe kovaçi. Mbartësi i miskut ose do të të japë erë të mirë, ose do ta blesh, ose do të ndjesh prej tij erën e mirë, ndërsa kovaçi ose do të të djegë rrobat ose do të ndjesh prej tij erën e keqe.” Shënon Buhariu dhe Muslimi.

Nga hadithi mësojmë vlerën e të shoqëruarit me të mirët, sqarimin e dobive të cilat dalin gjatë shoqërimit me ta si dhe tërheqja e vërejtjes nga shoqërimi me të këqijtë dhe sqarimin e dëmeve të cilat mund të ndodhin nga shoqërimi me ta.

22) Shembulli i atij që i ndihmon njerëzit e vet në padrejtësi

Transmetohet prej Ibn Mesudit, Allahu qoftë i kënaqur me të, se i Dërguari, lavdërimi dhe paqja e Allahut qofshin mbi të, se ka thënë: “Shembulli i atij që i ndihmon njerëzit e vet në të padrejtën është sikurse shembulli i devesë që është rrëzuar e tërhiqet me bishtin e vet (duke u munduar të shpëtojë).” Shënon Bejhekiu. Albani e cilëson si të saktë.

Në hadith ka tërheqje të vërejtjes për mosndihmesë reciproke në mëkat dhe në armiqësi.

23) Shembulli i birit të Ademit dhe shkaqet e vdekjes

Transmetohet prej Abdullah b. Shehir, Allahu qoftë i kënaqur me të, se i Dërguari i Allahut, lavdërimi dhe paqja e Allahut qofshin mbi të, ka thënë: “Shembulli i birit të Ademit është se ai i ka nëntëdhjetë e nëntë vdekje, nëse shpëton prej tyre, atëherë bie në pleqëri dhe vdes.” Shënon Tirmidhi. Albani e cilëson si të saktë.

Në hadith ka argument për shkaqet e shumta të vdekjes, ndërsa vdekja do të ndodhë dhe është e pashmangshme, ashtu siç kuptojmë edhe obligimin e përgatitjes për të vdekur, duke bërë vepra të mira para ardhjes së saj.