14) Shembulli i koprracit dhe i bamirësit

Ebu Hurejra, Allahu qoftë i kënaqur me të, transmeton nga i Dërguari, lavdërimi dhe paqja e Allahut qofshin mbi të, se ka thënë: “Shembulli i koprracit dhe i bamirësit është sikurse shembulli i dy vetëve me dy parzmore të metalta prej kraharori deri në qafë. Bamirësit, sa herë që jep sadaka, parzmorja i zgjatet dhe i zgjerohet derisa i mbulon edhe majat e gishtërinjve dhe do t’ia fshijë gjurmët që i lënë këmbët e tij në tokë. Sa i përket koprracit, sa herë që të mos dëshirojë të japë diçka, çdo verigë e parzmores do t’i ngushtohet dhe ngjitet për trupi, e ky do të përpiqet ta zgjerojë, por nuk i zgjerohet.” Shënon Buhariu dhe Muslimi.

Hadithi tregon për vlerën e shpenzimit të pasurisë si dhe për qortimin e koprracisë. Bamirësin e mbulon Allahu. Ai ia mbulon nderin e tij në këtë botë dhe në botën tjetër1. Kërkojmë mbrojtje nga Allahu të na mbulojë!

15) Shembulli i atij që kthehet nga sadakaja e tij

Ibn Abasi, Allahu qoftë i kënaqur me të, transmeton se i Dërguari, lavdërimi dhe paqja e Allahut qofshin mbi të, ka thënë: “Shembulli i atij që shpenzon pasurinë (jep sadaka) e më pastaj kthehet nga ajo, është sikurse shembulli i qenit, i cili vjell, pastaj sërish kthehet në vendin e vjelljes së tij dhe fillon ta hajë atë.” Shënon Muslimi.

Në hadith ka argument për poshtërsinë e atij që pendohet për sadakanë e tij dhe i kthehet mendja prej saj.

16) Shembulli i dijetarit i cili e harron veten

Xhundubi, Allahu qoftë i kënaqur me të, transmeton nga i Dërguari, lavdërimi dhe paqja e Allahut qofshin mbi të, se ka thënë: “Shembulli i dijetarit që u mëson njerëzve mirësinë duke harruar veten e tij, është si shembulli i kandilit që ndriçon të tjerët duke djegur veten.” Shënon Taberani. Albani e cilëson të saktë.

Në hadith ka argument për neglizhimin e asaj që rezulton nga dija, respektivisht të punuarit sipas asaj, respektimi i urdhrave dhe braktisja e mëkateve. Gjithashtu në hadith nënkuptohet edhe përfundimi i keq për ata që i kanë veprat në kundërshtim me fjalët e tyre.

17) Shembulli i të shkolluarit që nuk i mëson të tjerët

Ebu Hurejra, Allahu qoftë i kënaqur me të, transmeton nga i Dërguari, lavdërimi dhe paqja e Allahut qofshin mbi të, se ka thënë: “Shembulli i atij që mëson dije dhe nuk i mëson të tjerët është si shembulli i atij që ruan thesarin dhe nuk shpenzon prej tij.” Shënon Ahmedi, Taberani. Albani e cilëson si të saktë.

Në hadith tërhiqet vërejtja nga fshehja e dijes si dhe zekati i dijes qëndron në përhapjen e saj si dhe dobinë e njerëzve nga ajo.