4) Shembulli i umetit të Muhamedit, lavdërimi dhe paqja e Allahut qofshin mbi të

Enesi, Allahu qoftë i kënaqur me të, transmeton nga i Dërguari i Allahut, se ai ka thënë: “Shembulli i umetit tim është si shembulli i shiut, të cilit nuk i dihen dobitë, i ka në fillim apo në fund.” Shënon Ahmedi, Tirmidhiu. Albani e cilëson sahih.

Në këtë hadith ka argument për vlerën e umetit islam si dhe dobitë e saj do të vazhdojnë deri në Ditën e Kiametit.

5) Shembulli i besimtarëve dhe i ithtarëve të librit

Ibn Umeri, Allahu qoftë i kënaqur me të dytë, transmeton se i Dërguari, lavdërimi dhe paqja e Allahut qofshin mbi të, ka thënë: “Shembulli juaj dhe shembulli i hebrenjve dhe i krishterëve është sikur shembulli i njeriut i cili ka marrë argatë duke iu thënë: “Kush do të punojë deri në drekë për një kirat?” Dhe hebrenjtë kanë punuar. Pastaj tha: “Kush do të punojë prej drekës e deri në kohën e ikindisë për një kirat? Dhe të krishterët punuan. Pastaj tha: “Kush do të punojë prej ikindisë deri në perëndimin e diellit për dy kirat? Keni dhuratën e dyfishtë. Ju jeni ata. Hebrenjtë dhe të krishterët u hidhëruan dhe thanë: “Ne kemi punuar më shumë, më pak jemi paguar. Ai tha: “A kam pakuar diçka nga e drejta e juaj?” “Jo”, do të thonë ata, e Ai pastaj do të thotë: “E tillë është mëshira Ime, ia dhuroj kujt të dua.” Shënon Buhariu.

Në hadith kemi argument për vlerën e umetit islam ndaj popujve të tjerë. Umeti islam ka më pak vite jetë, mirëpo ka më shumë shpërblim.

6) Shembulli i besimtarëve në dashurinë e tyre

Nu’man b. Beshiri, Allahu qoftë i kënaqur me të, transmeton se i Dërguari, lavdërimi dhe paqja e Allahut qofshin mbi të, ka thënë: “Shembulli i besimtarëve në dashurinë, mëshirën dhe solidaritetin reciprok është sikurse shembulli i trupit; nëse i ankohet një gjymtyrë, i tërë trupi lëngon nga temperatura dhe pagjumësia.”

Ah sikur muslimanët të ktheheshin në këto koncepte të përmendura në këtë hadith, respektivisht te koncepti i dashurisë, mëshirës, dhembshurisë, solidaritetit, ndihmës reciproke! Ngase përmes këtyre gjërave atyre u realizohet uniteti, u rikthehet krenaria, fuqia dhe autoriteti në mesin e popujve të tjerë.

7) Shembulli i besimtarit dhe i hipokritit

Ebu Musa, Allahu qoftë i kënaqur me të, transmeton se i Dërguari, lavdërimi dhe paqja e Allahut qofshin mbi të, ka thënë: “Shembulli i besimtarit i cili lexon Kuran është sikur shembulli i qitros, ka erë të mirë dhe shije të këndshme. Shembulli i besimtarit i cili nuk lexon Kuran është sikur shembulli i hurmës, nuk ka erë, por ka shije të ëmbël. Shembulli i munafikut (hipokritit) i cili lexon Kuran është sikur shembulli i borzilokut, e cila ka erë të mirë e shije të hidhur. Ndërsa, shembulli i munafikut i cili nuk e lexon Kuranin është sikurse shembulli i kungullit të thatë, nuk ka erë si dhe shijen e ka të hidhur.” Shënon Buhariu dhe Muslimi.

8) Shembulli i hafidhit të Kuranit

Ibn Umeri, Allahu qoftë i kënaqur me të, transmeton nga i Dërguari, lavdërimi dhe paqja e Allahut qofshin mbi të, se ka thënë: “Shembulli i një hafidhi të Kuranit është sikurse shembulli i një pronari të devesë së lidhur. Nëse kujdeset për të, e mban, e nëse e lë, ikën.” Shënon Buhariu dhe Muslimi.

Në hadith ka argument për largimin e shpejtë të Kuranit dhe të harruarit e tij, përderisa hafidhi i tij nuk e përsërit atë.