Falënderimet dhe lavdërimet i takojnë vetëm Allahut xhele shanuhu, salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët që ndjekin rrugën e tij deri në Ditën e Gjykimit.

Allahu subhanehu ue teala na ka tërhequr vërejtjen që të kemi kujdes dhe të mos flasim gjëra pa vlerë apo gjëra që nuk i dimë. Allahu subhanehu ue teala thotë: “Mos iu qas asaj për të cilën nuk ke njohuri, pse të dëgjuarit, të parit dhe zemra, për të gjitha këto ka përgjegjësi.” (El Isra, 36), pra mos flisni në një çështje për të cilën nuk keni dituri.
Ebu Musa el-Eshari ka thënë: “I thashë Pejgamberit salallahu alejhi ue selem: “O i Dërguar i Allahut, cili musliman është më i miri?” Pejgamberi salallahu alejhi ue selem tha: “Ai musliman prej të cilit janë të mbrojtur muslimanët e tjerë nga gjuha e tij dhe dora e tij.” Buhariu 11/308 dhe Muslimi 2988.

Ky hadith tregon vlerën e ruajtjes së gjuhës dhe se musliman më i mirë është ai i cili e ruan gjuhën e tij nga përgojimi, shpifjet, nënçmimi apo fyerjet e ndryshme. Kështu na ka porositur Pejgamberi salallahu alejhi ue selem në një hadith tjetër, që të kemi kujdes nga gjuha sepse ka mundësi që gjuha të bëhet shkaktare e të na fusë Allahu subhanehu ue teala në xhehenem përgjithmonë. Transmeton Ebu Hurejra se e ka dëgjuar Pejgamberin salallahu alejhi ue selem duke thënë: “Me të vërtetë një rob i Allahut e flet një fjalë për të cilën nuk e di se a është e mirë apo e keqe (nuk kujdeset se ç'flet), e që do të futet në thellësinë e xhehenemit në largësi të lindjes me perëndimin.” Buhariu 11/308 dhe Muslimi 2988.

Transmeton Sufjan ibn Abdullahu, se e ka pyetur Pejgamberin salallahu alejhi ue selem: “O i Dërguar i Allahut, tregomë për diçka që t’i përmbahem.” Pejgamberi salallahu alejhi ue selem tha: “Thuaj: Kam besuar në Allah dhe pastaj qëndro pas saj.” I thashë: “O i Dërguar i Allahut, cila është gjëja që më së shumti ke frikë se mos do të më sjellë dëm?” Pejgamberi salallahu alejhi ue selem kapi gjuhën e tij dhe tha: “Kjo.” Tirmidhiu 2410 dhe ka thënë se ky hadith është hasen- sahih.

Pra, gjëja që më së shumti prej së cilës duhet të ketë kujdes njeriu është gjuha, sepse gjuha të çon në harame, shirk dhe kufër. Transmeton Ukbe ibn Amiri, se e ka pyetur Pejgamberin salallahu alejhi sue selem duke i thënë: “O i Dërguar i Allahut, cila është rruga e shpëtimit?” Pejgamberi salallahu alejhi ue selem tha: “Kape gjuhën tënde, le të të rrethojë shtëpia dhe qaj për mëkatet e tua.” Tirmidhiu 2406 dhe ka thënë hadithi është hasen.

O ju muslimanë, kini kujdes nga gjuha, t’i ruajmë gjuhët tona nga shpifjet, përgojimi, sharjet, fyerjet e sidomos nga përgojimi i hoxhallarëve, gjë e cila është bërë e zakonshme tek ne. Ka mundësi njeriu nuk e kontrollon gjuhën e tij, mirëpo kjo gjuhë do të jetë shkaktare për hedhjen e tij në zjarr të xhehenemit. Allahu na ruajttë dhe na forcoftë në fenë e Tij!

 

Përgatiti: Eroll Nesimi
12.7.2008