Thotë Allahu i Madhëruar në Kuranin Famëlartë: “Dhe binduni Allahut dhe të Dërguarit të Tij e mos u përçani mes veti e të dobësoheni e të humbisni fuqinë.” (El-Enfal, 46)
   I Dërguari alejhi selam thotë: “Vërtetë shejtani i ka humbur shpresat se do të adhurohet përsëri nga falësit në Gadishullin Arab, por do të mund t’i ngatërrojë ata dhe të ndërpresë marrëdhëniet mes tyre.” Transmeton Muslimi.
   Në këtë hadith profetik, i Dërguari alejhi selam na tregon qartë se shejtani nuk do të ketë më fuqi që të ndikojë tek njerëzit për të adhuruar tjetërkënd përveç Allahut, por do të ketë fuqi që të ndikojë në përçarjen mes tyre. Për këtë i Dërguari alejhi selam vazhdimisht këshillon të mos përçahemi, pasi kjo gjë është prej shejtanit dhe s’ka si të jetë përçarësi vetëm se ushtar vullnetar i shejtanit. I Dërguari alejhi selam kur e dërgoi Ebu Musa El-Eshariun dhe Muadh Ibn Xhebelin në Jemen, i urdhëroi duke u thënë: “Lehtësoni e mos vështirësoni, përgëzoni e mos largoni (mos u bëni shkak për largim), bashkëpunoni e mos u përçani.” Transmeton Buhariu dhe Muslimi.
   Allahu në Kuran thotë: “Ndihmohuni në të mirë e devotshmëri e mos u ndihmoni me të këqija e armiqësi.” (Maide, 2)
   Nëse muslimanët do të ndihmohen mes tyre, do të thotë se janë të bashkuar dhe mbi ta do të zbresë mëshira e Allahut, se përndryshe do të vijnë dënime nga më të ndryshmet. Për këtë i Dërguari alejhi selam thotë: “Xhemati (bashkësia) është mëshirë, ndërsa përçarja është dënim.” Transmeton Ahmedi.
   “Ai i cili e dëshiron mesin e xhenetit, le t’i bashkëngjitet xhematit (bashkësisë islame), sepse shejtani është më atë që rri vetëm, ndërsa te dy vetë ai është më larg.” Transmeton Ahmedi. Në një transmetim tjetër të Nesaiut thotë: “Shejtani vrapon për tek ai i cili ndahet.”
   Hudhejfe ibn Jemani i thotë të Dërguarit alejhi selam: “Çfarë më urdhëron të bëj nëse më arrin koha e fitneve (përçarjeve dhe çrregullimeve)?”
I Dërguari alejhi selam i thotë: “Bashkëngjitu xhematit musliman dhe prijësit të tij.” Transmeton Buhariu dhe Muslimi.
   Abdullah ibn Mesudi dëgjon dikë të këndojë Kuranin jo ashtu siç e kishte dëgjuar nga i Dërguari alejhi selam, e merr atë për dore për tek i Dërguari alejhi selam dhe ai u thotë: “Që të dy këndoni mirë, por mos u përçani, sepse ata që ishin përpara jush u përçanë dhe u shkatërruan.” Transmeton Buhariu dhe Muslimi.
   Abdullah ibn Amr ibnul-Asi tregon se një ditë ishte tek i Dërguari alejhi selam dhe dëgjoi dy burra që po debatonin për një ajet. Atëherë i Dërguari alejhi selam doli i nervozuar dhe u tha: “Vërtetë ata që ishin përpara jush u shkatërruan pasi u përçanë në librin e tyre.” Transmeton Muslimi.
   Vërtet kur muslimanët përçahen, tek ata ka zbritur dënimi prandaj dhe duhet të bashkohen aty ku është xhemati, sepse nga përçarja përfitojnë vetëm armiqtë e Islamit, të cilët punojnë natë e ditë për të fikur dritën e imanit, besimin e pastër. Ata duan me çdo kusht të përçajnë unitetin mes muslimanëve, duke nxitur përçarje, urrejtje, konflikte dhe luftë ndërmjet tyre. E pse pra muslimanët të bëhen dhurues vullnetarë për këtë? Vetëm bashkimi do t’i kthejë muslimanët aty ku kanë qenë, pasi aty ku ka bashkim, zbret mëshira e Allahut. Nëse shikon se muslimanët përçahen, mos u mundo të bëhesh me njërën palë dhe të lësh tjetrën, pasi Allahu na urdhëron që t’i pajtojmë dhe jo t’i fryjmë zjarrit edhe më shumë, se kështu s’do të mësosh kurrë të vërtetën e as bartësit e saj. Të parët tanë të mirë kanë thënë: “E vërteta nuk njihet me burrat. Njihe të vërtetën e do të njohësh bartësit e saj.”
   I Dërguari alejhi selam thotë: “Vërtetë do të ndodhin më vonë trazira, çrregullime dhe përçarje. Në këtë kohë merre shpatën tënde dhe godit me të malin e Uhudit, derisa shpata të prishet. Pastaj ulu në shtëpinë tënde derisa të vijë ndonjë dorë gabimtare ose vdekja.” Transmeton Ahmedi.
   Në një transmetim tjetër thotë (për kohën e çrregullimeve dhe përçarjeve): “Lëri ato grupime që të gjitha, edhe sikur të qëndrosh i lidhur pas një peme derisa të të vijë vdekja.”
   E lusim Allahun e Madhëruar t’i bashkojë muslimanët dhe t’i mëshirojë kudo qofshin në botë!

Mustafa Tërniqi
23.5.2008