Falënderimet dhe lavdërimet i takojnë vetëm Allahut xhele shanuhu. Salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanët që ndjekin rrugën e tij deri në Ditën e Gjykimit.
   Allahu i Lartësuar thotë: “Vërtet, ata të cilët ndaj madhërisë së Zotit të tyre kanë frikë, ata, të cilët u besojnë argumenteve të Zotit të vet, dhe ata, të cilët nuk i përshkruajnë shok Zotit të vet dhe ata të cilët japin (sadaka-zekat) nga ajo që u është dhënë, pse dinë se do të kthehen te Zoti i tyre, andaj zemrat e tyre i kanë të frikësuara. Të tillët janë duke nxituar drejt të mirave dhe të parët do t’i arrijnë ato.” (El Muminun 57-61)
   Transmeton Aishja, Allahu qoftë i kënaqur me të, se e ka pyetur të Dërguarin e Allahut, paqja dhe bekimi qofshin mbi të, për ajetin në të cilin Allahu i Lartësuar thotë: “...dhe ata të cilët japin (sadaka-zekat) nga ajo që u është dhënë, pse dinë se do të kthehen te Zoti i tyre, andaj zemrat e tyre i kanë të frikësuara.” Ka thënë Aishja: “A janë këta persona ata të cilët pinë alkool dhe vjedhin?” I Dërguari, paqja dhe bekimet qofshin mbi të, tha: “Jo, o bija e Siddikut (të sinqertit, Ebu Bekrit). Këta janë ata persona që agjërojnë, falin namaz, japin zekat dhe megjithatë frikësohen se mos veprat e tyre nuk pranohen nga Allahu (i Lartësuar). Këta janë ata të cilët shpejtojnë në vepra të mira.” Sunen Etermidhi 3175.
   Nga kjo shohim se shokët e të Dërguarit, paqja dhe bekimi qofshin mbi të, edhe pse kanë nxitur për bërjen e veprave të mira, janë frikësuar se mos po u asgjësohen veprat e mira dhe nuk u pranohen.
   Ebu Derda ka thënë: “Sikur ta di se Allahu i Lartësuar m’i ka pranuar mua dy rekate namaz që i kam falur, do të jetë më e dashur për mua sesa e gjithë dynjaja dhe çka ka në të, sepse Allahu i Lartësuar thotë:  “Me të vërtetë Allahu (i Lartësuar) ua pranon veprat të devotshmëve.”
   Kurse Abdullah ibn Ebi Melike ka thënë: “Kam takuar tridhjetë shokë të të Dërguarit, paqja dhe bekimi qofshin mi të. Që të gjithë frikësoheshin nga nifaku (hipokrizia).”
   E lusim Allahun e Lartësuar që të na bëjë prej njerëzve të devotshëm dhe të na i pranojë veprat!

Përktheu: Eroll Nesimi
23.5.2008