Frika

 

Frika

Secili prej nesh ka frikë, e cila ndryshon varësisht nga aftësitë tona. Fjala vjen, nëse një grua e do bashkëshortin tej mase, ajo do të frikësohet se do ta humbasë. Nëse një person e çmon karrierën e tij apo të saj, ai ose ajo nuk do të jetë në gjendje të bëjë gjumë si duhet, e gjithë kjo vjen si rezultat i frikës se do ta humbë punën ose karrierën. Kur frikësohemi, bëhemi edhe më të dobët sepse nuk vetëpërmbahemi nga emocionet. Nëse mbizotëron frika, atëherë çfarë lypset nga ne që të bëhemi më të fortë? Mënyra më e mirë për këtë do të ishte zëvendësimi i frikës negative me atë pozitive. Kur themi ‘frikë negative’, kemi për qëllim çdo frikë që lidhet qoftë me njeriun, siç është frika se po humbasim të dashurin apo frika ndaj sendeve e objekteve, fjala vjen se mos do të humbasim paratë, punën, karrierën etj. Kurse sa i përket ‘frikës pozitive’, kam për qëllim frikën ndaj Krijuesit të gjithësisë. Kur njeriu ia ka frikën Allahut, padyshim se sjellja e administrimi ynë do të jetë e denjë për çdo lëvdatë, pasi duke pasur në mendje frikën ndaj Allahut, jemi të vetëdijshëm 24 orë se Ai është duke na mbrojtur në çdo moment.

Një gjë duhet ta kemi parasysh, kur kemi të bëjmë me frikën ndaj Allahut. Ajo s’duhet kuptuar si diçka tmerruese apo frikësuese. Në të kundërtën, ajo është e vërteta ngase me kuptimin e frikës ndaj Allahut, do të shohim se ajo na sjell më afër kuptimit dhe afrimit të Mëshirës së Tij. Prandaj, me gjithë këtë do të themi: Vepro dhe sillu mirë nga dashuria e respekti për Krijuesin e Mëshirshëm i Cili na ka krijuar, vërtet ky lloj i frikës është i bukur e i ëmbël. Kjo i ngjan shembullit të një nëne të mrekullueshme prej së cilës dëshirojmë të dëgjojmë atë që kërkon ajo. Nga falënderimi dhe mirënjohja ndaj saj, veprojmë gjëra të mira për hir të saj. Kjo dashuri sjell edhe frikën se mos po bëjmë gjynah. Me të vërtetë Kurani flet rreth atyre që ia kanë frikën Allahut e të cilët janë në rrugën e drejtë:

“E drejta e përkujdesjes së xhamive të Allahut është vetëm e atij që i ka besuar Allahut dhe Ditës së Fundit, që fal namazin, jep zekatin e nuk i frikësohet askujt tjetër përveç Allahut. Të tillët janë ata të udhëzuarit."1 

“Ndërsa, ata që besuan dhe bënë vepra të mira, të tillët janë krijesa më e dobishme. Shpërblim për ta te Zoti i tyre janë: vendet në xhenete nëpër të cilët burojnë lumenj, ku janë përgjithmonë, pa ndërprerje. Allahu është i kënaqur me ta e edhe ata janë të kënaqur prej Tij. E ky është për atë, që i ka pasur frikën Zotit të vet.” 2 

Nga ajetet e mësipërme pamë se ky ishte grupi i njerëzve të cilët do të shpërblehen me xhenete nga Allahu i Madhërishëm. Me të vërtetë, Ai ishte i kënaqur me ta dhe për këtë do të hyjnë në xhenet. Ky ishte shembulli i bukur i miratimit të zëvendësimit të frikës negative me atë pozitive.