Përshëndetja

   Edhe përshëndetja në këtë rast ka të bëjë me zbatimin e mësimeve kuranore në jetën tonë të përditshme, kështu që kur të takojmë dikë, e kemi për detyrë që ta përshëndesim në mënyrën më të mirë.
   Allahu i Gjithëmëshirshëm në Librin e Tij Famëlartë thotë: “Kur përshëndeteni me ndonjë përshëndetje, kthejeni përshëndetjen edhe më të mirë, ose po ashtu. Allahu llogarit për çdo gjë.”1
   Ky ajet kuranor na bën të kuptojmë se Allahu xh.sh. llogarit për çdo gjë, pra edhe përshëndetja merret në shqyrtim. Ka të ngjarë që shumë jomuslimanë i përshëndesin muslimanët me përshëndetjen islame Esselamu Alejkum (Paqja e Allahut qoftë mbi ju) dhe më bën të mërzitem pa masë kur shoh muslimanët duke mos e kthyer përshëndetjen.
   Kur pata rastin t’i pyes për shkakun e sjelljes së tyre në lidhje me këtë problematikë, m’u përgjigjën duke thënë: “Kemi frikë se ata janë duke u tallur me ne.” Për ne nuk është me rëndësi që të merremi me atë se a janë duke u tallur apo janë të sinqertë në dhënien e selamit! Në fakt, ne s’mund të themi se kjo është e vërtetë, për arsye se nuk posedojmë mundësinë e të lexuarit të qëllimeve të tyre; nuk jemi përgjegjës e as nuk kemi kompetencë mbi këtë çështje, ne kemi përgjegjësi për veprat dhe për punët tona, pra kudo qoftë dhe sa herë që dikush na përshëndet, jemi të obliguar t’ia kthejmë selamin, kjo sipas ajetit të lartpërmendur, i cili na mëson që nëse nuk e kthejmë përshëndetjen më të mirë, atëherë t’u kthejmë një përshëndetje të ngjashme me të tyren.

Haxhah Liza Abdullah
Shqipëroi: Mr. Feim Dragusha
30.5.2008