Bixhozi dhe pijet alkoolike

Nga metodat e tjera që përdor shejtani për t’i humbur njerëzit është edhe përdorimi i pijeve alkoolike e bixhozi. A ka dëgjuar dikush ndonjëherë gjëra të mira që sjellin bixhozi e pijet dehëse? Kurrë, që të dyja këto dukuri duken që mbarojnë me një përfundim të ngjashëm: familja lihet në harresë, shkatërrohet dhe çdo gjë shuhet. Cila është këshilla e Krijuesit për ne?

“Të pyesin ty për verën dhe bixhozin. Thuaj: ‘Që të dyja janë mëkat i madh, e ka edhe dobi në to (të pakta) për njerëz, por dëmi i tyre është më i madh se dobia e tyre.’ Të pyesin ty edhe se ç’do të japin. Thuaju: ‘Tepricën’! Kështu jua sqaron Allahu argumentet ashtu që të mendoni (çka është e mirë e çka është e keqe).”1

Po ashtu në suren El-Maide, Allahu xh.sh. thotë: “O ju që besuat, s’ka dyshim se vera, bixhozi, idhujt dhe hedhja e shigjetës (për fall) janë vepra të ndyta nga shejtani. Pra, largohuni prej tyre që të jeni të shpëtuar. Shejtani nuk dëshiron tjetër, përveç se nëpërmjet verës e bixhozit të hedhë armiqësi mes jush, t’ju pengojë nga të përmendurit e Zotit dhe t’ju largojë nga namazi. Pra, a po u jepni fund (alkoolit e bixhozit)?”2

Kurani na tregon gjerësisht se konsumimi i pijeve alkoolike, bixhozi, llojet e drogave, të gjitha këto janë shpikje dhe sajime të shejtanit, prandaj qëllimi i tij është që nëpërmjet tyre të sjellë urrejtje, armiqësi dhe përçarje në mes nesh. Sa e sa martesa janë prishur si rezultat i këtyre veprave të ndyra? Sa fëmijë gjenden nëpër spitale si shkak i rrahjes nga prindërit e tyre pijanecë? Sa gra duhet të vuajnë për shkak se i kanë burrat përdorues të alkoolit, drogës e bixhozit? Kemi edhe gra të cilat konsumojnë alkoolin, thua se në të gjitha sëmundjet shoqërore nuk ka dallim mes mashkullit dhe femrës... është vërtet për t’u pikëlluar. Kur njeriu konsumon alkool, drogë, ai harron edhe ekzistimin e Allahut, pasi i dehuri nuk di çfarë bën, ndaj edhe nuk është i obliguar për t’u falur. E tërë kjo vjen si rezultat i asaj se njeriu i dehur nuk mund ta kontrollojë mendjen dhe nuk di se ç’flet përderisa është i dehur.

Po ashtu kryerja e namazit nga këta njerëz në rrethana të tilla nuk ka fare kuptim, për arsye se të falurit është koha në të cilën njeriu gjatë kryerjes së tij, komunikon me Zotin pa ndërmjetës. Lidhur me këtë, Fuqiploti thotë: “O ju që besuat, mos iu afroni namazit duke qenë të dehur, derisa të dini se ç’flitni, e as duke qenë xhunubë (të papastër) derisa të laheni, me përjashtim kur jeni udhëtarë. Nëse jeni të sëmurë, jeni në udhëtim, ose ndonjëri prej jush vjen nga ultësira (nevojtorja) apo keni prekur gratë e nuk gjeni ujë, atëherë prekeni dheun dhe fërkoni me të fytyrat dhe duart (për tejemmum). Allahu shlyen e fal mëkatet.”3

Nga ky ajet kuranor mësojmë dy aspekte të rëndësishme; aspekti i parë është nevoja për të ditur se çfarë themi gjatë kryerjes së namazeve, ndërsa aspekti i dytë ka të bëjë me pastërtinë personale.

Haxhah Liza Abdullah
Shqipëroi: Mr. Feim Dragusha
29.8.2008