Premtimet


Pothuajse çdo ditë, si rezultat i rrethanave të ndryshme, ne u premtojmë njerëzve se do t’i takojmë në ditët e ardhshme apo në një kohë tjetër, në javën apo në muajin e ardhshëm! Kjo nuk është asgjë tjetër veçse premtim, as më shumë e as më pak dhe prapë konsiderohet gabim, për arsye se shumë gjëra i marrim si të mirëqena e të garantuara. I premtojmë dikujt se do të pjekim një ëmbëlsirë apo do t’i ndihmojmë me detyra të përditshme. Sillemi sikur të ishim të sigurt se e nesërmja do të na gjejë të gjallë dhe, duke vepruar në këtë mënyrë, e marrim jetën si të garantuar e s’ia dimë vlerën dhe rëndësinë që ka. Ne jemi mendjemëdhenj, thua se çdo gjë varet nga ne dhe dëshira jonë mjafton për ta mbajtur premtimin. Sikur ta dinim, do të kuptonim se çdo akt i thjeshtë në jetë, aq sa edhe ngritja e gishtit, varet nga Krijuesi dhe Sunduesi i kësaj gjithësie.

Allahu i Plotfuqishëm thotë: “Dhe mos thuaj kurrsesi për ndonjë çështje: ‘do ta bëj këtë nesër!’ Thuaj vetëm: ‘Në dashtë Allahu!’ E kur të harrosh, përmende Zotin tënd e thuaj: ‘Shpresohet se Zoti im do të më japë udhëzim edhe më të afërt se ky.”1

Nga ajetet e lartpërmendura duhet të mësojmë se çdoherë kur t’u premtojmë njerëzve, duhet shtuar edhe pjesa e ajetit “Në dashtë Allahu!” Vetëm në këtë mënyrë kuptojmë se çdo gjë qëndron në duart e Allahut, prandaj nuk kemi përse të brengosemi, pasi tashmë jemi mbështetur në diçka të vërtetë e të drejtë. Nëse hasim në harresë të këtij ajeti, atëherë duhet kërkuar ndihmë nga Allahu që të na udhëzojë më shumë herëve të tjera.

Në anën tjetër, sa më shumë që të shtojmë “Në dashtë Allahu” aq më shumë duhet pasur kujdes që çdo gjë që veprojmë të jetë brenda kornizave të mundësive tona, në mënyrë që të arrijmë në takime në kohë, t’i mbajmë premtimet si dhe çdo gjë që kemi marrë përsipër.

Allahu xh.sh thotë: “Meqë keni premtuar, zbatojeni premtimin e dhënë Allahut, e mos i prishni betimet pasi i keni vërtetuar ato, duke qenë se Allahun e bëtë garant tuajin. Vërtet, Allahu e di se çfarë punoni.”2

Ajo që duhet të kuptojmë këtu është se sa herë që t’i premtojmë ndokujt, duhet pasur në mendje se Allahu është dëshmitar për atë që gjuha jonë shqipton, prandaj asnjëherë nuk duhet t’i thyejmë betimet dhe premtimet e dhëna, pa marrë parasysh rrethanat.