Fuqia e fjalëve


Edhe fjalët janë një aspekt shumë i rëndësishëm i jetës sonë të përditshme. Disa njerëz vetëm flasin, disa nuk flasin aq shumë e ka të tjerë që flasin pa masë. Sido që të jetë, këtu nuk është me rëndësi se sa flasim, shumë a pak, ajo që ka rëndësi në këtë temë është se çfarë flasim. Gjithmonë duhet të kemi kujdes rreth fjalëve që përdorim, për arsye se lidhjet familjare mund të prishen si rezultat i fjalëve. Fjalët janë aq të ndjeshme saqë mund të lëndojnë personin tjetër apo mund të sjellin humbjen e shokëve, madje edhe të afërmve tanë.

Pa dyshim, falja është gjithmonë e mundshme, por a mundet dikush ta hapë zemrën e tij përsëri pasi t’ia ketë lënduar dikush, duke bëre që ajo të pikojë gjak? Në Kuran kemi një parabolë shumë të bukur lidhur me fjalët:

“A nuk e ke kuptuar se si Allahu bëri shembull: fjalën e mirë si pema e mirë që rrënjët e saj janë thellë (në tokë) e degët e saj janë lart, e që me vullnetin e Zotit, ajo e jep frytin e vet në çdo kohë. Allahu, pra, u parashtron njerëzve shembuj, që ata të mendojnë. Dhe shembulli i fjalës së keqe është si një pemë e keqe që është shkulur mbi tokë e që nuk ka të qëndruar.”1

“E ti thuaju robërve të Mi: “Le ta thonë atë që është më e mira, sepse shejtani ndërsen mes tyre e dihet që shejtani është armik i hapët i njeriut.”2

Do të ishte mirë sikur ta kishim ngulitur në mendje këtë parabolë të bukur kuranore dhe më pas do të kishim vërejtur fuqinë që zotërojnë fjalët, në formën e pemës së mirë me shumë fruta; asnjëherë nuk duhet harruar se ç’mund të sjellin fjalët e këqija. Gjithmonë duhet ta kemi parasysh porosinë e Allahut të Madhërishëm që të përdorim vetëm fjalë të mira; përndryshe do të gremisemi në duart e shejtanit.

Jemi të porositur gjithashtu që të flasim në mënyrë të drejtpërdrejtë. Në fakt, nëse flasim me shprehje të cilat përmbajnë më shumë se një kuptim përdorimi i tyre do t’i çorientojë njerëzit në kahje të ndryshme. Allahu i Plotfuqishëm thotë:

"O ju besimtarë, përmbajuni mësimeve të Allahut dhe thoni fjalë të drejta. Ai (Allahu) ju mundëson të bëni vepra të mira dhe ju shlyen gjynahet, e kush e respekton Allahun dhe të Dërguarin e Tij ka arritur sukses të madh.”3

Duke e bërë të sigurt se atë që e themi, është e çiltër, e drejtë dhe e vërtetë dhe duke mos u sjellë rreth e rrotull, do të arrijmë që t’i mënjanojmë të gjitha llojet e keqkuptimeve. Në të njëjtën kohë, duhet shtuar se fjalët e mira janë shumë me rëndësi. Allahu i Madhërishëm thotë:

“Një fjalë e mirë dhe një lehtësim (që i bëhet lypësit) është më e dobishme se lëmosha që përcillet me të keqe. Allahu nuk ka nevojë për askënd, Ai është i butë.”4

Nga ky ajet shohim rëndësinë që i është kushtuar fjalëve të mira si dhe mbikëqyrjes së gabimeve të njerëzve kur lëmoshat e tyre përcillen me të keqe. Si rrjedhim, nëse vërejmë në vetvete shtysa që të themi fjalë të vrazhda apo t’i shikojmë gabimet e të tjerëve, ne duhet të përmbahemi, duke përdorur në vend të shprehjeve të papëlqyeshme fjalë të mira.