Pyetja:

Selam alejkum!
Desha t’ju pyes se si duhet të lutem para varrit të fëmijës tim.


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Edhe ne ju përshëndesim me selam dhe ju urojmë çdo të mirë në këtë botë dhe në botën tjetër!
Nga përmbajtja e pyetjes kuptojmë se ju jeni sprovuar me humbjen (vdekjen) e fëmijës. Pa dyshim vdekja është e rëndë për të gjithë, por humbja e fëmijës për nënën është më e vështira. Lusim Allahun e Lartësuar t`ju japë durim në këtë fatkeqësi dhe t`jua kompensojë me të mira këtë mërzi!
Ndërsa në lidhje me pyetjen se si duhet të luteni para varrit të fëmijës, ju themi se vizita e varrezave në përgjithësi për muslimanin synon dy objektiva:

1- Që muslimani me këtë vizitë ta kujtojë vdekjen dhe ahiretin dhe se fundi i tij së shpejti do të jetë ose xheneti ose xhehenemi, prandaj muslimani me këtë e këshillon veten dhe vetëdijesohet se për çfarë ia vlen të japë mund me të drejtë. Ky është objektivi kryesor i vizitës së varrezave për muslimanin, ashtu si kuptohet edhe nga hadithi i Muhamedit salallahu alejhi ue selem: “...vizitoni varrezat, sepse ato ua përkujtojnë vdekjen.” (Buhariu dhe Muslimi).
Gjithashtu thotë: “Unë ju pata ndaluar nga vizita e varrezave, por tani vizitojini ato, se kjo ua përkujton botën tjetër.”

2- Qëllimi tjetër është që të bëjmë lutje dhe të kërkojmë falje nga Allahu i Lartësuar për të vdekurit e varrosur.
Gjithashtu edhe ju gjatë vizitës synoni këto dy gjëra dhe mund të lusni Allahun e Lartësuar për fëmijën tuaj, që ta mëshirojë e t`ju bashkojë me të në xhenet.

Gjatë vizitës së varrezave është sunet të këndohet një lutje e posaçme, të cilën na e tregon i Dërguari salallahu alejhi ue selem në hadith.
“ES-SELAMU ALEJKUM EHLED-DIJARI MINEL-MU'MINIINE VEL MUSLIMIINE VE INNA INSHA-ALLAHU BIKUM LAHIKUN. NES'ELU-ILAHE LENA VE LEKUM EL-AFIJE.”. Në shqip: “Es-selamu alejkum o ju banorë të këtij vendi, besimtarë e muslimanë. Edhe ne inshallah, me urdhrin e Allahut, kur të vijë përcaktimi i Tij, me ju do të radhitemi. Lusim Allahun për ne dhe për ju që të na mëshirojë!”

Gjithashtu preferohet të bëjmë lutje të ndryshme për faljen e mëkateve për shpëtimin e tyre, shpërblimin me xhenet, etj.
Lejohet edhe të ngrihen duart gjatë lutjes, por kërkohet që gjatë lutjes të kthehemi nga kibla dhe jo nga varret. Pastaj është mirë që gjatë vizitës ta kujtojmë veten se aty do të jetë vendbanimi i ardhshëm i yni dhe të mundohemi të shfrytëzojmë nga koha jonë e mbetur.

Gjatë ecjes në varreza është sunet që t`i zbathim këpucët, ashtu si vërtetohet në një hadith që arrin shkallën e hasenit. Por nëse ecja pa këpucë është e vështirë, atëherë lejohet të ecim të mbathur. Është e ndaluar që të shkelim mbi varre. Këto ishin disa norma që kanë të bëjnë me vizitën e varrezave.