Pyetja:

 Selam ajekum ve rahmetullahi ve bereketuhu!
Jam në lidhje, por nëna e tij nuk pajtohet dhe prej që e ka marrë vesh, ne grindemi. A mund të na ketë bërë magji, edhe pse besimtarët zor i kap. Po ne jemi duke u grindur shumë kohët e fundit shumë shumë e pakuptueshme edhe pse të dy bëhemi pishman.
Allahu ju shpërbleftë!


Përgjigjja:

Motër e nderuar, kemi folur me dhjetëra herë rreth lidhjeve të cilat krijohen në mes të një mashkulli dhe femre para se të definohet se si do të jetë raporti i ardhshëm i tyre. Me këtë rast ne edhe një herë e theksojmë se të gjitha format e kontaktit dhe shoqërimit në mes të dy të rinjve, jashtë martese apo fejese, në Islam konsiderohen të papranueshme. Prandaj, ju këshillojmë që ta verifikoni sjelljen e këtillë dhe menjëherë ta ndërprisni këtë formë të kontaktit, ashtu si ju e quani “lidhje”, nëse dëshironi të arrini kënaqësinë e Allahut. Fatkeqësisht për këtë arsye shpeshherë edhe të rinjtë paguajnë çmimin e kundërshtimit të normave të fesë sonë, të cilat janë të vendosura shumë qartë dhe në dobi të njeriut.
Gjithashtu ju këshillojmë që pasi ta ndërprisni kontaktin të filloni të punoni në format e njohura dhe të lejuara se si ta realizoni bashkimin tuaj. Nëse ai djalë ka interes për ju dhe qëllimi i tij është i ndershëm, atëherë me këtë ju realizoni dëshirën tuaj duke mos hidhëruar Zotin. Nëse qëllimi i tij ishte vetëm dëfrimi dhe zbavitja, atëherë kjo ndërprerje është më e mirë për ju. Pastaj gjatë kësaj kohe edhe ju bisedoni me familjen dhe sqarohuni, gjithashtu edhe ai le të bisedojë me të familjes (nënën) dhe le ta sqarojë se ai është i interesuar të martohet. Në këtë nuk ka asnjë të keqe dhe është shumë normale, por e keqja është në vazhdimin e takimit tuaj me djalin.