Pyetja:

Selam alejkum! Unë jam një motër e re 18-vjeçare dhe jam njoftuar me një vëlla musliman që prej një kohe të gjatë. Ia kemi dhënë fjalën njëri-tjetrit që do të presim derisa të vijë koha për t’u fejuar... Përveç disa takimeve që kam zhvilluar me motrën time dhe me të, asgjë më tepër nuk kam bërë. Mirëpo tani ai është mërzitur nga pritja e gjatë dhe po kërkon nga unë që të fejohemi, ta kemi hallall lidhjen, është i pajtimit që të shkollohem, por kurrsesi të presë deri në fund të shkollimit dhe më ka thënë që nëse nuk fejohemi brenda disa muajsh, do të më lërë. Dëshiroj edhe unë që të fejohem, por dua që t’i vazhdoj studimet deri në fund e pastaj të fejohem, pasi e kemi farz ta kërkojmë diturinë. Kam frik dhe mendoj që nuk më lejojnë kurrsesi familja të fejohem kaq e re. Por ai është këmbëngulës në qëndrimet e tij dhe është kategorik që ose të fejohemi ose ta ndërpresim lidhjen tonë, gjë të cilën unë nuk e dua. Andaj më këshilloni çfarë të bëj, a është më primare mendimi i tij që të fejohemi apo mendimi im që të presim edhe ca vite në këtë gjendje, të vazhdoj shkollimin e më pas të fejohemi?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Motër e nderuar për problemin e raportit në mes meshkujve dhe femrave kemi folur në dhjetëra përgjigje të mëhershme, prandaj kthehuni aty dhe lexoni se si duhet të veprojmë kur dëshirojmë të zgjedhim partnerin e jetës sonë. Lexo përgjigjet numër: 337, 159, 151, 144, 47

Prandaj duke mos u zgjeruar themi se qëllimi juaj, që të krijonit kontakt me djalin në fjalë, ishte hap i gabuar dhe me këtë ju keni rënë në mëkat. Derisa ju keni ndërmend të kryeni shkollë dhe jeni e bindur se kjo është ajo që dëshironi të bëni, pra në këtë moshë ju mendoni se ende është herët të lidhni fejesë dhe se për këtë nuk janë kushtet, pasi edhe familja do të kundërshtojë, atëherë pse tentoni të njoftoheni me djem të huaj? Do t`ju kishim këshilluar që të mos merreni tani me çështjen e martesës për shkak se kështu nuk do të mund të arrini suksese në mësime. Gjithashtu edhe refuzimi i familjes është i arsyeshëm, pasi mosha 18-vjeçare është ende e hershme që të ndërmerrni hapa të këtillë.

Sido që të jetë, ne do t`ju këshillonim që ta ndërprisni kontaktin me atë djalë dhe të mos nxitoni në marrjen e vendimeve në atë moshë, pasi ato vendime kanë të bëjnë me tërë pjesën e mbetur të jetës suaj. Allahu e di më së miri!
 

Alaudin Abazi
8.2.2009