Pyetja:

Selam alejkum!
E nderuara redaksi, kam një pyetje për ju, të cilën nëse keni mundësi ma ktheni sa ma parë.
A është e lejueshme të shikohet filmi i ri amerikan "2012", i cili tregon si do të duket dita e kiametit.
Faleminderit shumë.


Përgjigjja:

Ky film vërtet ka bërë një zhurmë të madhe në kinematografin botërore, pasi trajton një problem shumë delikat dhe tërheqës për njerëzit, përfundimin e kësaj bote. Nuk e kemi parasysh se nga cili aspekt ju ka shtyrë të pyesni se a lejohet të shikohet ky film apo jo, por themi se nëse është nga aspekti se në të ka parashikim të së ardhmes dhe besimtari është i kërkuar të mos dëgjojë paralajmërimet e parashikuesve, ashtu si thotë i Dërguari, lavdërimi dhe paqja qofshin mbi të: “Kush shkon tek parashikuesi dhe beson në atë çka ai thotë, vetëm se ka mohuar atë që i ka zbritur Muhamedit.” (Ebu Davudi)
Mendojmë se edhe pse nuk e kemi parasysh se ku është mbështetur skenari i filmit, çështja e fundit të kësaj bote dhe paralajmërimeve të ndodhive para kësaj ngjarje është një gjë për të cilën flitet në librin e Allahut shumë herë, edhe i Dërguari, lavdërimi dhe paqja qofshin mbi të, ka paralajmëruar në shumë hadithe rreth disa ngjarjeve që do të ngjajnë para kësaj. Pastaj rreth kësaj problematike flitet edhe në fetë e tjera, posaçërisht në atë krishtere dhe në mes Islamit dhe Krishterizmit ka disa aspekte të përbashkëta dhe disa të tjera të ndryshme. Sido që të jetë, mendojmë se të shikuarit e këtij filimi nuk ka të bëjë me shikimin dhe dëgjimin e lajmeve parashikuesve të së ardhmes, e cila është e ndaluar në Islam. Allahu e di më së miri!