Pyetja:

Selam alejkum!
Desha ta di a e ndryshon lutja e besimtarit kaderin dhe a lejohet të thuhen lutjet dhe të bëhet dua në gjuhen shqipe kur je me cikël mujor në Natën e Kadrit, nëse në 10 netët e fundit të Ramazanit je me cikël?


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Është e vërtetë që duaja (lutjet) ndryshon kaderin (caktimin) e Allahut xh.sh. dhe kjo nuk është përgjigjja ime personale, mirëpo është përgjigje e Pejgamberit alejhi selam në hadithin që e transmeton Ebi Othman en-Nehdij nga Selmani, Allahun qoftë i kënaqur me të, se Pejgamberi alejhi selam ka thënë: “Nuk e ndryshon kadanë (caktimin) asgjë, përveç duasë.” (Transmeton Tirmidhiu, Bezari dhe Hakimi)

Ibn Kajimi, Allahu e mëshiroftë, ka thënë: “Duaja (lutja) është prej shkaqeve shëruese dhe është armik i së keqes, në disa raste e parandalon të keqën, e shëron atë apo e largon të keqen, kurse në disa raste e pakëson dëmin e së keqes. Po ashtu duaja është arma e besimtarit, ashtu siç ka thënë Pejgamberi alejhi selam në hadithin që e transmeton Ali ibn ebi Talibi, se Pejgamberi alejhi selam ka thënë: “Duaja është armë e besimtarit.”

Kurse sa i përket pyetjes tënde, se a lejohet të thuhen duatë dhe të bëhet lutje në gjuhën shqipe kur je me cikël mujor në Natën e Kadrit, nëse në 10 netët e fundit të Ramazanit je me cikël, femrës kur është me cikël mujor nuk i lejohet namazi dhe agjërimi, kurse përveç namazit dhe agjërimit i lejohet çdo gjë, si duaja, përkujtimi i Allahut (dhikri) në mëngjes, në mbrëmje, kur bie të lejë, të thotë Kuran përmendësh etj.