Pyetja:

Selam alejkum!
Kam lexuar se po të thuhet kjo dua pas namazit, abdesti që ke marrë për atë namaz ngrihet lart nën Arshin e Allahut dhe bën tesbih për atë njeri deri në Ditën e Kiametit. Më tregoni se sa është e vërtetë kjo dhe nëse ka mundësi një përkthim të kësaj duaje. Allahu ju shpërbleftë për punën që po bëni.
Duaja është: “Esh´hedu en la ilahe il - lall -llahu vahdehu la sherike lehu ve esh´hedu enne muhammeden abduhu ve rresuluhu subhaneke allahumme ve bihamdike la ilahe il - la ente amiltu sue ve dhalemtu nefsi estadhfirruke allahumme ve etubu ilejke fedhfirrlitub aleje inneke ente´t - tev - vebu´rr-rrahim allahumme exh´alni minet-tev-vabine ve exh´alni min ibadike es-salihine ve exh´alni abden saburan shekurran ve exh´alni edhkurruke kethirran ve useb- behuke ukrraten ve esilan.”


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe të gjithë ata që ndjekin rrugën e tij deri në Ditën e Gjykimit.
   Lutja për të cilën ju bëni pyetje në këtë radhitje nuk është e njohur për ne. U munduam me aq sa kemi mundësi të hulumtojmë, por nuk e gjetëm në koleksionet e haditheve se është lutje e vërtetuar nga Muhamedi salallahu alejhi ue selem. Sido që të jetë, për të na ndihmuar në qartësimin e lutjes, mund të na dërgoni referencën se ku e keni lexuar. Kurse lutjet e vërtetuara nga hadithe të sakta, të cilat zakonisht i bënte Muhamedi salallahu alejhi ue selem pas përfundimit të abdestit, janë këto:

أشهد أن لا إله إلا الله وحده لا شريك له وأشهد أن محمداً عبده ورسوله

1- “Esh`hedu en la ilahe il-lallahu vahdehu la sherike leh ve esh`hedu en-ne Muhameden abduhu ve resuluhu.”

"Dëshmoj se askush tjetër dhe asgjë tjetër nuk meriton të adhurohet përveç Allahut të Vetëm e të Pashoq dhe dëshmoj që Muhamedi është rob dhe i Dërguari i Tij."

Muhamedi salallahu alejhi ue selem thotë: “Kush merr abdest dhe thotë: “Esh`hedu ... (lutja e sipërme) do t`i hapën dyert e xhenetit dhe ai do të hyjë në të nga cila derë dëshiron.” Shënon Muslimi.

اللهم اجعلني من التوابين، واجعلني من المتطهرين

2- “All-llahum-mexhalni mine tevabin vexhalni minel-mutetahirin.”

"O Allah! Më bëj prej atyre që pendohen, më radhit me të pastrit (nga gjynahet e papastërtitë)." Shënon Tirmidhiu.

سبحانك اللهم وبحمدك أشهد أن لا إله إلا أنت أستغفرك وأتوب إليك

3- “Subhaneke All-llahum-me ve bihamdike esh`hedu en la ilahe il-la ente estegfiruke ve etubu ilejke.”

"I Lartësuar je vetëm Ti, o Allah! Vetëm Ty të falënderoj. Dëshmoj se askush tjetër dhe asgjë tjetër nuk meriton të adhurohet përveç Teje, vetëm Ty të kërkoj mëshirë, vetëm nga Ti pres falje e mëshirë për gjynahet që bëj." Shënon Nesaiu në librin “Amel jevm ve lejle”.
 

Alaudin Abazi
28.3.2008