Pyetja:

Jam një vëlla besimtar dhe desha t’ju bëj një
pyetje: Pse në rubrikën e ueb faqeve që keni nxjerrë, kur janë të renditura të gjitha, nuk ndodhen edhe këto ueb faqe, p.sh. mburoja.net apo rrugetepaqes.net?
Veç pata dëshirë të di se a mos ka ndonjë dallim fetar mes jush dhe atyre apo çka është puna këtu, se sa për faqen tuaj nuk ka asgjë kundër, shumë mirë e keni të përgatitur dhe përgjigjet shumë mirë po i ktheni. Allahu ju shpërbleftë për mirëkuptimin!


Përgjigjja:

   Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
   Fillimisht dëshirojmë t’ju bëjmë të ditur se në faqen tonë nuk janë të renditura të gjitha linqet e faqeve islame në gjuhën shqipe të cilat prezantojnë Islamin. Ekzistojnë me dhjetëra faqe të tjera të cilat e bëjnë një gjë të tillë dhe janë për t`u falënderuar për kontributin që po japin në shërbim të Islamit dhe të muslimanëve, prandaj edhe një herë e cekim se nuk janë të renditura të gjitha faqet islame në faqen tonë.
   Pastaj vënia e linqeve të caktuara nuk është për ndonjë specifikë të atyre faqeve, që nuk e kanë të tjerat, kemi edhe shumë faqe të tjera që janë shumë të mira dhe ku spikatin tema të rëndësishme, por vënia e këtyre linqeve është bërë shumë herët, ndoshta edhe para se të hapeshin faqet që janë të pranishme tani dhe vënia e atyre linqeve është bërë edhe me kërkesë të këtyre faqeve, të cilat kanë shprehur interesimin që t’i kenë linqet e tyre në faqen tonë.
   Në anën tjetër, themi se me vënien e këtyre linqeve nuk do të thotë se këto linqe prezantojnë patjetër atë që redaksia e www.klubikulturor.com i sheh të sakta. Me fjalë të tjera, temat që publikohen në faqet islame në përgjithësi janë, në radhë të parë, qëndrime, mendime dhe komente personale të autorëve të tyre, pastaj edhe të redaksisë së faqes që i publikon ato. Në asnjë formë nuk do të thotë se materialet të cilat publikohen në faqet e tjera gjithmonë korrespondojnë patjetër me redaksinë e www.klubikulturor.com dhe ne nuk e marrim një përgjegjësi të tillë.
   Kjo deri këtu kishte të bënte me të gjitha faqet islame në shqip, por pasi në të gjitha përgjigjet tona mundohemi të jemi të hapur me të gjithë lexuesit, do të sqarojmë diçka edhe për faqet konkrete për të cilat bëni pyetje, se a kemi ndonjë dallim fetar me ta apo jo.
   Në radhë të parë, themi se nuk kemi ndonjë dallim thelbësor, në të kundërtën, këto faqe përmbajnë materiale të mira dhe të dobishme nga dijetarë të mirënjohur, por angazhimi i tyre ndaj disa problemeve, duke i dhënë kah të njëanshëm, dhënia e tyre pas kritikave të njerëzve të caktuar duke ulur, denoncuar, nënçmuar vlerën e tyre (në llogari të disa të tjerëve) edhe nëse ata kanë gabime, konsiderimi i disa mospajtimeve (për të cilat lejohet ixhtihadi dhe dallimi) si mospajtim i cili e nxjerr nga Ehli Suneti (metodologjia e selefit) personin që nuk pajtohet me ta, pastaj trajtimi i disa mospajtimeve që kanë ndodhur në mes të disa dijetarëve bashkëkohorë duke i komentuar ato vetëm me një anë të monedhës (vetëm ashtu si i kanë trajtuar këto mospajtime disa individë të caktuar), në anën tjetër heshtja ndaj disa gjërave të tjera për të cilat dëmtohen persona të caktuar dhe çështje e probleme të tjera.
   Përkthimi, publikimi dhe dhënia pas gjërave të këtilla është e panevojshme te ne, posaçërisht për rininë tonë, e cila ka nevojë të mësojë gjërat esenciale të fesë, të fitojë edeb (edukatë) të respektimit të njerëzve, në radhë të parë të dijetarëve. Pa dyshim çdonjëri gabon, gabojnë edhe hoxhallarët e dijetarët, por nuk na takon neve që të merremi me kritikimin e vazhdueshëm të tyre dhe preokupimi i rinisë sonë duhet të jetë mësimi i dijes së dobishme me të cilën arrijmë kënaqësinë e Allahut të Lartësuar në këtë botë dhe në botën tjetër.
   Për të qenë i drejtë dhe i sinqertë, jo vetëm tek ajo që publikohet në këto faqe, por në përgjithësi tek ata, kohëve të fundit vërehet një afrim dhe braktisje e kësaj metodologjie nga ana e tyre; shohim një interesim për bashkëpunim, pasi më herët bojkotonin dhe i denonconin thirrësit më të njohur të davetit në rajonet shqipfolëse. Prandaj, nëse në të ardhmen nga ana e tyre shprehet dëshira për ndonjë formë bashkëpunimi, qoftë edhe në vënien e linqeve, do të hasin në mirëkuptim nga ne. Lusim Allahun e Lartësuar të na përmirësojë në rrugën e Tij, të na japë unitet dhe sinqeritet në punën tonë! Amin!

Alaudin Abazi
1.2.2008