Pyetja:

Selam alejkum! Doja të dija për dy çështje. E para është në çështjen e besimit, se kur obligohet hixhreti dhe deri kur lejohet mosbërja e hixhretit.
Dhe e dyta është në çështjen e fik'hut, se cila është metoda më e saktë e mbajtjes së gishtit tregues së dorës së djathtë gjatë etehijjatit (respektivisht gjatë teshehudit).
Allahu ju shpërbleftë! Amin!
Selam alejkum!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe mbi të gjithë ata që ndjekin rrugën e tij deri në Ditën e Gjykimit.

Hixhreti është i detyruar në rast se jetojmë në një vend në të cilin jemi të privuar nga Islami, me fjalë të tjera nuk jemi të lirë të praktikojmë adhurimet thelbësore individuale, si namazi, agjërimi, etj. Gjithashtu nëse në këtë rast kemi ndonjë vend islam që mirëpret muslimanët e persekutuar dhe ua ka hapur derën atyre.

Te fukahatë në përgjithësi kemi mendime rreth mbajtjes së gishtit tregues të dorës së djathtë gjatë teshehudit. Nuk do të ndalem në sjelljen e thënieve me këtë rast, por do të përcjellim qëndrimin i cili përputhet me hadithet të cilat përshkruajnë formën se si e mbante Resulullahu gishtin në këtë vend. Gjatë uljes në teshehud, Muhamedi, lavdërimi dhe paqja qofshin mbi të, e vendoste dorën e majtë mbi gjurin e majtë, kurse gishtat e dorës së djathtë i mblidhte dhe me gishtin tregues tregonte drejt Kibles duke hedhur shikim drejt tij (gishtit tregues). Në rastin e tregimit me gishtin tregues drejt Kibles, gishtin e madh e vendoste mbi gishtin e mesëm (shënon Muslim dhe Ebu Avane). Dhe “e ngrinte gishtin duke e lëvizur dhe duke bërë dua me të (d.m.th. bënte dua gjatë lëvizjes së gishtit).” (Shënon Ebu Davudi, Nesaiu, Inbi Xharudi, Ibni Huzejmeja dhe Ibni Hibbani me sened të vërtetë) Dhe thoshte: “Kjo është më e rëndë për shejtanin se hekuri (d.m.th. gishti tregues).” Shënon Ahmedi, Bezzari, Ebu Xhaferi, Behteriu, Taberaniu, Abdulgani El -Makdisi në “Sunenin” e tij me sened të mirë dhe Bejhakiu.

Nga këto hadithe kuptojmë se Muhamedi salallahu alejhi ue selem e mbante gishtin tregues të dorës së djathtë të drejtuar nga kibla, kurse gishtat e tjerë të mbledhur. Gjithashtu disa transmetime tregojnë se ai gjatë këndimit të lutjeve e lëvizte gishtin ashtu të drejtuar nga kibla. Allahu e di më së miri!

 

Alaudin Abazi
1.8.2008