Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen e tij, mbi shokët e tij dhe të gjithë ata që ndjekin rrugën e tij deri në Ditën e Gjykimit.

Vëlla i nderuar, duhet ta kemi parasysh se kohorja, e cila është dispozicion në rajonin tonë, është ajo që e ka përpiluar institucioni më i lartë fetar, Bashkësia Islame e Kosovës. Personi i cili është angazhuar për këtë kohore dhe që çdo vit përkujdeset t`u ofrojë besimtarëve një orar të qëlluar të namazeve është hoxha Hajrullah efendi Hoxha. Personi në fjalë në parathënien e librit sqaron se hyrjen e kohëve të namazeve dhe kalimin e tyre e ka konstatuar me anë të studimit të lëvizjes të Tokës rreth Diellit dhe se ai këtë e ka bërë duke përcjellë ndërrimin e natës dhe të ditës në këto treva. Në këtë parathënie ai e cek shumë qartë se me anë të cilave parametra ka ardhur në përfundim se kur hyn koha e të gjitha namazeve e ndër to edhe koha e akshamit edhe e jacisë. Prandaj, duke e pasur parasysh këtë, themi se duhet t`i përmbahemi orarit të përcaktuar të namazeve ashtu si janë përmendur në këtë kohore.

Ndërsa në lidhje me kohën mes akshamit dhe jacisë, themi se ajo mund të dallojë prej rajonit në rajon. Në Mekë mund të jetë koha më e shkurtër se në vendet tona, pasi edhe dita atje është më e shkurtër se te ne, kjo varet prej gjatësisë së ditës dhe të natës që ndodh në rajon. Gjithashtu për namazet në përgjithësi, hadithet e sakta vërtetojnë se koha e faljes së tyre duhet të bëhet posa të hyjë koha, por edhe nëse vonohet pak brenda kohës së paraparë, në raste e rrethana të ndryshme, inshallah nuk prish punë. Allahu e di më së miri!