Pyetja:

Selam alejkum! Desha të pyes nëse keni ndonjë shpjegim më të gjerë në lidhje me Salatul Awabiin. Allahu ju shpërbleftë!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.

Namazi ewabin është namazi i duhasë, i cili falet dy, katër, gjashtë ose tetë rekate, ndërsa koha e faljes është pasi të lindë dielli dhe përfundon afër namazit të drekës. Vonimi i namazit të duhasë deri në kohën kur të jetë dielli më i fortë është më mirë dhe e preferuar.
Nga Zejd ibën Erkami thuhet se doli Pejgamberi alejhi selam te banorët e Kubas (xhamisë së Kubas) në Medinë, kurse ata ishin duke u falur, E ai tha: “Namazi ewabin falet kur ikin të vegjlit e deveve nga nxehtësia e zallit të shkretëtirës.” Transmeton Muslimi 1237.

Fjala “ewab” ose shumësi “ewabinë” do të thotë “ai që kthehet tek Zoti, ai që përfill, u dorëzohet urdhrave të Allahut”. Salatul ewabin njihet nga shumica e fukahave si namazi i duhasë. Ebu Hurejra, Allahu qoftë i kënaqur me të, thotë: “Më ka porositur i dashuri Muhamedi alejhi selam me tri gjëra: të agjëroj tri ditë çdo muaj, të fal namazin e duhasë dhe të fal namazin e vitrit para se të fle.” Transmeton Buhariu dhe Muslimi. 1/395, 1/499.

Për fat të keq është përhapur te sufitë dhe udhëheqësit e tyre, të cilët thonë se po i ngjallim sunetet, një bidat me emrin salatul ewabin, që për ta do të thotë falja e namazit nafile (vullnetar), i cili falet pas akshamit (6 rekate).
Sipas tyre, është “sunet i fortë” të falen gjashtë rekate në mes akshamit dhe jacisë. Ka thënë Pejgamberi alejhi selam: “Kush falet në mes akshamit dhe jacisë, ky është namazi i Ewabinëve:” Ky hadith është hadith daif, i dobët, siç tregon Ibnul Mubareku në librin e tij “Rekaik”, nga transmetimi i Ibnul Mundhiriut dhe nuk argumentohet me të.

Ndërsa realiteti qëndron krejt ndryshe, se nuk ka ndonjë hadith sahih që tregon dhe inkurajon faljen e namazit nafile pas akshamit dhe jacisë e në veçanti gjashtë rekate, mirëpo mund të falet namaz nafile pa i kufizuar në gjashtë rekate dhe pa pasur qëllim se po falet namaz i ewabinëve.
E vërteta qëndron se namazi ewabin është namazi i duhasë. Allahu e di më së miri.
 

Eroll Rexhepi
12.7.2008