Pyetja:

Eselamu alejkum vëllezër!
Jam një vëlla që jetoj në Amerikë. Që kur kam ardhur, s’po kam shumë kontakt me hoxhallarë. Këtu ku jetoj e kam një xhami afër dhe shpeshherë shkoj për namaze të ditës dhe nuk është askush aty. Desha të pyes, pasi jam vetëm dhe s’ka xhemat, a duhet ta thërras ezanin dhe të dal imam vetë, edhe pse s’është askush aty, apo vetëm të falem vetëm ashtu qysh falet njeriu në shtëpi? Allahu ju shpërbleftë!
 

Përgjigja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, shokët dhe të gjithë ata që ndjekin rrugën e tij deri në Ditën e Gjykimit.
Nëse besimtari shkon në xhami për ta falur namazin dhe aty nuk gjen askënd që të falet me të, pra që ta falë namazin me xhemat, atëherë ai megjithëkëtë duhet të thërrasë ezanin dhe të presë pak, ndoshta dikush do të vijë. Nëse kjo nuk ndodh, atëherë ai e fal namazin vetë dhe me këtë ai pa dyshim ka vlerë dhe shpërblim, pasi ka hapur shtëpinë e Allahut dhe e ka madhëruar e përkujtuar Atë në vendin ku të gjithë njerëzit janë dhënë pas kënaqësive dhe mashtrimeve të kësaj bote. Prandaj, ju përgëzojmë për iniciativën dhe hapjen e xhamisë gjatë kohëve të namazit. Lusim Allahun e Lartësuar t’ju shpërblejë për mundin dhe punën!

Alaudin Abazi
4.5.2007