Pyetja:

Es-selamu alejkum ue rahmetullahi teala ue berekatuhu!

Kam dëgjuar se në mes të sunetit të sabahut dhe farzit të sabahut nuk bën të falësh namaz (nafile).
Gjithashtu është edhe prej sunetit që sunetet të falen në shtëpi. Pyetja ime është kështu: Nëse unë fal sunetin e sabahut në shtëpi dhe kur mbërrij në xhami e gjej xhematin duke falur sunetin, a bën t’i fal dy rekate tehijjatul mesxhid apo duhet të qëndroj në këmbë dhe të pres derisa ata të përfundojnë sunetin dhe pastaj të vazhdoj me farzin?
Selam alejkum!


Përgjigjja:

Falënderimet i takojnë Allahut, paqja dhe bekimet e Tij qofshin mbi të Dërguarin e Tij Muhamed, mbi familjen, mbi shokët dhe mbi të gjithë ata që ndjekin rrugën e tij deri në Ditën e Gjykimit.
Ajo që ju veproni është e saktë, pasi nga praktika e Muhamedit salallahu alejhi ue selem ishte falja e sunetit të sabahut në shtëpi. Kurse praktika e sahabëve ishte që ta presin Muhamedin salallahu alejhi ue selem për të filluar farzin e sabahut. Kështu që kur hynte ai në xhami, bëhej ikameti dhe fillonte namazi. Në rastin tuaj, nëse ju arrini në xhami herët dhe mendoni se ka kohë deri në ikamet, atëherë është më e drejtë që ju t`i falni dy rekate (tehijetu mesxhidin) sesa të prisni në këmbë ose të uleni pa u falur. Allahu e di më së miri!

Alaudin Abazi
9.11.2007