Falënderimet dhe lavdërimet i takojnë vetëm Allahut xhele shanuhu, salavatet qofshin mbi të Dërguarin e Tij, Muhamedin salallahu alejhi ue selem, mbi familjen e tij, mbi shokët e tij dhe mbi të gjithë muslimanëve që ndjekin rrugën e tij deri në Ditën e Gjykimit.

Nuk ka dyshim se falja e namazit ka dobi dhe mirësi të shumta dhe ne do të cekim inshallah disa prej tyre.

1. Namazi është vepra më e mirë pas shehadetit (fjalës La ilahe il-lAllah)

Allahu xh.sh thotë: "Po, nëse ata pendohen (nga kufri dhe shirku), e falin namazin dhe e japin zekatin, atëherë i keni vëllezër në fe." (Et-Teube, 11)
Transmetohet se Abdullah ibn Mesudi, Allahu qoftë i kënaqur me të, ka thënë: "E kam pyetur Pejgamberin salallahu alejhi ue selem për veprat më të mira. Më tha: “Namazi në kohën e tij.” Buhariu dhe Muslimi.
Gjithashtu, Pejgamberi alejhi selam, kur e dërgoi Muadh ibn Xhebelin që të ftonte në Islam popullin e Jemenit, i tha: "Ti po shkon tek një popull të cilit i ka zbritur libri (Tevrati dhe Inxhili), pra së pari thirri ata që të mos adhurojnë askënd tjetër përveç Allahut. Nëse e pranojnë këtë (nëse e bëjnë këtë), atëherë tregoju atyre se Allahu xh.sh i ka obliguar t’i falin pesë kohët e namazit ditën dhe natën." Buhariu dhe Muslimi.

2. Namazi ofron riskun

Shumica e njerëzve janë dhënë pas kënaqësisë së kësaj bote dhe e kanë harruar botën tjetër, botën në të cilën kemi për t’u kthyer që të gjithë. A thua vallë a e meriton kjo botë që të vrapojmë pas saj e ta humbin xhenetin e Allahut?

Allahu xh.sh. na ka obliguar që kur të vijë koha e namazit, ta lëmë punën dhe të falim namazin. Allahu xh.sh. thotë: "O ju që besuat, kur bëhet thirrja për namaz, ditën e xhumasë, ecni shpejt për aty ku përmendet Allahu (dëgjojeni hytben, faleni namazin), e lini shitblerjen, kjo është shumë më e dobishme për ju nëse jeni që e dini." (El Xhuma, 9) Pastaj ka urdhëruar që pas namazit të shpërndahen njerëzit për kërkimin e të mirave të Allahut xh.sh.: "E kur të kryhet namazi, atëherë shpërndahuni në tokë dhe kërkoni begatitë e Allahut, por edhe përmendeni shpeshherë Allahun, ashtu që të gjeni shpëtim." (El Xhuma, 10)

Pastaj Allahu xh.sh. i poshtëron ata të cilët i mashtron pasuria nga namazi. Allahu xh.sh. thotë: "Po kur ata shohin ndonjë tregti ose ndonjë aheng mësyhen atje, kurse ty të lënë në këmbë. Thuaju: “Ajo që është tek Allahu është shumë më e mirë se dëfrimi dhe tregtia, e Allahu është furnizuesi më i mirë!” (El Xhuma, 11)
Gjithashtu, Allahu xh.sh. thotë: "O ju që besuat, as pasuria juaj e as fëmijët tuaj të mos u shmangin prej adhurimit të Allahut, e kush bën ashtu të tillët janë mu ata të humburit." (El Munafikun, 9)
Komentuesit e Kuranit thonë se fjala e Allahut "mos u shmangin prej adhurimit të Allahut" ka për qëllim pesë kohët e namazit. Pra, nëse pasuria jote apo tregtia të largojnë nga namazi, atëherë ti do të jesh prej të humburve.

Allahu xh.sh. i ka lavdëruar ata të cilët pasuria apo tregtia e tyre nuk i largon nga namazi. Allahu xh.sh. thotë: "Ata janë njerëz që nuk i pengon as tregtia e largët e as shitblerja në vend për ta përmendur Allahun, për ta falur namazin dhe për ta dhënë zekatin, ata i frikësohen një dite kur do të tronditen zemrat dhe shikimet." (En-Nur, 37)

Nuk duhet ta preokupojë asnjërin çështja e riskut (furnizimit të pasurisë) sepse Allahu xh.sh. është Ai i Cili i furnizon njerëzit. Allahu xh.sh. thotë: "Urdhëro familjen tënde të falë namaz, e edhe ti vetë zbatoje atë, ngase Ne nuk kërkojmë prej teje ndonjë furnizim (për ty as për familjen tënde), Ne të furnizojmë ty (dhe ata), ardhmëria e mirë është e atij që i frikësohet Allahut." (Ta Ha, 132)

O njerëz, mos mendoni se namazi ju largon apo ju ndalon furnizimin. Allahu xh.sh. ju garanton furnizim. Ashtu siç ju ka furnizuar sa keni qenë në barkun e nënës suaj, ashtu do t'ju furnizojë edhe tani. A thua vallë kush ju ka furnizuar sa keni qenë në barkun e nënës suaj, a mos nëna juaj ju ka ushqyer apo babai juaj? Vallahi jo! Allahu është Ai që ju ka ushqyer, Ai i Cili e ka marrë përgjegjësinë e furnizimit të robërve të Tij. "Ne nuk kërkojmë prej teje ndonjë furnizim (për ty as për familjen tënde), Ne të furnizojmë ty (dhe ata)."
Gjithashtu Allahu xh.sh. thotë: "Unë nuk i krijova xhinët dhe njerëzit për tjetër pos që të më adhurojnë. Unë nuk kërkoj prej tyre ndonjë furnizim e as s’dëshiroj të më ushqejnë ata. Allahu është furnizues i madh. Ai, Fuqiforti." (Edh-Dharijat, 56-58)
Dije, o rob i Allahut, se Allahu xh.sh. na e ka dërguar pasurinë si mjet shërbyes e jo si mjet që meriton t’i shërbehet, kurse feja është mjet së cilës duhet t’i shërbejmë. Pejgamberi alejhi selam ka thënë: "Allahu xh.sh ka thënë: “Me të vërtetë Ne e kemi zbritur pasurinë për të falur namazin dhe për të dhënë zekatin, sikur biri i Ademit (njeriu) të ketë një luginë, do të shpresonte ta kishte edhe një, dhe sikur të kishte dy lugina, do të shpresonte të kishte edhe të tretën dhe nuk e ngop njeriun vetëm se dheu. Dhe Allahu ia fal atij që pendohet."

Hadithi është i qartë se Allahu xh.sh. na ka dërguar pasurinë që ta falim namazin dhe t'i kryejmë obligimet e tjera dhe nuk na e ka dërguar pasurinë që të kënaqemi me të e ta harrojmë namazin dhe obligimet e tjera. Ajo pasuri e cila na largon nga përkujtimi i Allahut është pasuri e cila nuk do të na sjellë dobi as në këtë botë as në botën tjetër. "O ju që besuat, as pasuria juaj e as fëmijët tuaj të mos u shmangin prej adhurimit të Allahut. E, kush bën ashtu, të tillët janë mu ata të humburit." (El Munafikun, 9)

Mos u frikëso vëlla për riskun, sepse Allahu xh.sh. e ka caktuar për çdonjërin prej nesh riskun e tij, ashtu siç ia ka caktuar edhe kafshëve. Allahu xh.sh thotë: "Nuk ka asnjë gjallesë në tokë që Allahu të mos ia ketë garantuar furnizimin e saj." (Hud, 6)
Gjithashtu Pejgamberi alejhi selam ka thënë: "Sikurse biri i Ademit (njeriu) do të ikte nga risku i tij ashtu sikurse ikën nga vdekja, do ta godiste risku i tij ashtu sikurse do ta godiste vdekja."
Në një hadith tjetër Pejgamberi alejhi selam thotë: "Risku e ndjek njeriun më shumë sesa vdekja."
Pejgamberi alejhi selam ka thënë: "Allahu xh.sh më ka inspiruar se nuk do të vdes askush pa i ardhur momenti i vdekjes dhe pa e marrë riskun që i është caktuar.”

Pra, o rob i Allahut, pse nuk falesh? Apo frikësohesh se nëse falesh nuk do të kesh ç’të hash, apo se familja jote nuk do të ketë çka të hajë? Vallahi, Ai i Cili të ka krijuar dhe të ka ushqyer atëherë kur askush nuk ka mundur të të ushqejë (kur ke qenë në barkun e nënës), Ai ta ka caktuar riskun dhe ta ka garantuar atë.
Transmeton Ebu Hurejra, Allahu qoftë i kënaqur me të, se Pejgamberi alejhi selam ka thënë: "Allahu xh.sh ka thënë: “O biri i Ademit, më adhuro Mua, do të ta mbush gjoksin me pasuri dhe do ta largoj nga ti varfërinë. E në qoftë se nuk e bën këtë, atëherë do t’i mbush duart e tua me punë (do të kesh telashe) dhe nuk do të ta largoj varfërinë."
Allahu xh.sh. e ka përmendur fjalën "do të ta mbush gjoksin me pasuri" me qëllim se ka shumë të pasur të cilët kanë pasuri, mirëpo në gjoksin e tyre janë të varfër, nuk ndiejnë kënaqësi për pasurinë që kanë. Gjithashtu kanë shumë e shumë telashe e gjithë kjo për shkak se nuk e adhurojnë Allahun xh.sh..
Kurse ata të cilët e falin namazin dhe e adhurojnë Allahun xh.sh., edhe nëse nuk kanë pasuri, ata gjokset e tyre i kanë të pasur dhe nuk kanë telashe ashtu siç kanë ata të cilët nuk e adhurojnë Allahun xh.sh.. Edhe nëse i godet ndonjë fatkeqësi, dinë ta frenojnë veten.
Allahu xh.sh. thotë: "E kush i frikësohet (u përmbahet dispozitave të) Allahut, atij Ai i hap rrugë dhe e furnizon atë prej nga nuk e kujton fare. Kush i mbështetet Allahut, Ai i mjafton atij, Allahu realizon dëshirën e Vet dhe Allahu çdo gjëje ia ka caktuar kohën (afatin)." (Hud, 2-3)

"E sikur banorët e këtyre vendbanimeve të kishin besuar dhe të ishin ruajtur, Ne do t’ju hapnim begati nga qielli e toka." (El A'raf, 96)

Dijeni o muslimanë se nuk ka arsye askush për mosfaljen e namazit. Sikur të kishte dikush arsye për mosfaljen e namazit do të ishin muxhahidët (luftëtarët). Kur as atyre nuk u lejohet që të mos e falin namazin, nuk i lejohet askujt tjetër.
 

Eroll Nesimi
5.9.2008