Ç’duhet thënë para se të therim kurbanin?

Para se të theret kurbani duhet thënë Bismil-lah Allahu Ekber. Transmetohet nga Enesi, Allahu qoftë i kënaqur me të, se ka thënë: "I Dërguari salallahu alejhi ue selem, para se t’i printe dy kurbanet e tij, tha 'Bismil-lah Allahu Ekber'." (Buhariu 7/130 nr.5554, Muslimi 3/1556 nr.1966)

Dhe është kusht që të thuhet Bismil-lah para se të pritet kurbani, përndryshe nuk lejohet të hahet ai mish. Allahu i Madhëruar thotë: "Dhe mos hani nga ajo që (para therjes së saj) nuk është përmendur emri i Allahut." (El-En'am, 121)

Gjithashtu transmetohet se i Dërguari salallahu alejhi ue selem ka thënë: "Çdo gjë që, para se të theret, përmendet emri i Allahut, haje."
Pra, nga kjo kuptojmë se çdo gjë që theret dhe nuk përmendet emri i Allahut, nuk lejohet të hahet.

Kur është koha për therjen e kurbaneve?

Koha e therjes së kurbaneve fillon pas namazit të Bajramit (Kurban Bajramit) dhe vazhdon derisa të perëndojë dielli i ditës së 13 të muajit Dhulhixhe, d.m.th. që pasi të falet namazi i Bajramit deri në ditën e katërt para se të perëndojë dielli.

Mirëpo më së miri është që të theret kurbani sa më shpejt, namazit të Bajramit, ashtu siç ka vepruar edhe i Dërguari salallahu alejhi ue selem, dhe ushqimi i parë që hahet atë ditë të jetë nga mishi i kurbanit.

Transmeton Ahmedi (22475) nga Burejde, Allahu qoftë i kënaqur me të, se ka thënë: "I Dërguari salallahu alejhi ue selem nuk ka shkuar të falë namazin e Bajramit (Bajramit të Ramazanit) pa ngrënë, kurse për Kurban Bajramin nuk ka ngrënë asgjë derisa është kthyer dhe ka ngrënë nga kurbani që ka prerë."
[Zejlaiu transmeton në "Nisbur-raje" (2/221) se Ibn Kattani e klasifikoi këtë hadith si sahih.]

Ibn Uthejmini, Allahu e mëshiroftë, thotë: “Koha e therjes së kurbaneve fillon pas namazit të Bajramit (Kurban Bajramit) dhe vazhdon derisa të perëndojë dielli i ditës së 13 të muajit Dhulhixhe. D.m.th. janë katër ditë për prerjen e kurbaneve: dita e Bajramit (pas namazit të Bajramit) dhe tri ditë pas tij. Kush e ther kurbanin para se të falet namazi i Bajramit apo pasi ka perënduar dielli i ditës së katërt, atëherë ky kurban nuk është i vlefshëm (nuk e ka vlerën e kurbanit, mirëpo njihet si sadaka). Por nëse e ka vonuar therjen me ndonjë arsye, si p.sh. i ka ikur kafsha dhe nuk ka mundur ta zërë derisa ka kaluar dita e katërt ose ka autorizuar dikë për të therur kurbanin dhe i autorizuari ka harruar, atëherë nuk ka ndonjë të keqe që të theret edhe pas ditës së katërt për shkak të arsyes.

Gjithashtu lejohet therja e kurbaneve ditën dhe natën, mirëpo prerja e kurbaneve ditën është më mirë. Më mirë është që kurbanet të theren menjëherë pas faljes së namazit të Bajramit.

Përktheu dhe përshtati: Eroll Nesimi
7.12.2008