Allahu i Madhëruar thotë: "Thuaju besimtarëve të ndalin shikimet (prej haramit), t'i ruajnë pjesët e turpshme të trupit të tyre, se kjo është më e pastër për ta. Allahu është i njohur hollësisht për atë që bëjnë ata. Dhe thuaju edhe besimtareve të ndalin shikimet e tyre, t'i ruajnë pjesët e turpshme të trupit të tyre..." (En-Nur, 30-31)
   Allahu xh.sh. së pari e ka përmendur ndalimin e syve nga shikimi në atë që është e ndaluar ngase ruajtja nga kjo në të vërtetë është masë parandaluese me të cilën ruajmë organin seksual nga lapërdharia. Shikimi është një nga mjetet e ndaluara që shpie në lapërdhari dhe mund të lejohet vetëm në rast të domosdoshmërisë ose kur ka më shumë dobi se ndalimi i shikimit. Shikimi është i ndaluar nëse ekziston frika se mund të shpjerë në mëkat dhe hutim. Allahu i Madhëruar nuk e ka ndaluar shikimin në përgjithësi, por e ka ndaluar shikimin tek ajo që nuk lejohet me fe dhe që mund të shkaktojë mëkat edhe më të madh se vetëm shikimi.
   Ruajtja e organit seksual nga harami është detyrë e besimtarit në çdo situatë. Marrëdhënia seksuale është e lejuar vetëm me bashkëshortësi legale, prandaj ka ardhur urdhri i përgjithshëm mbi ruajtjen e organit seksual. Allahu xh.sh. e ka bërë syrin pasqyrë të zemrës. Nëse besimtari e largon shikimin, edhe zemra e tij do të jetë e mbrojtur nga pasionet e pakontrolluara dhe dëshira e papërmbajtur. Nëse do të shikojë atë që është e ndaluar, në zemër do të gufojë zjarri i pasionit.
   Në Sahihun e Muslimit është shënuar një hadith, në të cilin thuhet që Fadli bin Abbasi r.a. ishte duke kalëruar mbi një deve bashkë me Pejgamberin e Allahut alejhi selam ditën e Kurban Bajramit kur po shkonin nga Muzdelife në Mine. Pranë tyre kaloi një grup femrash dhe Fadli i shikoi me ngulm, prandaj Pejgamberi i Allahut alejhi selam ia ktheu kokën në anën tjetër. Me këtë veprim Pejgamberi alejhi selam ia ndaloi t'i shikojë femrat dhe gjykoi veprimin e tij. Sikur veprimi i Fadlit të ishte i lejuar, Pejgamberi alejhi selam nuk do t'ia kishte ndaluar.
   Në Sahihun e tij, Buhariu shënon një hadith të cilin gjithashtu e transmeton Fadl bin Abbasi r.a., ku thuhet se Pejgamberi i Allahut alejhi selam ka deklaruar: "Allahu xh.sh. ia ka caktuar njeriut hisen në lapërdhari, të cilën ai duhet, deshi apo s'deshi, ta kryejë. Syri bën lapërdhari, ndërsa lapërdharia e tij është shikimi, gjuha bën lapërdhari, ndërsa lapërdharia e saj janë fjalët imorale, këmba bën lapërdhari, ndërsa lapërdhari e saj është hapi drejt zinallëkut, dora bën lapërdhari, ndërsa lapërdharia e saj është të prekurit, zemra dëshiron dhe synon, ndërsa organi seksual tërë këtë e konfirmon apo e mohon."
   Pejgamberi alejhi selam e ka përmendur së pari lapërdharinë e syrit, ngase ai është shkaktar i lapërdharisë së dorës, këmbës, zemrës dhe organit seksual dhe ka treguar se lapërdharia e gjuhës, fjalëve, i paraprin lapërdharisë së gojës, d.m.th. puthjes. Organi seksual këtë e konfirmon, d.m.th. hyn në zinallëk ose e mohon, përmbahet nga kjo. Ky hadith dëshmon qartë për atë që mëkati i syrit është shikimi dhe se kjo është mënyra në të cilën syri bën lapërdhari. Kjo është përgjigje e qartë për ata që e kanë lejuar shikimin e asaj që është e ndaluar.
   Nga Pejgamberi alejhi selam transmetohet gjithashtu me zinxhir autentik të transmetimit se ka deklaruar: "O Ali, mos shiko andej e këndej, ngase shikimi i parë që ndodh rastësisht dhe pa qëllim lejohet, ndërsa shikimi i dytë është haram."
   Dikush kishte shtruar pyetjen: “Ç’deklarojnë ulemaja e nderuar për njeriun i cili një herë e ka shikuar një femër dhe nga ky shikim është dashuruar shumë dhe shpirti i ka thënë: 'Je dashuruar nga shikimi i parë. Sikur ta shikoje edhe një herë, mbase mund të mos duket edhe aq e bukur, prandaj dashuria do të zvogëlohej dhe ti do ta harroje.” A i lejohet ta shikojë për së dyti me qëllim të shërimit prej kësaj dashurie?"
   Ne do t'i përgjigjemi: "Nuk lejohet ta shikojë sërish për dhjetë arsye:
1- Allahu xh.sh. ka urdhëruar ndalimin e shikimit dhe nuk ka dhënë ilaç për zemër në atë që e ka ndaluar për robërit e Tij.
2- I pyetur për shikimin e rastësishëm, duke ditur që kjo lë gjurmë në zemrën e njeriut, Pejgamberi alejhi selam si mënyrë që kjo gjurmë të shërohet ka urdhëruar ndalimin e shikimit dhe jo shikimin e sërishëm.
3- Në hadith është thënë pa mëdyshje se shikimi i parë i rastësishëm është i lejuar, ndërsa shikimi i dytë është i ndaluar dhe është e pamundur që ilaç për atë që është shkaktuar të jetë pikërisht ajo që e ka shkaktuar atë sëmundje.
4- Shikimi i dytë nuk do të ndikojë fare më pak te njeriu se shikimi i parë dhe këtë e tregon praktika. Ajo që është e pritur është fakti që edhe shikimi i dytë do të shkaktojë mendim të njëjtë si edhe shikimi i parë.
5- Mund të ndodhë që kur të shikojë për herë të dytë, të shohë diçka që do ta mahnitë edhe më shumë dhe kjo do t'ia shtojë vuajtjet e dashurisë edhe më shumë.
6- Iblisi i mallkuar, kur e vëren shikimin e njeriut për së dyti, do t'ia zbukurojë edhe më shumë atë që ka parë, më shumë seç është në të vërtetë për t'ia shtuar devijimin.
7- Allahu xh.sh.nuk do ta ndihmojë njeriun nëse del jashtë kufijve të bindjes ndaj Tij, ashtu që do të marrë për ilaç atë që është e ndaluar dhe Allahu xh.sh. për këtë do ta lërë vetëm.
8- Shikimi i parë është shigjetëza helmuese e Iblisit, ndërsa është e ditur që shikimi i dytë është edhe më i rrezikshëm dhe më helmues për zemrën e tij, prandaj si mund të shërohet nga helmi me helm?
9- Ai që dëshiron të veprojë kështu pohon se për hir të Allahut xh.sh. dëshiron ta largojë personin që pëlqen, mirëpo në të vërtetë me shikimin e dytë ai dëshiron të bindet nëse femra të cilën e kishte parë fillimisht është vërtet e bukur siç i është dukur në shikim të parë. Nëse me rastin e shikimit të dytë nuk i pëlqen, do ta braktisë. Do të thotë, do ta lërë ngase nuk i pëlqen dhe jo për hir të Allahut xh.sh.. Ku është pra sinqeriteti për braktisjen e gjërave për hir të Allahut?!
10- Për këtë situatë do ta përmendim një rast. Kur i hip kalit të cilin sapo e ke blerë dhe ai të drejton kah një kalim i ngushtë në të cilin as mund të kthehesh as mund të dalësh dhe kur dëshiron të hyjë, ndaloje, sepse nëse i lejon të hyjë vetëm një hap ose dy, përdor të gjitha mënyrat ta kthesh para se të hyjë i tëri. Nëse ia arrin kësaj, pastaj do të kesh më lehtë. Por, nëse e lejon të hyjë krejtësisht dhe pastaj e detyron të dalë, do ta kesh shumë vështirë. Asnjë njeri me mend nuk do të thotë se e ke më lehtë të dalësh, se e ke më lehtë nëse e lë të hyjë tërësisht.
   Njësoj është edhe me shikimin, kur e shqetëson zemrën. Nëse ndodh vetëm një herë, do ta kesh më lehtë ta shërosh sëmundjen që ka shkaktuar. Mirëpo, nëse shikimi përsëritet disa herë dhe pamja e bukur e femrës të bartet në zemrën e lirë. Dashuria ndaj saj do të forcohet dhe stabilizohet. Sa herë që shikimi përsëritet, do të jetë si uji i cili e ujit bimën. Fidani i dashurisë do të rritet dhe forcohet përderisa zemra nuk sëmuret dhe dobësohet, kështu që do të pushojë së menduari për Allahun xh.sh. dhe urdhrat e Tij. Për shkak të kësaj dashurie do të bjerë në sprovë dhe domosdo do të bëjë lëshime në mëkate dhe zemra e tij do të dështojë.
   Shkaku i vërtetë për çka ky kërkon arsyetim që të shikojë sërish është fakti që syri i tij është kënaqur nga shikimi i parë, prandaj dëshiron ta përsëritë këtë kënaqësi, si p.sh. kur marrim një kafshatë ushqimi të shijshëm. Sikur herën e parë ta kishte mbajtur shikimin, do të ishte mbrojtur nga sprova dhe zemra nuk do t'i vuante nga dashuria.
   Mendo pak për fjalët e Pejgamberit të Allahut alejhi selam, i cili ka deklaruar: "Shikimi është shigjetëz helmuese e Iblisit." Roli i kësaj shigjete helmuese është të hyjë në zemër dhe të veprojë si helm. Nëse njeriu i kundërvihet kësaj, veprimi i helmit do të pushojë e nëse jo, ai helm do ta shkatërrojë.
   El-Merruvizi deklaron se e kishte pyetur Ahmedin: "A është e lejuar që njeriu t'i shikojë robëreshat?" Ahmedi ishte përgjigjur: "Kam frikë për sprovën e tij. Sa shumë dashuri pasionante në zemrën e njeriut ka shkaktuar shikimi."
   Ibni Abbasi deklaron: "Shejtani vepron te njeriu përmes tri gjërave: shikimit, zemrës dhe organit seksual, ndërsa te femra ndikon gjithashtu përmes tri gjërave: shikimit, zemrës dhe organit seksual."


Shikimi është shigjetëz helmuese e Iblisit

   Për atë që shikimi bie mbi ato gjëra të cilat më shpejt shpijnë në atë që është e ndaluar, Islami e ka ndaluar dhe e ka lejuar vetëm në rast të domosdoshmërisë së skajshme. Kryerja e namazit është ndaluar në raste të caktuara dhe situata në mënyrë që të mos ngjasojnë me lutjen e jobesimtarëve kur i luten Diellit, por kjo lejohet në rast të domosdoshmërisë p.sh. kryerja e namazit koha e të cilit vetëm sa nuk ka kaluar, falja e namazit të xhenazes dhe kryerja e namazeve që kryhen për ndonjë arsye të caktuar ose p.sh. me rastin e hyrjes në mesxhid, zënia e Diellit etj..
   Xherir bin Abdullahu r.a. deklaron: "E kam pyetur Pejgamberin e Allahut alejhi selam për shikimin e rastit dhe ai më urdhëroi ta ndaloj shikimin." Shikimi i rastit është ai shikim i cili ngjan pa qëllim të atij që shikon dhe pa dëshirë në zemër për këtë dhe ky është shikim për të cilin nuk ka përgjegjësi. Nëse për herë të dytë shikojmë qëllimisht, ky është mëkat.
   Pejgamberi i Allahut alejhi selam e ka urdhëruar Xheririn që me rastin e shikimit të rastit menjëherë ta mbajë shikimin dhe të mos e përsëritë atë. Ai që rastësisht e shikon një femër të bukur dhe për këtë bie në sprovë dhe përsiatje për të, Pejgamberi i Allahut alejhi selam ka urdhëruar shërimin ashtu që do të shkojë te gruaja e vet dhe të ketë marrëdhënie me të. Pastaj Pejgamberi i Allahut alejhi selam ka deklaruar: "Gruaja jote ka njësoj çka edhe ajo të cilën e ke shikuar." Ky veprim do të bëjë që ta harrojë femrën të cilën e kishte parë.
   Shikimi e shton pasionin në zemrën e njeriut, andaj Pejgamberi i Allahut alejhi selam ka urdhëruar që ai të pakësohet apo neutralizohen, ashtu që do të ketë marrëdhënie me gruan e vet. Hutimi që ngjan përmes shikimit është bazë dhe fillim i çdo hutimi tjetër, siç shënojnë Buhariu dhe Muslimi në Sahihët e tyre hadithin të cilin e transmeton Usama bin Zejdi r.a., në të cilin Pejgamberi i Allahut alejhi selam ka deklaruar: "Për çka frikohem më së shumti pas mua për ithtarët e mi është sprova të cilën do ta kenë nga femrat."
   Në Sahihun e Muslimit shënohet një hadith të cilin e transmeton Ebu Seid el-Hudri r.a., në të cilin thuhet që Pejgamberi i Allahut alejhi selam ka deklaruar: "Ruajuni nga përkushtimi ndaj kësaj bote dhe ruajuni nga sprovat me femra."
 

Ibn Kajjim El Xhevzije
Marrë prej librit "Futja e të dashuruarve në kopshtin e dashurisë"
Përgjigje e duhur për atë që kërkon ilaç efikas
Përgatiti: Dibrani
Kaçanik
21.12.2007
 

Shënim: Kjo temë është publikuar në një rubrikë  të lirë dhe materialet që publikohen në të nuk do të thotë se përputhen kurdoherë me ato që redaksia e Klubit Kulturor i di për të vërteta.