Falënderimi i takon Allahut. Atë e falënderojmë dhe prej Tij falje dhe ndihmë kërkojmë. Kërkojmë mbrojtje nga Allahu prej të këqijave të vetvetes dhe të veprave tona. Kë e udhëzon Allahu, s'ka kush e lajthit dhe kë e largon nga rruga e vërtetë, s'ka kush e udhëzon. Dëshmoj se nuk meriton askush tjetër të adhurohet përveç Allahut, i Cili është Një dhe dëshmoj se Muhamedi alejhi selam është rob dhe i Dërguar i Tij.

Mbrëmja e maturës, haram

Në këto ditë pranvere, kur toka ka zbuluar bukuritë e saj, pemët kanë filluar frytet e tyre, çdo gjë ka lulëzuar dhe toka është gjelbëruar, tani çdo gjë është zbukuruar, por zemrat tona të ndryshkura ende janë në injorancën e thellë duke vazhduar. Tani janë ditët ndër me të kobshme të vitit, nuk ka ditë të këqija por njerëzit e neveritshëm i bëjnë edhe ditët e neveritura, njerëzit e mallkuar i bëjnë edhe ditët e mallkuara, njerëzit e prishur i prishin edhe ditët e mira. Tani gjatë këtyre ditëve motrat apo vajzat tona, vëllezërit apo djemtë tanë kanë përfunduar shkollën e mesme dhe duan që përfundimisht t’i festojnë ne mënyrën më të mirë të mundshme gjithë ato vite të kaluara në një natë që nuk ka asgjë tjetër përveçse hidhërim të Allahut dhe duke pasur frikë se mos po ndodh ndonjë dënim eventual nga Allahu i Lartësuar dhe duke pas parasysh se atë çka e dimë për vete, duhet t’ua mësojmë dhe t’ua tregojmë të tjerëve. Nuk mund të jem rehat pa i shkruar shumë fjalë të cilat gjenden në zemrën time, më të cilat dua t’u drejtohem të gjithëve e në veçanti atyre që këto ditë janë pjesë e festimeve dhe pjesë e mbrëmjeve të ndryshme, e ndër to pjesë e mbrëmjes së maturës.

Nuk ka asgjë në këtë botë e që nuk është cekur në Kuran dhe ai Kurani është fjala më e mirë, më e besueshme dhe plotësisht e vërtetë, pasi është nga Allahu i Lartësuar, nga Krijuesi i çdo gjëje, nuk ka asgjë në këtë botë që nuk është lejuar apo ndaluar nga Allahu i Madhëruar në Kuran direkt apo indirekt dhe dëshiroj që atë që e di për vete t’ua them sot juve, që në Ditën e Gjykimit sado pak të kam me çfarë të dal para Alahut. Mbrëmja e maturës është haram pa pikë diskutimi, mirëpo për ta vërtetuar plotësisht kam vendosur të shkruaj gjatë dhe sa më qartë që të mundem. Gjithë ato vite shkollë sigurisht kanë qenë të gjata, por ja ikën shpejt dhe përfunduan dhe unë do të shkruaj gjatë, por për ata që dëshirojnë të lexojnë dhe ta dinë rëndësinë dhe vlerën e saj, kjo teme e gjatë kalon shpejt si vitet shkollore.

Këtë temë e titullova Mbrëmja famëkeqe e maturës dhe maturantët me qëllim që të njohim qartë se për ku do të nisemi dhe për çfarë bëhet fjalë, pasi në esencë mbrëmja e maturës është njëra nder netët më famëkeqe të vitit, andaj edhe e kam emëruar ashtu. Nuk do ta zgjas më tepër në këtë pjesë vetëm dua t’ju kujtoj se për ta vërtetuar se mbrëmja e maturës është haram me plot kuptimin e fjalës, kam vendosur të shkruaj për pikat më të ndjeshme të cilat janë prezente në ato ditë konkretisht në mbrëmjen e maturës, duke i komentuar dhe duke vendosur ajete dhe hadithe të cilat lidhen me këtë temë. E ato janë:

1. Shpenzimet
2. Përzierja mes dy gjinive
3. Lakuriqësia
4. Muzika
5. Alkooli
6. Amoraliteti etj...

Shpenzimet

Prej dukurive negative dhe ndër të këqijat kryesore të mbrëmjes së maturës është shpenzimi i pasurisë në diçka të humbur, shpenzimi i pasurisë në haram, shpenzimi i pasurisë aty ku nuk është i kënaqur Allahu. Duhet pasur frikë-respekt ndaj Allahut, i Cili na furnizon dhe më furnizimin e Tij i shkelim ligjet e Tij. Mjerë për ne, sa mizor që jemi! Muhamedi salallahu alejhi ue selem ka thënë: "Nuk lëvizin këmbët e birit të Ademit Ditën e Kijametit derisa nuk pyetet për pesë gjëra: për jetën, ku dhe si ka jetuar; për rininë ku e ka kaluar; për pasurinë ku e ka fituar dhe ku e ka harxhuar dhe çka ka vepruar me diturinë e tij." [Tirmidhiu]

Këto 5 gjëra lidhen direkt apo indirekt me temën që po shtjellojmë. Allahu i Lartësuar në Ditën e Gjykimit do të na pyesë për shumë gjëra. Kur të pyeteni nga Allahu i Lartësuar për pasurinë nga e keni fituar dhe ku e keni shpenzuar, si do të përgjigjeni vallë? Allahu nuk i bën padrejtësi askujt, njerëzit janë ata të cilët i bëjnë padrejtësi vetes së tyre. Shpenzimet e mbrëmjes së maturës janë më se paku 50 euro deri në shpenzimet marramendëse 300 e 500 euro, për çfarë, për ta hidhëruar Allahun dhe për ta mbushur konton tuaj me gjynahe dhe për ta kënaqur komandantin suprem tuajin, shejtanin e mallkuar.

Po t’i shpenzonit ju o maturantë vetëm nga 1 euro për nënat, për baballarët apo për ndonjë të afërm tuaj, ose po ta ndihmonit një jetim apo një të varfër qoftë edhe me 1 euro, kjo do të ishte punë e shumë e mirë dhe e madhe për ju në Ditën e Gjykimit, sikur t’i blinit diçka nënave tuaja e t’i gëzonit ato, do ta gëzonit edhe Allahun e Lartësuar dhe pastaj do të pasonin lutjet dhe urimet e nënave për atë çka do t’i ofronit. Por jo, jam shumë i sigurt që shumica e nënave i mallkojnë bijtë dhe bijat e tyre kur marrin rrugën për në mbrëmjen e maturës dhe bashkë më mallkimin e nënës shkon edhe mallkimi i engjëjve dhe mallkimi i Allahut. Allahu në Kuran thotë: "Ata që nuk besuan, shpenzojnë pasurinë e tyre për të penguar nga rruga e Allahut. Ata do të shpenzojnë atë dhe ajo do të bëhet dëshprim i tyre, e madje ata do të mposhten. E ata që mohuan, do të përmblidhen vetëm në Xhehennem". (El-Enfal: 36). Allahu na ruajttë prej njerëzve të tillë! Sigurisht dhe pa pikë diskutimi shpenzimet e mbrëmjes se maturës do të jenë dëshpërim për ju që nga momenti i vdekjes, në periudhën e varrit, në Ditën e Gjykimit dhe në xhehenem, banorë të të cilit janë ata që i shkelin ligjet e Allahut dhe nuk pendohen. O maturantë, mos shpenzoni pasurinë në rrugën e shejtanit, mos e hidhëroni Allahun dhe kini shumë kujdes që mos ta meritoni dënimin e Tij. Allahu ju udhëzoftë!

Përzierja e dy gjinive

S’ka dyshim se prej harameve të maturës është përzierja e dy gjinive, qëndrimi së bashku në një vend,vallëzimi, këndimi etj... Allahu i Lartësuar nuk e lejon qëndrimin në një vend meshkuj dhe femra pasi e ka ndaluar një gjë të tillë. Allahu në Kuran na tregon qartazi që nuk duhet të vetmohemi me gjininë e kundërt, ja ajeti konkret: "Dhe mos iu afroni amoralitetit (zinasë), sepse vërtet ajo është vepër e shëmtuar dhe është një rrugë e keqe. (Isra; 32). Allahu i Lartësuar e ka ndaluar afrimin tek çdo rrugë që na shpie në zina e rruga kryesore për te zinaja është përzierja e gjinive dhe të vetmuarit me ta ose me to. Transmetohet nga Usame ibn Zejd se Pejgamberi [SalAllahu Alejhi ve Selem] ka thënë: “Nuk kam lënë pas meje fitne (sprovë) më të madhe sesa fitneja (sprova) e grave.” Kështu që besoj është e qartë për të gjithë se bashkimi dhe përzierja e meshkujve dhe femrave çon në lajthitje, në humbje, në devijimin e rrugës së xhennetit, përzierja e meshkujve dhe femrave çon në hidhërimin e Allahut.

Duhet ditur që Allahu është më i mëshirshëm për ne sesa nëna për fëmijën e saj të posalindur, mirëpo Allahu ka caktuar kufij dhe pas hidhërimit të Allahut pason dënimi. Allahu na faltë dhe na ruajttë nga dënimet të cilat vijnë si shkak i mëkateve të atyre që bëjnë harame. Pra ti vëlla i dashur dhe motër e nderuar dije që mbrëmja e maturës është haram vetëm në bashkimin e gjinive e lëre më t’i shikojmë haramet e radhës të cilat janë prezente atë natë apo atë mbrëmje mature. Do të shohim në vazhdim se cilat janë dukuritë e tjera negative të mbrëmjes së maturës pasi pozitive s’ka asnjë fatkeqësisht, mirëpo mos harroni që mbrëmja e maturës është haram dhe e ndaluar për ju rreptësisht vetëm pse bashkohen meshkuj dhe femra në një vend pa shikuar anët negative të tjera. Kini frikë Allahun dhe kujtoni dënimin e Tij!

Lakuriqësia

Ndër dëmet dhe të këqijat më të mëdha të mbrëmjes së maturës është zhveshja ekstreme, lakuriqësia, e cila shpie direkt në amoralitet, e Allahu nuk i do mizorët dhe ata që i përbuzin fjalët e Tij. Allahu i Lartësuar në Kuran thotë: "O ti Pejgamber, thuaju grave të tua, bijave të tua dhe grave të besimtarëve le t’i vënë mbulesat e veta mbi trupin e tyre, pse kjo është më afër që ato të njihen (se nuk janë rrugaçe) e të mos ofendohen. Allahu fal gabimet e kaluara, Ai është Mëshirues." [Ahzab, 59]. O motra të nderuara që dëshironi të jeni pjesë e hidhërimit të Allahut ato ditë apo atë natë të kobshme, kujtoni fjalët e Allahut dhe mos shkoni në hidhërimin e Tij pasi Ai ju urdhëron që të mbuloheni në mënyrë që të jeni të devotshme dhe stolitë tuaja t’ia zbuloni vetëm burrit tuaj nëse doni kënaqësinë dhe shpërblimin e Allahut. Allahu i Madhëruar thotë: ”Ata të cilët dëshirojnë që tek besimtarët të përhapet imoraliteti, ata i pret dënim i dhembshëm në këtë dhe në botën tjetër.” [En-Nur, 19]

Pra sot ne këto ditë të përfundimit të shkollës së mesme, njerëz me një mëndje të tillë ka shumë, ndër ta janë prindërit, drejtorët, profesorët dhe bashkë më ta edhe nxënësit të cilët urdhërojnë, shkojnë dhe i afrohen me plot dëshirë dhe vullnet rrugës së amoralitetit. Ka thënë Allahu i Lartësuar: “Dhe rrini në shtëpitë tuaja e mos shfaqni bukurinë tuaj si shfaqej në injorancën e hershme, faleni namazin, jepeni zekatin dhe respektojeni Allahun dhe të Dërguarin e Tij...“ [El-Ahzab, 33]. E ju o motra a mendoni ndonjëherë për Allahun, për mirësitë që ua ka dhënë, për begatitë që ju furnizon apo vetëm keni vendosur ta hidhëroni Allahun, krijuesin tonë dhe të çdo gjëje? Vetëm mos harroni se pas çdo vështirësie vjen lehtësimi dhe pas çdo hidhërimi vjen dënimi. Transmetohet nga Ebu Hurejra, Alahu qoftë i kënaqur me të, se Pejgamberi salallahu alejhi ue selem ka thënë: " Zinaja e syve është shikimi, zinaja e veshëve është dëgjimi, zinaja e gjuhës është të folurit, zinaja e dorës është prekja, dhe zinaja e këmbës janë hapat." [Buhariu dhe Muslimi]

O vëlla i dashur dhe motër e respektuar, ki frikë Allahun kudo që të jesh, largoje veten nga shikimi haram, dëgjimi haram, të folurit haram, të prekurit haram dhe të ecurit në haram, dije o vëlla dhe motër se shikimi i Allahut në ty është më i shpejt sesa shikimi yt në haram. Në mbrëmjen e maturës çdo gjë që bëhet është haram, a dëshironi që mbrëmja e maturës të bëhet shkak që të mos mund ta shikoni Allahun në xhennet? A dëshironi ta shihni Allahun më sytë tuaj? A dëshironi ta dëgjoni zërin e Alahut me veshët tuaj? Sigurisht që po, e kjo do të ndodhë në xhennet, por dijeni se më sytë tuaj që shikoni haram nuk mund ta shihni madhërinë e Allahut dhe veshët tuaj të cilët dëgjojnë haram nuk mund ta dëgjojnë zërin e Allahut, goja juaj që flet haram nuk mund t’i shijojë begatitë e xhennetit, duart tuaja të cilat prekin haram nuk mund t’i prekin bukuritë e xhennetit dhe këmbët tuaja më të cilat ecni në haram nuk mund të ecin drejt portave të xhennetit. Për ato femra që e zbulojnë trupin e tyre dhe për ata meshkuj të cilët shikojnë trupin e femrave të huaja nuk ka vend në xhennet, vendtubim dhe vendtakim i tyre do të jetë zjarri i Xhehnnemit i ndezur fort, lëndë djegie e të cilit janë gurët dhe njerëzit. Allahu na ruajttë dhe na bëftë haram xhehenemin! Pra mos harroni vëllezër dhe motra se mbrëmja e maturës bëhet edhe më haram pasi pas përzierjes se dy gjinive është prezente edhe lakuriqësia ekstreme e femrave, me ç’rast është haram i madh të qëndrohet dhe të shkohet në një vend të tillë. Dëshironi kënaqësinë e Allahut, thojini jo mbrëmjes së maturës!

Muzika

Ndër haramet e mbrëmjes së maturës është edhe muzika, pjesë përbërëse e asaj mbrëmje famëkeqe... Pa dyshim se dëgjimi i muzikës në mbrëmjen e maturës është i tepërt. Muzika është haram dhe mbrëmja e maturës bëhet edhe më haram kur në kuadër të saj është edhe muzika. I Dërguari i Allahut salallahu alejhi ue selem ka thënë: “ Nga umeti im me siguri do të ketë prej atyre që do t´a bëjnë të lejuar zinanë, mëndafshin, alkoolin dhe veglat muzikore." Kështu që dijeni se muzika është haram, është tingull i shejtanit, instrumentet muzikore janë vegla të shejtanit, shumë të qarta i kemi edhe ajetet kuranore, ku Allahu thotë: "Po ka nga njerëzit që blenë tregime boshe e me qëllim që t'i largojnë njerëzit prej rrugës se Allahut pa pasur kurrfarë fakti dhe për t'i marrë ato (ajetet e) Allahut si tallje. Për ta me siguri është përgatitur dënim i turpshëm." (Lukman, 6) Dhe ne një ajet tjetër Allahu i Lartësuar po ashtu thotë: “Dhe me alarmin e zërit tënd, mashtroje atë që mundesh prej tyre, me kalorësit e këmbësorët e tu thirri ata, përzieju më ta në pasuri dhe në fëmijë dhe premtoju atyre, po shejtani nuk u premton tjetër, përveç mashtrim. Në të vërtetë, ti nuk ke kurrfarë fuqie ndaj robërve të Mi. Mbrojtja e Zotit tënd është e mjaftueshme (për ata). [Isra 64-65]

Një gjë dijeni vëllezër dhe motra se muzika është kënaqësi momentale për trurin, ndërsa është shkatërruese e përjetshme për zemrën, në atë zemër që e ka zënë vendin muzika aty nuk ka vend për Kuran dhe zemra pa Kuran është e vdekur, Allahu na ruajttë prej zemrave të tilla. Pasi edhe muzika është pjesë e mbrëmjes së maturës, atëherë harami shtohet edhe më shumë ne atë natë, kështu që ju vëllezër dhe motra mendoni dhe vendosni vetë se çfarë do të bëni nëse ende nuk keni vendosur, por edhe nëse keni vendosur, ndaluni, meditoni dhe shqyrtojeni mirë rastin dhe vendosni për të ardhmen tuaj të ndritur në xhenet ose për të ardhmen tuaj të zymtë në xhehenem, Allahu na ruajttë prej zjarrit të tij. Mendoni...!

Alkooli

Nëna e të gjitha të këqijave është alkooli. Allahu në Ditën e Gjykimit nuk do ta shikojë atë njeri që konsumon alkool. Mjerë për ata të cilët marrin pjesë në një vendtubim në të cilin harxhohet pasuria pa kufij, në të cilin janë të dy gjinitë e përziera, në të cilin femrat janë të zhveshura gjysmëlakuriq apo nëse mund të shprehem kështu nuk ka ku shkon më lakuriq, mjerë për ata të cilët marrin pjesë në vendtubime ku këndohet dhe transmetohet muzikë çfarëdo qoftë ajo, mjerë për ata që marrin pjesë në atë vend ku pihet alkooli dhe mjerë për ata meqë pas alkoolit bëhet amoralitet dhe çdo vepër tjetër e shëmtuar. Allahu i Lartësuar e ka ndaluar alkoolin dhe ka thënë:"O ju që besuat, s'ka dyshim se vera, bixhozi, idhujt dhe hedhja e shigjetës (për fall) janë vepra të ndyta nga shejtani. Pra, largohuni prej tyre që të jeni të shpëtuar." (El-Maide: 90)

Pra, vëllezër dhe motra, e kuptuat se çfarë ka thënë Allahu në Kuran; nëse doni të jeni të shpëtuar, largojuni vendit ku pihet alkooli dhe ku bëhen vepra të ndyta. Në një hadith, Ibni Umeri transmetohet se ka thënë: “I Dërguari i Allahut salallahu alejhi ue selem ka thënë: “Gjithçka që deh është alkool, ndërsa çdo lloj alkooli është haram!” Po ashtu në një transmetim tjetër vërtetohet edhe më shumë hadithi paraprak nga: Kajs b. Sa’d b. Ubade që ka thënë: “E kam dëgjuar të Dërguarin e Allahut salallahu alejhi ue selem se ka thënë: “Gjithçka që deh është alkool (hamër), ndërsa çdo lloj alkooli është haram dhe largohuni nga vera prej misri!” (Verën prej misri e bënin abisinasit dhe quhej “el-gubejra.”) Prej shenjave të vogla të kiametit është edhe kjo që ka thënë Muhamedi a.s.: “Njerëzit e umetit tim do të pinë verë, ndërsa do ta quajnë më emra të ndryshëm.”

Kështu që në ditët e sotme njohim me dhjetëra e qindra lloje të pijeve alkoolike, që të gjitha janë haram pasi ajo që është e ndaluar në shumicë është e ndaluar edhe në pakicë. E kur mbrëmjes së maturës i bashkëngjitet edhe alkooli, aty nuk mbetet gjë tjetër pa u bërë, ka të atillë që thonë se nuk pihet alkool dhe nuk lejojnë alkool. Unë e di shumë mirë dhe kam dëshmitarë të shumtë për këtë që nxënësit së bashku me profesorët e tyre pinë pije alkoolike pa kontroll e çka mbetet pas alkoolit për t’u bërë, sigurisht që nuk ka vepër të ndyrë e që nuk bëhet më pas. Mendohuni mirë se për ku do të niseni o "maturantë", mos harroni që rruga juaj mund të jetë e pa kthim, ndërsa takimi me Allahun veç është afruar. A keni guxim të takoheni me Allahun e Lartësuar të mbushur me gjynahe dhe që asnjëherë balli juaj s’e ka puthur tokën dhe zemrat tuaja kurrë nuk i janë nënshtruar Allahut të Lartësuar? Sigurisht që kurrë nuk është vonë për t’u kthyer në rrugën e drejtë, por ndaluni tani dhe kthehuni që tani, Allahu ju udhëzoftë o ju që e keni poshtëruar personalitetin tuaj njerëzor, kini frikë Allahun dhe në vendimet tuaja mos të marrë pjes shejtani i mallkuar!

Amoraliteti

Sigurisht që pas të gjitha atyre që i cekëm më lart nuk na mbetët asgjë tjetër pos që të flasim edhe pak rreth amoralitetit (zinasë). Për ta përmbushur kulminacionin e mëkateve në mbrëmjen e maturës, pasi është harxhuar gjithë ajo pasuri për një natë të tillë, pasi shansi i “mirë” nuk përsëritet, pasi të dy gjinitë janë së bashku dhe femrat më veshje provokuese-ekstreme të përziera me meshkuj të dehur po edhe të atillë kinse të dehur pasojnë pjesë të amoralitetit çfarëdo lloj qofshin..., ato vajza dhe ata djem që e mohojnë këtë çka e kam shkruar e përsëris hadithin prapë edhe në këtë pjesë edhe një herë. Transmetohet nga Ebu Hurejra, Allahu qoftë i kënaqur me të, se Pejgamberi salallahu alejhi ue selem ka thënë:" Zinaja e syve është shikimi, zinaja e veshëve është dëgjimi, zinaja e gjuhës është të folurit, zinaja e dorës është prekja, dhe zinaja e këmbës janë hapat."

Këto 5 pika janë të përfshira ne mbrëmjen e maturës të cilave nuk mund të ju ikësh vetëm nëse e braktisni dhe nuk shkoni fare ne mbrëmje, për ndryshe ju do të jeni pjesë e këtyre pikave, nuk është më rendësi se sa nga këto pika janë praktik tek ju, mjafton ne hidhërimin e Allahut vetëm një prej tyre. Dua prapë që t’i cek fjalët e Allahut në Kuran ku thotë: "Dhe mos iu afroni amoralitetit (zinasë), sepse vërtet ajo është vepër e shëmtuar dhe është një rrugë e keqe. (Isra; 32)

Dhe kurrsesi mos ju afroni, as rrugëve të amoralitetit e lëre më të afroheni në amoralitet, afrimi në amoralitet është mu në atë çast kur vendosni që të merrni pjesë në mbrëmjen e maturës, ndërsa pjesëmarrja juaj aty është çdo sekondë amoralitet me sy, me veshë, me gjuhë, me duar dhe me këmbë, Allahu na ruajttë prej shpirtrave të tillë. Pra, mëkatet më të mëdha bëhen në atë natë dhe nuk ka pikë diskutimi se ajo natë është haram. Dijeni vëllezër dhe motra se prej nisjes tuaj në atë vend të poshtër nuk jeni nën mbrojtjen e Allahut, nuk jeni nën rahmetin e Allahut, por jeni në hidhërimin e Allahut tej mase, saqë duhet të keni frikë nga ndonjë dënim çfarëdo qoftë ai, nëse në një vend bëhen të gjitha mëkatet e mundshme dhe në atë vend nuk zbret ndonjë dënim, dijeni që Allahu pret a ka ndonjë njeri që kërkon faljen e Tij, a ka ndonjë njeri që dëshiron të pendohet sinqerisht dhe t’i kthehet Allahut njëherë e përgjithmonë. Por edhe nëse nuk dënoheni në këtë dynja, dënimi i botës së ardhme është i pashmangshëm dhe xhehenemi do të jetë vend i atyre që nuk e njohën Allahun dhe që shkuan pas shejtanit të mallkuar, përpos atyre që do Allahu, Ai është i Urtë dhe nuk i bën zullum askujt. Ju jeni zullumqarë të së ardhmes tuaj.

Nëse shkoni në atë vend të mallkuar pa dyshim se do të krenoheni me pjesëmarrjen tuaj dhe do të tregoni për çastet tuaja të kaluara atje e Allahu nuk i do ata të cilët krenohen me mëkatet e tyre. Ju lus nga zemra të mendoheni mirë para se të merrni rrugë. Allahu ju udhëzoftë dhe inshallah nuk do të jeni pjesë e kënaqësive të shejtanit dhe pjesë e hidhërimit të Allahut!

O maturantë!
A shihni ju o maturantë apo në sytë tuaj gjenden perdet e shejtanit? O maturantë, ju a dëgjoni apo në veshët tuaj ka urinuar shejtani i mallkuar? Për çfarë po zbukuroheni o maturantë? Për çfarë po festoni ju?... 12, 13 vite shkollë, 12, 13 vite mësim, mësimi është ibadet, mirëpo ibadetin tuaj po e kurorëzoni në mënyrë të gabuar, në mënyrë të ndaluar, me të cilën do ta hidhëroni Allahun tepër, gjithë këto vite shkollë ju sot dëshironi që të festoni diçka që është e ndaluar, gjithë ato vite me sjellje të mira, gjithë ato vite me nota të mira e sot kulminacionin e viteve të kaluara do ta përfundoni në mënyrë të gabuar. Mendohuni mirë para se ta hidhëroni Allahun dhe dijeni që pas hidhërimit të Allahut zbret dënimi i Tij.

Kam dëgjuar njerëz të cilët thonë se do të shkoj në mbrëmje për shkak të shoqërisë, për të mos u ndarë nga shoqëria, për të mos i shkëputur lidhjet me shoqërinë! E në fund të fundit kur t’ju vijë vdekja shoqëria juaj ose vijnë ose nuk vijnë fare në varrimin tuaj; edhe nëse vijnë, do t’ju mbartin mbi supet e tyre deri tek varri dhe do të ikin me nxitim pa ju përshëndetur fare. Ti, o maturant i mjerë, që je nisur me ato mendime duke mos iu ndarë shoqërisë, kujto ato ditë në të cilat shoqëria jote do të braktisin ty dhe do të ikin nga ti. Ti o maturant që për dëshirë të familjes e ke bërë nijet që të nisesh për në atë vend të mallkuar, kujto ato ditë të varri yt kur edhe familja do të braktisin e ti do të mbetesh vetëm e vetëm me veprat e tua, me ty do të mbetet vetëm mbrëmja famëkeqe e maturës dhe çdo gjë çka ke punuar mirë apo keq. Ti o maturant sot po nisesh për të festuar përfundimin e disa viteve shkollimi, po nisesh për të shfryrë epshet dhe të plotësosh dëshirat e tua dhe të shoqërisë tënde. A ke menduar se në të njëjtën kohë po e hidhëron Allahun tej mase, a ke menduar ndonjëherë që ta kënaqesh Allahun apo vetëm që ta hidhërosh? Mendohu mirë para se të nisesh për në atë vend të mallkuar. Kujtoni vdekjen, ajo ju vjen ne befasi, ajo vjen kur nuk e pritni. Kujtojeni që vdekja mund t’ju zërë në atë vend të mallkuar. E si do të dilni para Allahut? Me çfarë fytyre do dilni para Allahut, o maturant të mjerë?

O ju vajza që sot jeni bërë maturante dhe keni vendosur të shkoni në mbrëmjen famëkeqe të maturës, a jeni ju ato vajza që deri dje patët turp të zhvisheni në shtëpitë tuaja, a jeni ju ato të cilat deri dje patët turp që t’ju shohin baballarët tuaj me rroba gjumi apo me rroba të shkurtra, e çfarë po ndodh me ju sot? A jeni ato që keni qenë dje apo keni ndryshuar rrënjësisht, sot po dilni me rroba edhe më të shkurtra se rrobat e gjumit, si sot nuk jeni veshur kurrë, sot po dilni me rrobat më të tejdukshme që ekzistojnë, por më e keqja sot po dilni para qindra njerëzve e dje patët turp të dilni para baballarëve tuaj me rroba gjumi. Pse kështu, ç’ka ndodhur me ju? Kur ju kërkonin baballarët tuaj, i thoshit prit derisa të vishem. Po tani pse po zhvishesh para qindra njerëzve të huaj? Kur ju kërkonin baballarët tuaj një gotë ujë e ju ishit me rroba gjumi apo me veshje të shkurtra, i thoshit prit derisa të vishem e ta sjell ujin. Dhe kur ju përtonit të vishnit rroba më të gjata, nuk uleshit për drekë fare me baballarët tuaj, po përse sot i cakërroni gotat me dhjetëra meshkuj të stërzhveshura, me veshje ekstreme dhe të tejdukshme? A jeni ju ato që ishit dje? Nuk mund ta besoj dhe nuk mund ta imagjinoj çfarë ka ndodhur me ju, pse dje ashtu e sot krejt ndryshe?

Oh, maturantë të mjerë, kini frikë Allahun, kini frikë Zotin tuaj, që ju furnizon vazhdimisht, kini frikë Zotin tuaj, i Cili po ju lejon që ta shihni dritën e Tij dhe të merrni frymë në ajrin e Tij. Kini frikë Allahun, i Cili po ju lejon të ecni lirshem mbi tokën e Tij e sa mizor që jeni dhe kurrë nuk e kujtoni as që e falënderoni Allahun dhe nuk tregoni aspak frikërespekt për Të. Nëse dikush ju ndihmon me diçka, ju sigurisht do ta falënderoni dhe do ta respektoni shumë, ndërsa Allahu, Krijuesi juaj dhe i çdo gjëje, ua ka dhënë të gjitha, ju ka sjell në këtë botë, ju ka dhënë shikimin, dëgjimin, shijimin, këmbët, duart dhe çdo gjë në mënyrë të përsosur e ku janë falënderimet tuaja ndaj Allahut për gjithë këto të mira që Ai ju ka dhuruar? Ato nuk ekzistojnë fare po ç’është më e keqja as nuk keni frikë ndaj Allahut, pasi që po i shkelni ligjet e Tij dhe nuk po shkoni rrugës së Tij, edhe mbrëmja e maturës është shkelje e ligjeve të Allahut, pasi është haram dhe e ndaluar organizimi, pjesëmarrja e të gjitha që çojnë në atë mbrëmje, por ja prapëseprapë Allahu po na lë të jetojmë në tokën e Tij.

Oh sa mizorë që jemi! Ne e njohim Allahun vetëm në vështirësi, pos kur jemi në rrezik, por dijeni se edhe durimi i Allahut ka kufij dhe dënimi i Tij është shumë i ashpër, mos e hidhëroni Allahun, kujdes, kujdes, kujdes ju lutem kujdes! mos e hidhëroni Allahun që të zbret dënimi i Tij. Kthejuni Zotit tuaj të pastër si loti të pastruar nga mëkatet duke bërë vepra të mira, kthejuni Zotit tuaj me fytyra të ndritura, me fytyra të përulura, me fytyra të gëzuara dhe keni frikërespekt ndaj Allahut që ta fitoni kënaqësinë dhe shpërblimin e Tij, xhenetet në të cilat rrjedhin lumenj e atje ka çka syri s’ka parë, ç’ka veshi s’ka dëgjuar dhe ç’ka mendja s’ka ëndërruar dhe as që mund t’i paramendojë kush bukuritë e xheneteve. Kthejuni Allahut me lutje e adhurim para se t’i ktheheni të shtrirë në tokë me qefin dhe t’ju mbulojnë me dhe në tokën e Allahut, në të cilën ju e shkelët me mizori, me kryelartësi dhe kryeneçë. Vazhdoni por mos harroni se ka mundësi që tani t’ju vijë vdekja dhe përfundoi puna juaj. Tani janë vetëm fjalët e Allahut, të cilat i ka premtuar dhe në të cilat nuk ka dyshim, pasi njerëzit duhet të punojnë mirë në këtë dynja që të pushojnë dhe të kënaqen në të ardhmen, në xhenetet e Allahut. Mendo çfarë ke përgatitur dhe çfarë po përgatit për të ardhmen tënde, për ahiretin tënd, por dije që me mbrëmjen e maturës nuk mund t’i fitosh xhenetet e Allahut. Me mbrëmjen e maturës po shkatërroni ahiretin tuaj dhe përfundimisht është nën dijen dhe kontrollin tuaj që të vendosni çfarë do të bëni për të ardhmen tuaj, është e drejtë e juaja që të vendosni për veten tuaj dhe të përgatisni vendin tuaj në ahiret, por prapëseprapë mos harroni, mendohuni mirë para se të vendosni.

Kthejuni Allahut faqebardhë ashtu siç i ka hije robit të Allahut, vazhdoni kokulur në dynja që ta ngrini kokën në ahiret dhe mos shkoni kryelartë në dynja, pasi në ahiret do të jeni të përbuzur, të përulur dhe të dënuar me zjarrin e xhehenemit. Allahu na udhëzoftë, Allahu na drejtoftë, Allahu na faltë gabimet që i dimë dhe ato që s’i dimë! Çdo gjë që ia kam qëlluar është nga Allahu i Lartësuar dhe çdo gjë që kam gabuar është prej meje dhe prej shejtanit të mallkuar. Zemra më është mërzitur, prandaj vendosa të shkruaja gjithë atë që pata në zemër. Këto fjalë kanë dalë nga zemra dhe shpresoj që të depërtojnë në zemra, pasi dua të mirën si vetes sime, jam musliman elhamdulilah, e dua Allahun, e dua xhenetin, por dua që edhe ju ta doni Allahun dhe të informoheni mirë dhe mbarë që ta fitoni kënaqësinë e Tij dhe shpërblimin, xhenetet e Tij. Allahu na bëftë prej banorëve të Firdeusit! Amin! Dhe në fund, lus Allahun e Lartësuar që të mos jeni pjesë e mbrëmjes famëkeqe të maturës, që të jeni robër të Allahut e jo të shejtanit të mallkuar. Allahu na ruajttë dhe na faltë gabimet e kaluara!
Es-Selamu Alejkum Ue Rahmetullahi Ue Beraketuhu.

 

Përgatiti për ju: Berat Shatri
Skenderaj
7.6.2009

 

Shënim: Kjo temë është publikuar në një rubrikë  të lirë dhe materialet që publikohen në të nuk do të thotë se përputhen kurdoherë me ato që redaksia e Klubit Kulturor i di për të vërteta.